حضرت عروہ رحمہ اللہ فرماتے ہیں کہ جو کنواں دور اسلام میں کھودا جائے اس کا احاطہ پچیس ذراع ہوگا، اور پرانے کنویں کا پچاس ذراع اور کھیتی باڑی والے کنویں کا تین سو ذراع ہوگا۔ [مصنف ابن ابي شيبه/كتاب البيوع والأقضية/حدیث: 22686]

حضرت امام زہری رحمہ اللہ فرماتے ہیں کہ مجھے خبر پہنچی ہے کہ چشمے کا احاطہ پانچ سو ذراع ہوگا۔ [مصنف ابن ابي شيبه/كتاب البيوع والأقضية/حدیث: 22687]

حضرت حسن اور حضرت شعبی رحمہما اللہ فرماتے ہیں کہ کنویں کا منڈیر چالیس ذراع ہے۔ [مصنف ابن ابي شيبه/كتاب البيوع والأقضية/حدیث: 22688]

اور حضرت جابر کے واسطے سے حضرت شعبی سے بھی یونہی مروی ہے، دونوں حضرات فرماتے ہیں کہ کنویں کا احاطہ چالیس ذراع ہے۔ [مصنف ابن ابي شيبه/كتاب البيوع والأقضية/حدیث: 22689]

حضرت سعید بن المسیب رحمہ اللہ سے مروی ہے کہ نبی کریم صلی اللہ علیہ وسلم نے ارشاد فرمایا: جو کنواں دور اسلام میں کھودا جائے اس کی منڈیر پچیس ذراع ہوگی، اور پرانے کنویں کی پچاس ذراع ہوگی۔ [مصنف ابن ابي شيبه/كتاب البيوع والأقضية/حدیث: 22690]

حضرت سعید رحمہ اللہ فرماتے ہیں کہ کھیتی باڑی والے کنویں کی منڈیر تین سو ذراع ہوگی۔ [مصنف ابن ابي شيبه/كتاب البيوع والأقضية/حدیث: 22691]

حضرت بلال بن یحییٰ العبسی رحمہ اللہ سے مروی ہے کہ نبی کریم صلی اللہ علیہ وسلم نے ارشاد فرمایا: تین چیزوں کے علاوہ کے لئے احاطہ کرنا نہیں ہے: کنویں کا احاطہ، مجلس میں بیٹھے ہوئے لوگوں کا احاطہ۔ (تیسری چیز یہاں مذکور نہیں لیکن حدیث کی دوسری کتابوں میں ہے اور وہ ہے: طول الفرس، یعنی جہاں آدمی گھوڑا باندھے اس جگہ کا احاطہ) [مصنف ابن ابي شيبه/كتاب البيوع والأقضية/حدیث: 22692]

حضرت ابوہریرہ رضی اللہ عنہ فرماتے ہیں کہ قریش کی ایک عورت نے اپنے غلام کو مدبر بنایا، پھر اس نے اسے مکاتب بنانا چاہا، تو قاصد نے حضرت ابوہریرہ رضی اللہ عنہ کو لکھا۔ آپ رضی اللہ عنہ نے فرمایا: اس کو مکاتب بنا لو، پھر اگر وہ اپنا بدل کتابت ادا کر دے تو ٹھیک ہے، اور اگر تمہیں کوئی حادثہ پیش آجائے (یعنی تمہارا انتقال ہوجائے) تو وہ آزاد ہوجائے گا۔ راوی فرماتے ہیں کہ میرا خیال ہے کہ جو کچھ اس کے ذمہ باقی ہوگا وہ اسی کا ہوگا۔ (بیہقی 314) [مصنف ابن ابي شيبه/كتاب البيوع والأقضية/حدیث: 22693]

حضرت ابن مسعود سے مروی ہے کہ اگر کوئی شخص اپنے مدبر غلام کی خدمت کو فروخت کر دے تو جو کچھ اس کا آقا وصول کرچکا ہے، وہ اس کا شمار ہوگا اور جو باقی رہ گیا ہے وہ غلام پر لازم نہ ہوگا۔ [مصنف ابن ابي شيبه/كتاب البيوع والأقضية/حدیث: 22694]

حضرت ابن مسعود رضی اللہ عنہ سے اسی طرح مروی ہے مگر اس میں اس کا اضافہ ہے کہ جب تمہارا ساتھی مرجائے تو پھر تمہارے لئے کچھ نہیں ہے۔ [مصنف ابن ابي شيبه/كتاب البيوع والأقضية/حدیث: 22695]