حضرت حارث سے مروی ہے کہ جب گھر کسی ایک آدمی کا مخصوص قطعہ زمین (خطہ) ہو اور لوگ اس کو تقسیم کرنا چاہیں تو وہ میراث کے مطابق تقسیم ہوگا، یعنی صاحب الخطۃ میت کی میراث کے مطابق۔ پھر اگر ورثاء میں سے یا ان کے علاوہ کوئی شخص میراث میں ملنے والے حصے سے زیادہ کا دعویٰ کرے تو اس پر اپنے دعوے کے گواہ لانا لازم ہے کہ فلاں نے اس پر صدقہ کیا ہے یا مجھے ہبہ کیا ہے یا مجھے اتنے میں فروخت کیا ہے۔ اور اگر میت کی اولاد میں سے کسی کی بیوی یا شوہر مطالبہ کرے تو اس کو اس بات پر گواہی کا مکلف بنایا جائے گا کہ فلاں شخص فلاں کا وارث بنا ہے یا فلاں خاتون فلاں کی وارث بنی ہے، یا صاحب الخطۃ اس خاتون سے پہلے فوت ہوا تھا یا وہ اس سے پہلے اور اسی کے مطابق وراثت منتقل ہوئی، تو پھر وہ اپنا حق وصول کرے گا۔ اور اگر صاحب الخطۃ کی اولاد میں سے کوئی شخص اس میں دعویٰ کرے اور جن کے قبضے میں وہ ہے وہ اس کے حصے کا انکار کریں تو مدعی کے ذمہ اس بات پر گواہی ہے کہ فلاں فلاں سے پہلے فوت ہوگیا تھا اور فلاں اس کا وارث بنا تھا، اور اس کے بعد میں اس کا وارث بنا ہوں۔ اور اگر ورثاء اس بات کا اقرار کرلیں کہ گھر کے مالک کی ایک بیوی تھی اور اس خاتون کے گھر والے اس کے حصے کا دعویٰ کریں تو وہ ان پر ثابت ہوگا، اور اگر وہ یوں کہیں کہ اس نے موت سے قبل اس کو طلاق دے دی تھی تو پھر ان پر اس بات کی گواہی لازم ہے کہ وہ اس کو طلاق دے چکا تھا، وگرنہ اس خاتون کے لئے میراث لازم ہوجائے گی۔ اور اگر گھر خریدا ہوا ہو اور وہ کچھ لوگوں کے قبضہ میں ہو تو وہ انہی کا ہوگا جن کے قبضہ میں وہ ہے، اور اگر کوئی شخص اس میں دعویٰ کرے تو پھر اس کے ذمہ اس بات پر گواہی لازم ہے کہ اس کا اس میں حق ہے۔ [مصنف ابن ابي شيبه/كتاب البيوع والأقضية/حدیث: 24666]

حضرت عامر فرماتے ہیں کہ لوگوں نے جو نئی باتیں نکالی ہیں ان میں مجھے سب سے عجیب ان کی یہ بات لگتی ہے کہ وہ یوں کہتے ہیں: وہ گواہی دے کہ یہ آج اسی کا ہے۔ [مصنف ابن ابي شيبه/كتاب البيوع والأقضية/حدیث: 24667]

حضرت حارث اور حضرت حماد رحمہ اللہ فرماتے ہیں کہ اگر ایک شخص دوسرے سے یوں کہے کہ تو گھر کے دروازے کی طرف جا تجھے پانچ سو درہم دوں گا، فرمایا: اس کے لئے یہی ہوگا۔ [مصنف ابن ابي شيبه/كتاب البيوع والأقضية/حدیث: 24668]

ابراہیم اور حضرت شعبی رحمہ اللہ اس شخص کے متعلق فرماتے ہیں جس کو تقسیم میں دھوکہ سے ولد زانی مل گیا۔ اس نے اسے آزاد کیا تو بعد میں پتہ چلا کہ وہ ولد زانی تھا۔ انہوں نے جواب دیا کہ آزادی واقع ہوجائے گی اور جس شخص نے دھوکہ دیا ہے اس کے مال سے آزاد ہوگا اور ولاء اس کے لیے ہوگی۔ [مصنف ابن ابي شيبه/كتاب البيوع والأقضية/حدیث: 24669]

حضرت ایاس بن معاویہ اس شخص کے متعلق فرماتے ہیں جو کسی شخص سے کسی چیز کا ریٹ لگا رہا تھا، ایک دوسرا شخص آیا اور اس نے بھی قیمت لگانے کا ارادہ کیا، سابقہ قیمت لگانے والے نے اس کو اشارے سے منع کردیا۔ تو حضرت عمر بن خطاب رضی اللہ عنہ کی رائے ہے کہ یہ شرکت ہے۔ [مصنف ابن ابي شيبه/كتاب البيوع والأقضية/حدیث: 24670]

محمد رحمہ اللہ سے مروی ہے کہ ایک شخص نے اپنا غلام فروخت کیا۔ اس کے بالوں کے کنارے پر داغنے کا نشان تھا لیکن اس نے اس عیب کو چھپایا۔ جب گاہک کو عیب کا علم ہوا تو وہ مقدمہ لے کر حضرت شریح کے پاس آیا۔ حضرت شریح نے فرمایا کہ تم نے عیب کو چھپایا اور ڈھانپا۔ چنانچہ آپ نے اس بیع کو نافذ نہ کیا اور غلام واپس کرنے کا حکم دیا۔ [مصنف ابن ابي شيبه/كتاب البيوع والأقضية/حدیث: 24671]

حضرت عمرو سے مروی ہے کہ میں نے حضرت عطاء سے دریافت کیا کہ میں ہزار درہم کے بدلے میں کوئی چیز خریدتا ہوں لیکن بیع کا عقد طے ہونے سے پہلے کہہ دیتا ہوں کہ میں سو دینار دوں گا۔ کیا درست ہے؟ فرمایا: کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 24672]

حضرت ابوہریرہ رضی اللہ عنہ سے مروی ہے کہ آنحضرت صلی اللہ علیہ وسلم نے ارشاد فرمایا: جس نے ہمیں دھوکا دیا وہ ہم میں سے نہیں۔ [مصنف ابن ابي شيبه/كتاب البيوع والأقضية/حدیث: 24673]

حسن اور محمد رحمہ اللہ فرماتے ہیں کہ دھوکا دینا حرام ہے۔ [مصنف ابن ابي شيبه/كتاب البيوع والأقضية/حدیث: 24674]

حضرت ابو بردہ سے مروی ہے کہ آنحضرت صلی اللہ علیہ وسلم نے ارشاد فرمایا: جو ہمیں دھوکا دے وہ ہم میں سے نہیں ہے۔ [مصنف ابن ابي شيبه/كتاب البيوع والأقضية/حدیث: 24675]