حضرت خریم سے مروی ہے کہ آنحضرت صلی اللہ علیہ وسلم نے صبح کی نماز ادا فرمائی پھر جب آپ صلی اللہ علیہ وسلم فارغ ہوئے تو کھڑے ہوئے اور فرمایا: جھوٹی گواہی اللہ تعالیٰ کے ساتھ شرک کے برابر ہے، آپ صلی اللہ علیہ وسلم نے یہ بات تین مرتبہ فرمائی پھر آپ صلی اللہ علیہ وسلم نے یہ آیت تلاوت فرمائی: { وَاجْتَنِبُوا قَوْلَ الزُّورِ حُنَفَائَ لِلَّہِ غَیْرَ مُشْرِکِینَ بِہِ }۔ [مصنف ابن ابي شيبه/كتاب البيوع والأقضية/حدیث: 24546]

حضرت عمر بن خطاب رضی اللہ عنہ فرماتے ہیں کہ خبردار ہرگز کسی شخص کو اسلام میں جھوٹے گواہوں کے ذریعہ قید نہ کیا جائے، بیشک ہم صرف عادلوں کی گواہی قبول کرتے ہیں۔ [مصنف ابن ابي شيبه/كتاب البيوع والأقضية/حدیث: 24547]

حضرت ابن الحنیفہ فرماتے ہیں کہ { وَلاَ تَقْفُ مَا لَیْسَ لَکَ بِہِ عِلْمٌ} سے مراد جھوٹی گواہی ہے۔ [مصنف ابن ابي شيبه/كتاب البيوع والأقضية/حدیث: 24548]

حضرت وائل بن ربیعہ فرماتے ہیں کہ جھوٹی گواہی اللہ تعالیٰ کے ساتھ شرک کے برابر ہے، پھر ان میں سے ایک نے یہ والی آیت تلاوت فرمائی: { وَالَّذِینَ لاَ یَشْہَدُونَ الزُّورَ } اور دوسرے نے یہ والی آیت تلاوت فرمائی: { وَاجْتَنِبُوا قَوْلَ الزُّورِ }۔ [مصنف ابن ابي شيبه/كتاب البيوع والأقضية/حدیث: 24549]

حضرت عبد اللہ بن عامر بن ربیعہ فرماتے ہیں کہ میں نے حضرت عمر بن خطاب رضی اللہ عنہ کو دیکھا کہ انہوں نے جھوٹے گواہ کو شام کے وقت ایک ازار میں کھڑا کیا ہوا تھا، وہ اپنے آپ کو کرید رہا تھا۔ [مصنف ابن ابي شيبه/كتاب البيوع والأقضية/حدیث: 24550]

حضرت شریح رحمہ اللہ جھوٹے گواہ کو اس کی قوم کی مسجد یا اس کے بازار میں بھیج کر یہ اعلان کرواتے کہ: ہم نے اس کی گواہی کو رد کردیا ہے (یہ جھوٹا ہے)۔ [مصنف ابن ابي شيبه/كتاب البيوع والأقضية/حدیث: 24551]

حضرت ابو حصین رحمہ اللہ فرماتے ہیں کہ حضرت قاسم رحمہ اللہ میرے پاس تشریف فرما تھے، فرمایا: حضرت شریح جب جھوٹے گواہ کو پکڑتے تو اس کے ساتھ کیا معاملہ فرماتے، میں نے عرض کیا: اس کا نام اپنے پاس لکھ دیتے اور پھر اگر وہ عرب میں سے ہوتا تو اس کو اس کی قوم کی مسجد بھیج دیتے، اور اگر وہ موالی میں سے ہوتا تو اس کو اس کے بازار میں بھیج دیتے اس کے متعلق لوگوں کو بتاتے۔ [مصنف ابن ابي شيبه/كتاب البيوع والأقضية/حدیث: 24552]

حضرت جعد فرماتے ہیں کہ میں حضرت شریح کے پاس موجود تھا، آپ نے جھوٹے گواہ کے سر سے عمامہ اتروا کر اس کو چند ضربیں (خفقات) لگوائیں۔ [مصنف ابن ابي شيبه/كتاب البيوع والأقضية/حدیث: 24553]

حضرت عبد الکریم الجزری رحمہ اللہ سے مروی ہے کہ حضرت عمر بن عبد العزیز کے پاس کچھ لوگوں نے رمضان کے چاند کی گواہی دی، آپ نے ان کو متہم سمجھا اور ان سب کو ستر ستر کوڑے مارے اور ان کی شہادت کو باطل قرار دیا۔ [مصنف ابن ابي شيبه/كتاب البيوع والأقضية/حدیث: 24554]

حضرت زہری رحمہ اللہ فرماتے ہیں کہ جھوٹے گواہ کی تعزیر کی جائے گی۔ [مصنف ابن ابي شيبه/كتاب البيوع والأقضية/حدیث: 24555]