حضرت عبد اللہ بن نجی سے روایت ہے کہ حضرت حذیفہ رضی اللہ عنہ نے پانی مانگا پس ایک دہقان ان کے پاس شراب پینے میں استعمال ہونے والا برتن لایا جس میں شراب تھی۔ تو آپ نے اس کو دھو لیا اور اس میں پانی پی لیا۔ [مصنف ابن ابي شيبه/كتاب الأطعمة/حدیث: 25976]

حضرت ابن عون، حضرت ابن سیرین سے روایت کرتے ہیں، وہ فرماتے ہیں کہ لوگ کفار کے برتنوں (کے استعمال) کو ناپسند کرتے تھے۔ لیکن اگر انہیں اس سے کوئی چارہ نہ ہوتا تو وہ ان برتنوں کو دھو لیتے اور ان میں پکا لیتے۔ [مصنف ابن ابي شيبه/كتاب الأطعمة/حدیث: 25977]

حضرت حسن سے روایت ہے، وہ کہتے ہیں کہ جب تمہیں مجوسیوں کے برتن اور ہانڈیوں کی ضرورت پیش آئے۔ تو تم ان کو دھو لو اور ان میں پکا لو۔ [مصنف ابن ابي شيبه/كتاب الأطعمة/حدیث: 25978]

حضرت عمر بن الولید شنی سے روایت ہے، وہ کہتے ہیں کہ میں نے حضرت سعید بن جبیر سے پوچھا۔ مجوسیوں کی ہانڈیوں کے بارے میں؟ تو انہوں نے کہا۔ تم ان کو دھو لو اور ان میں پکا لو۔ [مصنف ابن ابي شيبه/كتاب الأطعمة/حدیث: 25979]

حضرت میمونہ سے روایت ہے کہ جناب رسول اللہ صلی اللہ علیہ وآلہ وسلم سے دریافت کیا گیا کہ ایک چوہا گھی میں گرگیا اور مرگیا؟ تو آپ صلی اللہ علیہ وآلہ وسلم نے فرمایا: ”چوہے کو اور اس کے اردگرد کو نکال پھینکو اور بقیہ کو کھالو۔“ [مصنف ابن ابي شيبه/كتاب الأطعمة/حدیث: 25980]

حضرت ابوہریرہ سے روایت ہے کہ جناب رسول اللہ صلی اللہ علیہ وآلہ وسلم سے دریافت کیا گیا کہ ایک چوہا گھی میں مرگیا ہے؟ حضرت ابوہریرہ کہتے ہیں۔ پس آپ صلی اللہ علیہ وآلہ وسلم نے حکم دیا کہ چوہا اور اس کے ارد گرد گھی کو نکال کر پھینک دیا جائے۔ [مصنف ابن ابي شيبه/كتاب الأطعمة/حدیث: 25981]

حضرت میسرہ، حضرت علی رضی اللہ عنہ سے گھی میں گرنے والے چوہے کے بارے میں روایت کرتے ہیں کہ آپ نے فرمایا: اگر گھی پگھلا ہوا ہو تو گھی گرا دو۔ اور اگر گھی منجمد ہے تو پھر چوہے کو اور اس کے ارد گرد گھی کو نکال کر پھینک دو اور بقیہ گھی کھالو۔ [مصنف ابن ابي شيبه/كتاب الأطعمة/حدیث: 25982]

حضرت ابن سیرین سے روایت ہے کہ حضرت اشعری سے اس گھی کے بارے میں سوال کیا گیا جس میں چھپکلی مرچکی تھی؟ تو انہوں نے فرمایا: اس کو کسی طرح بیچ دو لیکن یہ کسی مسلمان کو نہ بیچنا۔ [مصنف ابن ابي شيبه/كتاب الأطعمة/حدیث: 25983]

حضرت نافع سے روایت ہے کہ ایک بڑا چوہا، حضرت ابن عمر رضی اللہ عنہما کے گھر والوں کی ہانڈی میں گرگیا تھا پس اس کے بارے میں سوال گیا گیا؟ تو انہوں نے فرمایا: تم اس کے ذریعہ نفع حاصل کرو اور اس کے ذریعہ چمڑے کو روغن لگا لو۔ [مصنف ابن ابي شيبه/كتاب الأطعمة/حدیث: 25984]

حضرت صفیہ بنت ابی عبید سے روایت ہے کہ حضرت ابن عمر رضی اللہ عنہما کے گھر والوں کا ایک گھڑا تھا جس میں بیس فرق (خاص پیمانہ ہے) یا اس سے زیادہ گھی تھا۔ اس میں ایک چوہا گر کر مرگیا تو حضرت ابن عمر رضی اللہ عنہما نے گھر والوں کو حکم دیا کہ اس گھی سے چراغ جلا لیں۔ [مصنف ابن ابي شيبه/كتاب الأطعمة/حدیث: 25985]