حضرت معاویہ بن قرہ، اپنے والد سے روایت کرتے ہیں وہ کہتے ہیں کہ میں جناب نبی کریم صلی اللہ علیہ وآلہ وسلم کی خدمت میں حاضر ہوا اور میں نے آپ صلی اللہ علیہ وآلہ وسلم سے بیعت کی اور (اس وقت) آپ صلی اللہ علیہ وآلہ وسلم کی قمیص مبارک کھلی ہوئی تھی (یعنی بٹن کھلے تھے)۔ [مصنف ابن ابي شيبه/كتاب اللباس/حدیث: 26410]

حضرت عروہ کہتے ہیں کہ میں نے حضرت معاویہ اور ان کے بیٹے کو سردی اور گرمی میں ہمیشہ بٹن کھلے ہونے کی حالت میں ہی دیکھا۔ [مصنف ابن ابي شيبه/كتاب اللباس/حدیث: 26411]

حضرت عبد اللہ بن یزید سے روایت ہے وہ کہتے ہیں کہ میں نے حضرت سعید بن مسیب کو کبھی بھی بٹن بند کئے ہوئے نہیں دیکھا۔ [مصنف ابن ابي شيبه/كتاب اللباس/حدیث: 26412]

حضرت اسامہ سے روایت ہے وہ کہتے ہیں کہ میں نے کبھی حضرت سالم کو بٹن لگائے ہوئے نہیں دیکھا۔ [مصنف ابن ابي شيبه/كتاب اللباس/حدیث: 26413]

حضرت فطر سے روایت ہے وہ کہتے ہیں کہ میں نے حضرت سالم کو بٹن کھولے ہوئے دیکھا۔ [مصنف ابن ابي شيبه/كتاب اللباس/حدیث: 26414]

حضرت ربیع بن منذر، اپنے والد سے روایت کرتے ہیں کہ انہوں نے حضرت محمدابن حنفیہ پر ایک دھاری دار یمنی چادر دیکھی جس کے بٹن کھلے ہوئے تھے اور حضرت محمد ابن حنفیہ کے پاس ایک خز کی ٹوپی بھی تھی۔ [مصنف ابن ابي شيبه/كتاب اللباس/حدیث: 26415]

حضرت ہلال بن میمون سے روایت ہے وہ کہتے ہیں کہ میں نے حضرت سعید ابن المسیب کو بٹن کھلے ہوئے نہیں دیکھا۔ [مصنف ابن ابي شيبه/كتاب اللباس/حدیث: 26416]

حضرت ابن مسعود سے روایت ہے کہ جناب نبی کریم صلی اللہ علیہ وآلہ وسلم نے ازار کو کھینچنے سے منع کیا ہے۔ [مصنف ابن ابي شيبه/كتاب اللباس/حدیث: 26417]

حضرت ابن عمر رضی اللہ عنہما سے روایت ہے وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”جو شخص تکبر کی وجہ سے اپنے کپڑے کو کھینچے گا تو قیامت کے دن اللہ تعالیٰ اس کی طرف نظر بھی نہیں کریں گے۔“ [مصنف ابن ابي شيبه/كتاب اللباس/حدیث: 26418]

حضرت ابن عمر رضی اللہ عنہما، جناب نبی کریم صلی اللہ علیہ وآلہ وسلم سے روایت کرتے ہیں کہ آپ نے فرمایا: ”جو شخص بوجہ تکبر اپنے کپڑے کو کھینچتا ہے تو اللہ تعالیٰ قیامت کے دن اس کی طرف نظر بھی نہیں کریں گے۔“ [مصنف ابن ابي شيبه/كتاب اللباس/حدیث: 26419]