حضرت عمرو بن شعیب سے مروی ہے کہ ایک شخص آنحضرت صلی اللہ علیہ وسلم کی خدمت میں حاضر ہوا اور عرض کیا، اے اللہ کے رسول صلی اللہ علیہ وسلم ! میرے والد نے میرا مال لے لیا ہے، آپ صلی اللہ علیہ وسلم نے ارشاد فرمایا: تو اور تیرا مال تیرے والد ہی کے ہیں۔ [مصنف ابن ابي شيبه/كتاب البيوع والأقضية/حدیث: 24186]

حضرت ابن سیرین رحمہ اللہ ارشاد فرماتے ہیں کہ اولاد کے لئے اپنے والد کے ساتھ حسن سلوک کرنا ضروری ہے، اور ہر انسان اس چیز کا زیادہ حق دار ہے جس کا وہ مالک ہے۔ [مصنف ابن ابي شيبه/كتاب البيوع والأقضية/حدیث: 24187]

حضرت ابن عون سے مروی ہے کہ ایک شخص نے حضرت قاسم بن محمد سے دریافت کیا کہ کیا کوئی شخص (والد) اپنے بیٹے کے مال میں سے جو چاہے بغیر اجازت استعمال کرسکتا ہے؟ آپ نے فرمایا: میں نہیں جانتا یہ کیا ہے؟ [مصنف ابن ابي شيبه/كتاب البيوع والأقضية/حدیث: 24188]

حضرت مجاہد فرماتے ہیں کہ اپنے بیٹے کے مال سے وہ لے جو تو نے اسے دیا ہو اور جو تو نے اسے نہ دیا ہو وہ مت لے۔ [مصنف ابن ابي شيبه/كتاب البيوع والأقضية/حدیث: 24189]

حضرت سالم سے مروی ہے کہ حضرت حمزہ بن عبد اللہ بن عمر رضی اللہ عنہما نے ایک اونٹ ذبح فرمایا: ایک سائل نے حضرت ابن عمر رضی اللہ عنہما سے سوال کیا؟ حضرت عبداللہ نے فرمایا کہ یہ میرا مال نہیں ہے۔ حضرت حمزہ نے کہا کہ ابا جان یہ آپ کے لیے بھی حلال ہے۔ آپ اس میں سے جسے چاہیں کھلا سکتے ہیں۔ [مصنف ابن ابي شيبه/كتاب البيوع والأقضية/حدیث: 24190]

حضرت زہری فرماتے ہیں کہ اگر والد محتاج ہو تو وہ اپنی اولاد کے مال میں سے اتنا ہی خرچ کرے گا جتنا اس نے اس پر خرچ کیا تھا۔ [مصنف ابن ابي شيبه/كتاب البيوع والأقضية/حدیث: 24191]

حضرت علی رضی اللہ عنہ ارشاد فرماتے ہیں کہ اگر بیٹا چھوٹا ہو تو والد اس کے مال کا زیادہ حق دار ہے۔ اور جب بیٹا بڑا ہوجائے اور اپنا مال علیحدہ کرلے تو پھر بیٹا زیادہ حق دار ہے۔ [مصنف ابن ابي شيبه/كتاب البيوع والأقضية/حدیث: 24192]

حضرت عمرو سے مروی ہے کہ ایک شخص نے حضرت جابر بن زید سے دریافت کیا کہ میرے والد نے مجھے اپنے مال سے محروم کیا ہوا ہے، اور کہتا ہے کہ میں اس میں سے تجھے کچھ نہ دوں گا، آپ نے فرمایا: اپنے والد کے مال میں سے معروف طریقہ سے استعمال کرلے۔ [مصنف ابن ابي شيبه/كتاب البيوع والأقضية/حدیث: 24193]

حضرت علی رضی اللہ عنہ اور حضرت عبد اللہ سے مروی ہے کہ آنحضرت صلی اللہ علیہ وسلم نے پڑوسی کے لئے شفعہ کا فیصلہ فرمایا۔ [مصنف ابن ابي شيبه/كتاب البيوع والأقضية/حدیث: 24194]

حضرت حکم ایک ایسے شخص سے روایت کرتے ہیں جس نے حضرت علی اور حضرت عبد اللہ کو یہ فرماتے سنا کہ حضور صلی اللہ علیہ وسلم نے پڑوسی کے حق میں شفعہ کا فیصلہ فرمایا۔ [مصنف ابن ابي شيبه/كتاب البيوع والأقضية/حدیث: 24195]