نبی کریم صلی اللہ علیہ وسلم نے ارشاد فرمایا: جو شخص تنگ دست کو مہلت دے یا اس کو معاف کر دے، اللہ تعالیٰ اس کو عرش کے سایہ میں جگہ عطاء فرمائے گا۔ [مصنف ابن ابي شيبه/كتاب البيوع والأقضية/حدیث: 24526]

حضرت عمارۃ سے مروی ہے کہ قاضی شریح کے پاس دو آدمیوں نے کسی شخص کے بارے میں کسی معاملے میں گواہی دی۔ اعمش فرماتے ہیں کہ میرا خیال ہے وہ گواہی خچر کے بارے میں تھی۔ گواہوں نے کہا کہ ہم گواہی دیتے ہیں کہ اس نے یہ خچر فلاں سے خریدا ہے۔ پھر ان میں سے ایک گواہ نے کہا کہ میں گواہی دیتا ہوں کہ یہ فاجر شخص ہے۔ شریح نے فرمایا کہ تجھے کیسے پتہ ہے کہ یہ فاجر ہے؟ کھڑا ہوجا تیری گواہی قبول نہیں ہے۔ [مصنف ابن ابي شيبه/كتاب البيوع والأقضية/حدیث: 24527]

حضرت جعد بن ذکوان سے مروی ہے کہ ایک شخص حضرت شریح کے پاس حاضر ہوا، اور اس نے اپنے گواہ کو بلایا اور کہا: چھوٹا کافر ربیعہ کہاں ہے؟ وہ آیا تو حضرت شریح نے فرمایا: تو نے کو یفر (چھوٹے کافر) کا اقرار کرلیا، پھر اس کی گواہی کو رد فرما دیا۔ [مصنف ابن ابي شيبه/كتاب البيوع والأقضية/حدیث: 24528]

حضرت سفیان سے مروی ہے کہ اگر دو شخص کسی شخص کے خلاف اس بات کی گواہی دیں کہ اس نے بیوی کو طلاق دی ہے، پھر ان دونوں نے اپنی گواہی سے رجوع کردیا، فرمایا: طلاق باقی رہے گی، اگر زوج نے دخول نہیں کیا تھا تو زوج ان گواہوں سے نصف مہر کا رجوع کرے گا اور اگر زوج دخول کرچکا تھا تو پھر گواہوں پر (مہر میں سے) کوئی چیز ادا کرنا لازم نہ ہوگی۔ [مصنف ابن ابي شيبه/كتاب البيوع والأقضية/حدیث: 24529]

ابراہیم سے مروی ہے کہ ایک شخص نے اپنے غلام کو تجارت کی اجازت دی پھر وہ مقروض ہوگیا، اور آقا کا انتقال بھی اِ س حال میں ہوا کہ آقا مقروض ہے، فرمایا: غلام کے دین سے قبل آقا کے قرض سے ابتدا کریں گے۔ [مصنف ابن ابي شيبه/كتاب البيوع والأقضية/حدیث: 24530]

حضرت البتی فرماتے ہیں: مجھے یہ بات پسند نہیں، غلام کے دین سے آقا کے قرض سے قبل ابتدا کریں گے، کیونکہ اس نے اس کی گردن کو (قرض میں) بند کردیا ہے۔ [مصنف ابن ابي شيبه/كتاب البيوع والأقضية/حدیث: 24531]

حضرت ابن جریج فرماتے ہیں کہ میں نے حضرت عطاء سے دریافت کیا میں اپنے ہم پیشہ فرد کے پاس جا کر سامان خریدتا ہوں اور پیسے بھی زیادہ دیتا ہوں۔ وہی چیز اگر میں چاہوں تو اس سے کم پیسوں میں لے سکتا ہوں۔ تو کیا میں اس سے بیع مرابحہ کرسکتا ہوں؟ انہوں نے جواب دیا کہ نہیں۔ [مصنف ابن ابي شيبه/كتاب البيوع والأقضية/حدیث: 24532]

حضرت شعبی رحمہ اللہ فرماتے ہیں کہ کھجور پر قبضہ یہ ہے کہ اس کو دیکھ لے اور الٹ پلٹ کرلے۔ [مصنف ابن ابي شيبه/كتاب البيوع والأقضية/حدیث: 24533]

حضرت ابن سیرین سے مروی ہے کہ ایک شخص نے دوسرے سے کہا کہ اگر میں فلاں فلاں وقت تک تیرا حق لے کر نہ آیا تو میرا گھر تیرا، حضرت شریح نے فرمایا: اگر اس کے ہاتھ نے اس کے پاؤں سے خطا کی تو وہ تاوان دے گا۔ [مصنف ابن ابي شيبه/كتاب البيوع والأقضية/حدیث: 24534]

ایک شخص حضرت شریح کے پاس آیا، اور کہا کہ میں نے اس کے پاس امانت رکھوائی۔ جب وہ ضائع ہوئی تو یہ دیکھتا رہا۔ حضرت شریح نے کہا کہ اس بات پر گواہ لاؤ کہ وہ ضائع ہوئی اور یہ دیکھتا رہا۔ [مصنف ابن ابي شيبه/كتاب البيوع والأقضية/حدیث: 24535]