حضرت ابن سیرین فرماتے ہیں کہ ایک درع کو کئی ادراع کے بدلے فروخت کیا جاتا تھا۔ [مصنف ابن ابي شيبه/كتاب البيوع والأقضية/حدیث: 24706]

حضرت ابراہیم اور حضرت شعبی اس شخص کے متعلق فرماتے ہیں جس کے پاس ایک گواہ کے ساتھ قسم ہو، فرمایا: اس کے لئے جائز نہیں مگر دو مرد گواہی دیں یا پھر ایک مر د اور دو عورتیں گواہی دیں۔ [مصنف ابن ابي شيبه/كتاب البيوع والأقضية/حدیث: 24707]

حضرت عامر رحمہ اللہ نے فرمایا: کہ باوجودیکہ مدینہ والے کہتے ہیں کہ ایک گواہ کی گواہی طالب کی قسم کے ساتھ قبول ہے۔ [مصنف ابن ابي شيبه/كتاب البيوع والأقضية/حدیث: 24708]

حضرت زہری فرماتے ہیں کہ یہ بدعت ہے، اور سب سے پہلے حضرت معاویہ رضی اللہ عنہ نے یہ فیصلہ کیا۔ [مصنف ابن ابي شيبه/كتاب البيوع والأقضية/حدیث: 24709]

حضرت عبد اللہ بن جعفر رضی اللہ عنہ سے مروی ہے کہ حضرت علی رضی اللہ عنہ جھگڑے میں حاضر نہیں ہوتے تھے اور فرماتے تھے کہ اس میں بہت سی ہلاکت خیز باتیں ہیں جن میں شیطان حاضر ہوتا ہے، پھر آپ نے اپنے جھگڑے حضرت عقیل کے سپرد کردیے، پھر جب وہ بوڑھے اور کمزور ہوگئے تو آپ نے ان کو میری طرف پھیر دیا، حضرت علی رضی اللہ عنہ فرماتے تھے جو فیصلہ میرے وکیل کے لئے گیا ہے وہی میرے لئے ہے، اور جو فیصلہ میرے وکیل پر کیا گیا ہے وہ مجھ پر ہے۔ [مصنف ابن ابي شيبه/كتاب البيوع والأقضية/حدیث: 24710]

حضرت شریح فرماتے ہیں کہ مسلمان کے ذمہ یہ لازم ہے اگرچہ شرط نہ بھی لگائے، مبیع میں بیماری نہ ہو، وہ چوری شدہ نہ ہو، وہ مال حرام نہ ہو اور اس میں کوئی بھونڈا عیب نہ ہو۔ [مصنف ابن ابي شيبه/كتاب البيوع والأقضية/حدیث: 24711]

ایک شخص نے حضرت عامر سے دریافت کیا میں نے گھوڑا خریدا اور پھر اس کی قیمت بھی نقد ادا کردی اور ایک شخص کو اس میں شریک بھی کرلیا۔ پھر وہ گھوڑا ہلاک ہوگیا، فرمایا اپنے گھوڑے کے نقصان پر اللہ سے ثواب کی امید رکھو۔ [مصنف ابن ابي شيبه/كتاب البيوع والأقضية/حدیث: 24712]

حضرت ابن عباس رضی اللہ عنہما سے مروی ہے کہ جو شخص کسی کا حق ادا کرنے کے لئے اس کی طرف چلے تو اس کو ہر قدم پر ایک نیکی ملتی ہے۔ [مصنف ابن ابي شيبه/كتاب البيوع والأقضية/حدیث: 24713]

حضرت عبد اللہ بن شدّاد سے مروی ہے کہ ایک مرتبہ حضرت حسین بن علی رضی اللہ عنہ ایک چرواہے کے پاس سے گذرے جو بکریاں چرا رہا تھا، وہ آپ کے پاس ایک بکری لے کر آیا وہ آپ کو ہدیہ کی ِ حضرت حسین نے دریافت کیا: تو آزاد ہے یا غلام؟ اس نے کہا کہ میں غلام ہوں، آپ نے بکری اس کو لٹا دی، چرواہے نے کہا کہ یہ میری ملکیت ہے، تو آپ نے اس سے قبول فرما لی، پھر حضرت حسین رضی اللہ عنہ نے اس غلام کو اور اس کی بکریوں کو خریدا، اور اس غلام کو آزاد کر کے وہ بکریاں سب اس کو عطاء کردیں۔ [مصنف ابن ابي شيبه/كتاب البيوع والأقضية/حدیث: 24714]

حضرت شریح کو جب گواہ پر شبہ ہوتا تو اس سے کسی چیز کے متعلق سوال نہ کرتے یہاں تک کہ وہ کھڑا ہوجاتا۔ [مصنف ابن ابي شيبه/كتاب البيوع والأقضية/حدیث: 24715]