حضرت محمد بن سیرین فرماتے ہیں کہ میں نے مٹی کے متعلق دریافت کیا جس کے ساتھ کپڑوں کو رنگا جاتا ہے، دو کو ایک کے ساتھ دینا کیسا ہے؟ انہوں نے اس کو ناپسند کیا۔ [مصنف ابن ابي شيبه/كتاب البيوع والأقضية/حدیث: 23916]

ابراہیم اس شخص کے متعلق فرماتے ہیں جو دوسرے شخص کے ساتھ تازہ کھانے کی بیع سلم کرے، پھر اس کی ملاقات نہ ہو اور وہ کھانا پرانا ہوجائے، آپ نے فرمایا: جس سال ملاقات ہوئی ہے اس سال کا تازہ کھانا دے گا۔ [مصنف ابن ابي شيبه/كتاب البيوع والأقضية/حدیث: 23917]

حضرت شریح بھی اسی طرح فرماتے تھے۔ [مصنف ابن ابي شيبه/كتاب البيوع والأقضية/حدیث: 23918]

حضرت شریح سے اسی طرح مروی ہے۔ [مصنف ابن ابي شيبه/كتاب البيوع والأقضية/حدیث: 23919]

حضرت شریح اور حضرت عبد اللہ فرماتے ہیں کہ اگر کوئی شخص کسی قوم کی جگہ پر بغیر اجازت تعمیر کر دے، تو اس کے لئے اس کی تعمیر کا ملبہ ہے، اور اگر اس نے ان کی اجازت سے بنایا ہے تو پھر اس کو نفقہ دیا جائے گا۔ [مصنف ابن ابي شيبه/كتاب البيوع والأقضية/حدیث: 23920]

حضرت علی رضی اللہ عنہ سے اسی طرح مروی ہے۔ [مصنف ابن ابي شيبه/كتاب البيوع والأقضية/حدیث: 23921]

حضرت شریح فرماتے ہیں کہ جو شخص کسی قوم کی جگہ پر ان کی اجازت کے بغیر تعمیر کرلے تو اس کے لئے اس کی تعمیر کا ملبہ ہے، اور ان کی اجازت سے بنایا تھا تو اس کو نفقہ دیا جائے گا۔ [مصنف ابن ابي شيبه/كتاب البيوع والأقضية/حدیث: 23922]

حضرت زکریا فرماتے ہیں کہ میں نے حضرت عامر سے دریافت کیا کہ: ایک شخص نے اپنے پڑوسی کو اپنی دیوار عاریۃً دی، اس نے اس پر تعمیر کردی، پھر وہ اس کو اکھاڑنا چاہتا ہے؟ آپ نے فرمایا: صاحب دیوار کو جتنا اسکا خرچ آیا وہ ادا کرے گا۔ [مصنف ابن ابي شيبه/كتاب البيوع والأقضية/حدیث: 23923]

ابراہیم فرماتے ہیں کہ ایک شخص نے دوسرے کو دیوار عاریۃً دی، اس نے اس پر تعمیر کردی، پھر اس نے اس کی تعمیر اکھاڑنا چاہی، تو حضرت شریح نے دیوار کے مالک سے فرمایا: جہاں چاہو اپنا پاؤں رکھو، یعنی اس کی تعمیر کو اکھاڑ دو (اکھاڑ سکتے ہو)۔ [مصنف ابن ابي شيبه/كتاب البيوع والأقضية/حدیث: 23924]

حضرت قتادہ اور حضرت ابو ہاشم فرماتے ہیں کہ جو شخص پہلے کسی کو تعمیر کرنے کی اجازت دے پھر اس کو نکالنا چاہے تو اس کو تعمیر کی قیمت ادا کرنی ہوگی۔ [مصنف ابن ابي شيبه/كتاب البيوع والأقضية/حدیث: 23925]