حضرت ابو کبران سے روایت ہے وہ کہتے ہیں کہ میں نے ان پر بڑی آستین والا چمڑا لگا ہوا لباس دیکھا۔ [مصنف ابن ابي شيبه/كتاب اللباس/حدیث: 26370]

حضرت مجاہد سے روایت ہے وہ کہتے ہیں کہ حضرت ابن عمر رضی اللہ عنہما نے ایک آدمی پر چمڑا لگا ہوا لباس دیکھا تو اس کی نرمی انہیں اچھی لگی، انہوں نے فرمایا: اگر مجھے معلوم ہو کہ یہ ذبح شدہ جانور کی کھال کا ہے تو مجھے یہ بات خوشی دے گی کہ میرے پاس اس کا ایک کپڑا ہو۔ [مصنف ابن ابي شيبه/كتاب اللباس/حدیث: 26371]

حضرت ثابت سے روایت ہے وہ کہتے ہیں کہ میں حضرت عبد الرحمن بن ابی لیلیٰ کے پاس بیٹھا ہوا تھا کہ ان کے پاس ایک بھاری بھرکم آدمی آیا جس کی دو مینڈھیاں تھیں۔ اس نے ابن ابی لیلیٰ سے کہا: اے ابو عیسیٰ! انہوں نے کہا: جی ہاں۔ اس نے کہا: آپ نے چمڑا لگے لباس کے بارے میں جو بات سُن رکھی ہے وہ مجھے بیان کریں تو انہوں نے کہا میں نے اپنے والد کو کہتے سُنا ہے کہ میں جناب نبی کریم صلی اللہ علیہ وآلہ وسلم کی خدمت میں بیٹھا ہوا تھا۔ اس دوران آپ صلی اللہ علیہ وآلہ وسلم کے پاس ایک آدمی آیا اور اس نے پوچھا: یا رسول اللہ صلی اللہ علیہ وآلہ وسلم! میں چمڑا لگے کپڑے میں نماز پڑھ لوں؟ آپ صلی اللہ علیہ وآلہ وسلم نے فرمایا: ”دباغت کہاں گئی؟“ [مصنف ابن ابي شيبه/كتاب اللباس/حدیث: 26372]

حضرت محمد اور حضرت نافع سے روایت ہے کہ حضرت عائشہ رضی اللہ عنہا نے اپنے گھر والوں میں سے کسی کو فرمایا تھا کہ جب نماز پڑھو تو اپنے چمڑے والے کپڑے اتار دو۔ [مصنف ابن ابي شيبه/كتاب اللباس/حدیث: 26373]

حضرت ابن جبر سے روایت ہے۔ وہ کہتے ہیں کہ میں نے حضرت سعیدبن جُبیر پر بڑی بڑی آستین والا چمڑے کا کپڑا دیکھا۔ انہوں نے فرمایا: میں نے اس لباس کو صرف اس لیئے پہنا ہے تاکہ یہ میرے جسم پر نظر آئے یا فرمایا تاکہ مجھ سے اس لباس کے بارے میں پوچھا جائے۔ [مصنف ابن ابي شيبه/كتاب اللباس/حدیث: 26374]

حضرت قتادہ، حضرت سعید بن مسیب کے بارے میں روایت کرتے ہیں کہ انہوں نے مردار کی کھال سے بننے والے لباس کے بارے میں فرمایا: مجھے یہ بات پسند ہے کہ میرے پاس اس چمڑے سے بنا ہوا نرم لباس ہو اور میں اس کو پہنوں۔ [مصنف ابن ابي شيبه/كتاب اللباس/حدیث: 26375]

حضرت شعبی سے روایت ہے۔ وہ کہتے ہیں کہ میں حضرت ابو وائل کے ہمرا ہ باہر نکلا۔ یہاں تک کہ ہم چمڑے سے بنے ہوئے لباس بیچنے والوں کے پاس پہنچے۔ اور حضرت ابو وائل نے وہ لباس خریدا۔ لباس (بیچنے) والے نے کہا۔ اے ابو وائل! میں آپ کو مزید بتا دوں کہ یہ پاک (ذبح شدہ جانور کی کھال کا) ہے۔ حضرت ابو وائل نے کہا۔ جو بات تم نے کہی ہے اس کو ایک قیراط میں خریدنا بھی مجھے پسند نہیں ہے۔ [مصنف ابن ابي شيبه/كتاب اللباس/حدیث: 26376]

حضرت ابو حصین کہتے ہیں کہ ابراہیم بھی یہ کہا کرتے تھے۔ [مصنف ابن ابي شيبه/كتاب اللباس/حدیث: 26377]

اور حضرت سعید بن جُبیر بھی یہ بات کہا کرتے تھے۔ [مصنف ابن ابي شيبه/كتاب اللباس/حدیث: 26378]

حضرت ابن عباس رضی اللہ عنہما سے روایت ہے وہ کہتے ہیں کہ میں نے جناب نبی کریم صلی اللہ علیہ وآلہ وسلم کو کہتے ہوئے سُنا: ”جس کسی چمڑے کو بھی دباغت دی جائے تو وہ یقینا پاک ہوجاتا ہے۔“ [مصنف ابن ابي شيبه/كتاب اللباس/حدیث: 26379]