حضرت ابن عباس رضی اللہ عنہما فرماتے ہیں کہ دونوں شریک باہمی تصفیہ کر کے ایک دوسرے سے الگ ہوجائیں گے۔ [مصنف ابن ابي شيبه/كتاب البيوع والأقضية/حدیث: 24916]

حضرت عیسیٰ بن موسیٰ سے مروی ہے کہ ایک شخص نے حضرت حکم سے دریافت کیا کہ ایک مکاتب غلام دو شخصوں کے درمیان مشترک تھا ان میں سے ایک نے اس کو آزاد کردیا؟ فرمایا: بیشک وہ تو ایک مال ہے جو اس کو ہبہ کیا گیا ہے، اس پر کچھ بھی لازم نہیں ہے۔ [مصنف ابن ابي شيبه/كتاب البيوع والأقضية/حدیث: 24917]

حضرت زہری اس میں کوئی حرج نہیں سمجھتے تھے کہ اس طور پر کرایہ پر لے کہ اس کو دراہم نہ دے۔ (صرف کھانا دے دے) [مصنف ابن ابي شيبه/كتاب البيوع والأقضية/حدیث: 24918]

حضرت شباک سے مروی ہے کہ ایک شخص اپنی بہن سے اس کے زیور کے متعلق جھگڑا کرتے ہوئے حضرت شریح کے پاس آیا، اور کہا کہ یہ میرے والد کی میراث میں سے ہے، آپ اس سے پوچھیں کہ اس کے پاس اس بات پر گواہ ہیں کہ یہ زیور اس کا ہے؟ حضرت شریح نے فرمایا نہیں بلکہ میں آپ سے گواہ مانگوں گا آپ اس بات پر گواہ پیش کرو کہ یہ تمہارے والد کا ہے۔ [مصنف ابن ابي شيبه/كتاب البيوع والأقضية/حدیث: 24919]

حضرت عطاء سے دریافت کیا گیا کہ کوئی شخص ایک سال کے طعام کی اجرت پر مزدور لے اور ایک سال اتنے اتنے خراج پر تو کیسا ہے؟ فرمایا کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 24920]

حضرت ابن جریج فرماتے ہیں کہ میں نے حضرت عطاء سے دریافت کیا کہ میں اپنے غلام کو اس شرط پر اجرت پر دیتا ہوں کہ ایک سال میں اسے کھانا دوں گا اور ایک سال وہ (اجرت پر لینے والا) کھانا دے گا، اور تیسرے سال اتنے اتنے خراج کے ساتھ؟ فرمایا کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 24921]

حضرت حماد اس کو ناپسند فرماتے تھے کہ آدمی کو طعام کے بدلے اجرت پر لیا جائے۔ [مصنف ابن ابي شيبه/كتاب البيوع والأقضية/حدیث: 24922]

حضرت ابوہریرہ رضی اللہ عنہ ارشاد فرماتے ہیں کہ: میں بسرہ بنت صفوان کا اپنے کھانے اور سواری پر باری کے عوض مزدور تھا۔ [مصنف ابن ابي شيبه/كتاب البيوع والأقضية/حدیث: 24923]

حضرت عمران بن حصین سے مروی ہے کہ ایک شخص کے چھ غلام تھے، اس نے موت کے وقت ان سب کو آزاد کردیا، نبی کریم صلی اللہ علیہ وسلم نے ان غلاموں کے درمیان قرعہ اندازی فرمائی اور دو کو آزاد کردیا اور چار کو غلام باقی رکھا۔ [مصنف ابن ابي شيبه/كتاب البيوع والأقضية/حدیث: 24924]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے قرعہ ڈالا۔ [مصنف ابن ابي شيبه/كتاب البيوع والأقضية/حدیث: 24925]