حضرت عبد اللہ بن رفاعہ سے مروی ہے کہ ایک شخص کو کہا گیا، تو فلاں باندی کو خریدنے کا ارادہ کر رہا ہے، اس شخص نے کہا: اگر میں نے اس کو خرید لیا تو وہ آزاد ہے، حضرت عبد اللہ کا بیان ہے کہ انہوں نے حضرت سعید بن المسیب سے دریافت کیا، آپ نے فرمایا: میں تو بہر حال اس کو کچھ نہیں سمجھتا، اور حضرت عمر بن عبد العزیز اس کا انکار فرماتے۔ [مصنف ابن ابي شيبه/كتاب البيوع والأقضية/حدیث: 24886]

حضرت قاسم اور حضرت سالم طلاق اور عتاق میں کسی کو رخصت نہ دیتے تھے۔ [مصنف ابن ابي شيبه/كتاب البيوع والأقضية/حدیث: 24887]

حسن اس شخص کے متعلق فرماتے ہیں کہ جو یوں کہے کہ اگر میں نے فلاں باندی کو خریدا تو وہ آزاد، یا یوں کہے کہ ہر وہ باندی جو تجھ پر خریدوں وہ آزاد، تو اگر وہ اس سے کچھ خریدے تو وہ آزاد ہوجائے گا۔ [مصنف ابن ابي شيبه/كتاب البيوع والأقضية/حدیث: 24888]

حضرت مغیرہ فرماتے ہیں کہ ایک شخص نے اپنے غلام سے کہا کہ تو اللہ کے لئے ہے، حضرت شعبی، حضرت المسیب بن رافع، حضرت حماد بن ابو سلیمان سے اس کے متعلق دریافت کیا گیا؟ سب نے فرمایا وہ آزاد ہے۔ [مصنف ابن ابي شيبه/كتاب البيوع والأقضية/حدیث: 24889]

ابراہیم فرماتے ہیں کہ اگر کوئی شخص اپنے غلام یا باندی سے یوں کہے کہ تو آزاد شدہ ہے، تو آزاد ہے، یا تو اللہ کے لئے ہے تو ان سب صورتوں میں وہ آزاد شمار ہوگا۔ اور اگر یوں کہا: تو میرے بیٹوں کا مولیٰ ہے تو بھی وہ آزاد شمار ہوگا۔ [مصنف ابن ابي شيبه/كتاب البيوع والأقضية/حدیث: 24890]

حضرت عمیر سے مروی ہے کہ ایک غلام کو اس کے آقا نے سلائی کی اجازت دی ہوئی تھی اور ایک غلام کو رنگنے کی، حضرت شریح نے دونوں کو ضامن بنایا، درزی کو دھاگوں اور سوئیوں کی قیمت کا ضامن بنایا، اور دوسرے کو رنگ اور اس کے ابالنے کا ضامن بنایا، اور جو کچھ ان کاموں کے مشابہ ہو۔ [مصنف ابن ابي شيبه/كتاب البيوع والأقضية/حدیث: 24891]

حضرت ابن سیرین فرماتے ہیں کہ اگر غلام کو کسی بھی قسم کے کاروبار کی اجازت مل جائے اور وہ اس قسم کے علاوہ دوسری قسم میں تجارت کرے تو اس پر دین نہیں ہے۔ [مصنف ابن ابي شيبه/كتاب البيوع والأقضية/حدیث: 24892]

حضرت حسن بن صالح فرماتے ہیں کہ اگر غلام کو صرف ایک قسم میں کام کی اجازت دی جائے تو اس کو اجازت مل گئی۔ [مصنف ابن ابي شيبه/كتاب البيوع والأقضية/حدیث: 24893]

حضرت ابن سیرین رحمہ اللہ فرماتے ہیں شفعہ میں وراثت نہیں چلے گی۔ [مصنف ابن ابي شيبه/كتاب البيوع والأقضية/حدیث: 24894]

حضرت شعبی رحمہ اللہ فرماتے ہیں کہ شفعہ میں وراثت نہیں چلے گی۔ [مصنف ابن ابي شيبه/كتاب البيوع والأقضية/حدیث: 24895]