حضرت تمیم داری نے اپنا مکان فروخت کیا اور اپنی زندگی تک اس میں رہنے کی شرط لگا دی، اور فرمایا کہ میری مثال تو حضرت موسیٰ علیہ السلام کی والدہ کی طرح ہے، ان کا بیٹا ان کو دودھ پلانے کے لئے واپس کیا گیا، اور دودھ پلانے پر اجرت بھی ان کو دی گئی۔ [مصنف ابن ابي شيبه/كتاب البيوع والأقضية/حدیث: 24516]

حضرت عامر سے مروی ہے کہ دو خواتین نے اپنا گھر فروخت کیا، اور دونوں نے عمر بھر اس میں رہنے کی شرط لگا دی، حضرت عامر نے فرمایاِ وہ دونوں جب تک زندہ ہیں اس میں رہیں گی۔ [مصنف ابن ابي شيبه/كتاب البيوع والأقضية/حدیث: 24517]

حضرت وکیع فرماتے ہیں کہ حضرت ابن ابی لیلیٰ ہمارے سامنے اس کو جائز قرار دیتے تھے۔ لیکن ابی لیلیٰ کے علاوہ دوسرے حضرات اس کو رد کردیتے تھے۔ [مصنف ابن ابي شيبه/كتاب البيوع والأقضية/حدیث: 24518]

حضرت شریح فرماتے ہیں کہ ہر مسلمان کے لئے اس کی شرط ہے۔ [مصنف ابن ابي شيبه/كتاب البيوع والأقضية/حدیث: 24519]

حضرت اشعث سے مروی ہے ایک آدمی کی دیوار گرگئی۔ جو اس کے اور اس کے پڑوسی کے درمیان تھی۔ وہ پڑوسی قاضی شریح کے پاس اس معاملہ کو لے کر گیا۔ انہوں نے صاحب دیوار کو بنانے پر مجبور نہ کیا بلکہ پڑوسی کو حکم دیا کہ وہ خود ہی پردہ کا انتظام کرلے۔ [مصنف ابن ابي شيبه/كتاب البيوع والأقضية/حدیث: 24520]

نبی کریم صلی اللہ علیہ وسلم نے ارشاد فرمایا کہ: تم سے پہلی امت میں سے ایک شخص کا حساب و کتاب کیا گیا، اس کی کوئی نیکی نہ تھی سوائے اس کے کہ وہ مالدار شخص تھا اور لوگوں سے معاملات کرتا تھا، اور اُ س نے اپنے ماتحتوں سے کہا ہوا تھا کہ تنگ دست سے تجاوز (درگزر) کرلیا کرو، اس کو مہلت دے دیا کرو، اللہ تعالیٰ نے فرشتوں سے فرمایا: میں اِ س چیز کا زیادہ مستحق ہوں، تم لوگ اس سے چشم پوشی کرو۔ (اس کو چھوڑ دو) [مصنف ابن ابي شيبه/كتاب البيوع والأقضية/حدیث: 24521]

نبی کریم صلی اللہ علیہ وسلم نے ارشاد فرمایا: جو شخص مقروض کو مہلت دے یا اس کو معاف کر دے، وہ شخص قیامت کے دن اللہ کے عرش کے سایہ میں ہوگا۔ [مصنف ابن ابي شيبه/كتاب البيوع والأقضية/حدیث: 24522]

نبی کریم صلی اللہ علیہ وسلم نے ارشاد فرمایا: جو شخص اللہ کی راہ میں مجاہد کی مدد کرے، یا مقروض کی اس کی تنگی میں مدد کرے، یا مکاتب کی آزادی میں مدد دے، اللہ تعالیٰ اس کو اس دن اپنا سایہ عطاء فرمائے گا جس دن اس کے سایہ کے علاوہ کوئی اور سایہ نہ ہوگا۔ [مصنف ابن ابي شيبه/كتاب البيوع والأقضية/حدیث: 24523]

حضرت عقبہ بن عمرو نے حضرت حذیفہ رضی اللہ عنہ سے فرمایا کہ آنحضرت صلی اللہ علیہ وسلم سے سنی ہوئی کوئی حدیث بیان فرما دیں، حضرت حذیفہ رضی اللہ عنہ نے فرمایا کہ میں نے رسول اکرم صلی اللہ علیہ وسلم سے سنا آپ صلی اللہ علیہ وسلم نے فرمایا: تم سے پہلی امتوں میں فرشتہ ایک شخص کی روح قبض کرنے آیا تو اس نے آدمی سے سوال کیا کہ تیرا کوئی نیک عمل ہے؟ اس نے کہا میں نہیں جانتا، اس سے کہا، غور کر، اس نے کہا کہ مجھے سوائے اس عمل کے اور کچھ نہیں معلوم کہ میں دنیا میں لوگوں کے ساتھ معاملات کرتا تھا، میں غریب کو مہلت اور امیر سے نرمی اور چشم پوشی کا معاملہ کرتا تھا، اللہ تعالیٰ نے اس کو جنت میں داخل فرما دیا۔
حضرت عقبہ رضی اللہ عنہ نے فرمایا: اور میں نے بھی آپ صلی اللہ علیہ وسلم کو یہ فرماتے ہوئے سنا۔ [مصنف ابن ابي شيبه/كتاب البيوع والأقضية/حدیث: 24524]

نبی کریم صلی اللہ علیہ وسلم نے ارشاد فرمایا: اپنا حق شائستگی اور پاکیزگی کے ساتھ وصول کرو، پورا ملے یا نہ ملے۔ [مصنف ابن ابي شيبه/كتاب البيوع والأقضية/حدیث: 24525]