حضرت سماک حنفی فرماتے ہیں کہ حضرت ابن عباس رضی اللہ عنہما یوں کہنے کو کہ میں سست ہوں، مکروہ سمجھتے تھے۔ [مصنف ابن ابي شيبه/ كتاب الأدب/حدیث: 28204]

حضرت ابو راشد فرماتے ہیں کہ حضرت عبید بن عمیر کی بہن نے ان سے کسی آدمی کی سفارش کی۔ تو یوں کہا: بیشک معاملہ تو صرف اللہ کے اور آپ کے ہاتھ میں ہے۔ آپ کو غصہ آگیا اور فرمایا بیشک معاملہ تو صرف اللہ کے ہاتھ میں ہے۔ [مصنف ابن ابي شيبه/ كتاب الأدب/حدیث: 28205]

حضرت مختار فرماتے ہیں کہ میں نے حضرت عمر بن عبد العزیز کو سنا کہ وہ یوں کہنے کو مکروہ سمجھتے تھے کہ اے اللہ! تو ہم پر صدقہ فرما۔ لیکن یوں کہا کرتے: اے اللہ! ہم پر احسان فرما۔ [مصنف ابن ابي شيبه/ كتاب الأدب/حدیث: 28206]

حضرت ربیع بن زیاد فرماتے ہیں کہ حضرت کعب نے ارشاد فرمایا: کہ اللہ کی قسم! دنیا میں کسی بندے کی تعریف مستقل نہیں ہوتی یہاں تک کہ آسمان والوں میں بھی اس کی وہ تعریف قرار پکڑ لیتی ہے۔ [مصنف ابن ابي شيبه/ كتاب الأدب/حدیث: 28207]

حضرت عوام بن حوشب فرماتے ہیں کہ میری اور حضرت ایاس بن معاویہ کی ذات عرق مقام پر ملاقات ہوئی تو ہم نے حضرت ابراہیم تیمی کا ذکر کیا۔ حضرت ایاس فرمانے لگے: اگر ان کی میرے دل میں عزت نہ ہوتی تو میں ضرور ان کی تعریف کرتا میں نے پوچھا: کیا آپ انہں ی جانتے ہیں؟ انہوں نے کہا: جی ہاں! میں نے پوچھا: پھر آپ ان کی تعریف کرنے کو برا کیوں سمجھ رہے ہیں؟ انہوں نے فرمایا: اس لیے کہ یوں کہا جاتا ہے کہ تعریف کرنا اجرت دینے کے مترادف ہے۔ [مصنف ابن ابي شيبه/ كتاب الأدب/حدیث: 28208]

حضرت انس رضی اللہ عنہ فرماتے ہیں کہ مہاجرین نے فرمایا: یا رسول اللہ صلی اللہ علیہ وآلہ وسلم! جس قوم کے پاس ہم آئے ہیں ہم نے ان سے زیادہ اچھا کثرت سے خرچ کرنے والا اور تھوڑا ہونے کے باوجود غمخواری کرنے میں ان سے اچھا کسی کو نہیں دیکھا۔ انہوں نے ہمارا خرچہ برداشت کیا، اور ہمیں اپنی خوشیوں میں شریک کیا۔ ہمیں ڈر ہے کہ سارے کا سارا اجر یہ لوگ ہی لے جائیں گے۔ اس پر آپ صلی اللہ علیہ وآلہ وسلم نے ارشاد فرمایا: نہیں! ایسی بات نہیں، جب تک تم ان کی تعریف کرتے رہو اور اللہ سے ان کے حق میں دعا کرتے رہو۔ [مصنف ابن ابي شيبه/ كتاب الأدب/حدیث: 28209]

حضرت کردوس فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: بیشک دلوں کے لیے بھی بشاشت اور توجہ بھی ہوتی ہے، اور سستی اور اکتاہٹ بھی ہوتی ہے، تم لوگوں کو اس وقت تک بیان کرو جب تک وہ تمہاری طرف متوجہ رہیں۔ [مصنف ابن ابي شيبه/ كتاب الأدب/حدیث: 28210]

حضرت ابو السلیل فرماتے ہیں کہ ہمارے پاس نبی کریم صلی اللہ علیہ وآلہ وسلم کے ایک صحابی تشریف لائے تو لوگ ان کے پاس جمع ہوگئے۔ وہ گھر کی چھت پر چڑھے اور انہوں نے لوگوں کو حدیث بیان کی۔ [مصنف ابن ابي شيبه/ كتاب الأدب/حدیث: 28211]

حضرت ابو طلحہ فرماتے ہیں کہ حضرت انس بن مالک رضی اللہ عنہ کوفہ تشریف لائے تو ہم لوگ ان کے پاس جمع ہوگئے۔ ہم نے عرض کی کہ آپ ہمیں رسول اللہ صلی اللہ علیہ وآلہ وسلم سے سنی ہوئی کوئی حدیث بیان کریں۔ وہ فرما رہے تھے: اے لوگو! میرے پاس سے جاؤ، یہاں تک کہ ہم نے انہیں محل کی دیوار تک پہنچنے پر مجبور کردیا، پھر انہوں نے فرمایا: جو میں جانتا ہوں اگر وہ بات تم جان لیتے تو تم زیادہ روتے اور تھوڑا ہنستے۔ اے لوگو! میرے پاس سے چلے جاؤ تو ہم ان کے پاس سے واپس لوٹ آئے۔ [مصنف ابن ابي شيبه/ كتاب الأدب/حدیث: 28212]

حضرت ابو ہلال فرماتے ہیں کہ حسن بصری نے ارشاد فرمایا: تم لوگوں کو اس وقت تک بیان کرو جب تک وہ اپنے چہروں کے ساتھ تمہاری طرف متوجہ رہیں، اور جب وہ رخ پھیر لیں تو جان لو کہ ان کی کچھ ضرورتیں ہیں۔ [مصنف ابن ابي شيبه/ كتاب الأدب/حدیث: 28213]