حضرت عبد اللہ بن عمرو رضی اللہ عنہ سے مروی ہے جنت میں ایک محل ہے جس کا نام عدن ہے۔ اس کے ارد گرد محل ہیں اور سبزہ ہے، اس کے پانچ ہزار دروازے ہیں اس میں نبی، صدیق، شہید اور عادل بادشاہ کے علاوہ کوئی اور نہ اس میں رہے گا، یا (فرمایا) داخل نہیں ہوسکتا۔ [مصنف ابن ابي شيبه/كتاب البيوع والأقضية/حدیث: 23316]

حضرت عمار رضی اللہ عنہ فرماتے ہیں کہ تین قسم کے لوگوں کے حق کی ادائیگی میں استخفاف صرف کھلا منافق ہی کرسکتا ہے۔ ایک امام عادل، دوسرا بھلائی کا درس دینے والا (استاد) اور تیسرے وہ جو اسلام کی حالت میں بوڑھا ہوگیا ہو۔ [مصنف ابن ابي شيبه/كتاب البيوع والأقضية/حدیث: 23317]

حضرت قیس بن عباد سے مروی ہے عادل بادشاہ کا ایک دن کا عمل تمہارے ساٹھ سال کے عمل سے بہتر ہے۔ [مصنف ابن ابي شيبه/كتاب البيوع والأقضية/حدیث: 23318]

حضرت ابو موسیٰ رضی اللہ عنہ سے مروی ہے کہ بیشک اللہ کے احترام اور اکرام میں سے ہے، بوڑھے مسلمان کا احترام کرنا، اور اس حامل قرآن کا احترام جو حد سے تجاوز کرنے والا بھی نہ ہو اور اس کی تلاوت کو ترک کرنے والا بھی نہ ہو اور عادل بادشاہ کا اکرام کرنا۔ [مصنف ابن ابي شيبه/كتاب البيوع والأقضية/حدیث: 23319]

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: عادل بادشاہ کی دعا رَدْ نہیں کی جاتی۔ [مصنف ابن ابي شيبه/كتاب البيوع والأقضية/حدیث: 23320]

ابراہیم رحمہ اللہ ان لوگوں کے بارے میں فرماتے ہیں جو اپنے گھروں میں بیت الخلاء یا حمام بنانا چاہتے ہوں کہ ”یہ جگہ ان کی ملک ہے وہ اس میں جو چاہے کرسکتے ہیں“۔ [مصنف ابن ابي شيبه/كتاب البيوع والأقضية/حدیث: 23321]

حضرت ابن اشوع نے وہ کنواں بند کروا دیا جس کو ان کے پڑوسی نے ان کی دیوار کے پیچھے کھود دیا تھا۔ [مصنف ابن ابي شيبه/كتاب البيوع والأقضية/حدیث: 23322]

حضرت حسن رحمہ اللہ نے ایک قوم کے گھر کی دیوار کے بارے میں فرمایا: (تمہاری دیوار ہے) اگر صاحب دار چاہے تو اس میں ایک دروازہ بنا سکتا ہے۔ [مصنف ابن ابي شيبه/كتاب البيوع والأقضية/حدیث: 23323]

حضرت ابو قلابہ رحمہ اللہ سے مروی ہے کہ آنحضرت صلی اللہ علیہ وسلم نے ارشاد فرمایا: کھدائی میں ایک دوسرے کو نقصان مت پہنچاؤ۔ [مصنف ابن ابي شيبه/كتاب البيوع والأقضية/حدیث: 23324]

حضرت عمرو رحمہ اللہ سے مروی ہے کہ ایک شخص نے اپنے غلام سے کہا، فلاں کے ساتھ رہ اور اگر تو اس سے جُدا ہوگیا تو آزاد ہے، غلام نے کہا گواہ رہو میں اس سے جدا ہوگیا تھا۔ معاملہ حضرت عمر بن عبد العزیز رحمہ اللہ کے پاس گیا جو اس وقت مکہ کے امیر تھے۔ آپ نے اس کی آزاد ی کا فیصلہ فرما دیا۔ [مصنف ابن ابي شيبه/كتاب البيوع والأقضية/حدیث: 23325]