حضرت ابو عثمان فرماتے ہیں کہ ایک آدمی حضرت سلمان کے پاس آیا اور کہنے لگا: بیشک فلاں آدمی نے آپ کو سلام کیا ہے۔ آپ نے پوچھا: کتنے دن پہلے؟ اس نے دن ذکر کیے آپ نے فرمایا: اگر تم ایسا نہ کرتے تو یہ امانت تھی جس کا ادا کرنا تمہارے لیے ضروری تھا۔ [مصنف ابن ابي شيبه/ كتاب الأدب/حدیث: 27364]

حضرت عبد الاعلیٰ فرماتے ہیں کہ حضرت ابن حنفیہ نے ایک آدمی کے بارے میں کہا کہ فلاں کو سلام کہہ دینا اور فرمایا: یہ امانت ہے مگر یہ کہ وہ شخص بھول جائے۔ [مصنف ابن ابي شيبه/ كتاب الأدب/حدیث: 27365]

حضرت عاصم فرماتے ہیں کہ میں نے حضرت ابومجلز سے پوچھا کہ ایک آدمی کا دوسرے آدمی کو یوں کہنا: کہ فلاں کو سلام کہہ دینا اور کوئی حرج نہیں۔ آپ نے فرمایا: یہ امانت ہوگی اور جب یوں کہے۔ میں تمہاری طرف سے سلام پہنچا دوں؟ آپ نے فرمایا: اس میں گنجائش ہوگی۔ [مصنف ابن ابي شيبه/ كتاب الأدب/حدیث: 27366]

حضرت ابو جری الہجیمی فرماتے ہیں کہ میں نبی کریم صلی اللہ علیہ وآلہ وسلم کے پاس آیا اور میں نے یوں کہا: علیک السلام، یا رسول اللہ صلی اللہ علیہ وآلہ وسلم! آپ صلی اللہ علیہ وآلہ وسلم نے فرمایا: علیک السلام، مت کہو۔ اس لیے کہ علیک السلام تو مردوں کا سلام ہے۔ [مصنف ابن ابي شيبه/ كتاب الأدب/حدیث: 27367]

حضرت قتادہ فرماتے ہیں کہ ایک آدمی نے نبی کریم صلی اللہ علیہ وآلہ وسلم پر یوں سلام کیا: علیک السلام یا نبی اللہ (صلی اللہ علیہ وآلہ وسلم)، تو نبی کریم صلی اللہ علیہ وآلہ وسلم نے اس کو ناپسند کیا اور ارشا دفرمایا: یہ تو مردوں کا سلام ہے۔ [مصنف ابن ابي شيبه/ كتاب الأدب/حدیث: 27368]

حضرت لیث فرماتے ہیں کہ حضرت طاؤس یوں سلام کرنے کو مکروہ سمجھتے تھے۔ علیکم السلام، فرماتے: بیشک یوں کہے، سلام علی المرسلین۔ [مصنف ابن ابي شيبه/ كتاب الأدب/حدیث: 27369]

حضرت نافع فرماتے ہیں کہ میں حضرت عبد اللہ بن ابی زکریا کے ساتھ روم کے علاقہ میں سفر کر رہا تھا کہ میری سواری کے جانور کو پیشاب آیا تو اس جانور نے کھڑے ہو کر پیشاب کیا، پھر میں دوبارہ آپ کے ساتھ جا ملا۔ آپ نے فرمایا: تم نے سلام کیوں نہیں کیا؟ میں نے عرض کیا: میں ابھی تو آپ سے جدا ہوا تھا۔ آپ نے فرمایا: اگرچہ ابھی تم مجھ سے جدا ہوئے۔ رسول اللہ صلی اللہ علیہ وآلہ وسلم کے صحابہ سفر کر رہے ہوتے تھے کہ ان کے درمیان درخت جدائی کردیتے تھے جب وہ دوبارہ اکٹھے ہوتے تو ان میں سے بعض بعض کو سلام کرتے تھے۔ [مصنف ابن ابي شيبه/ كتاب الأدب/حدیث: 27370]

حضرت مجاہد فرماتے ہیں کہ نبی کریم صلی اللہ علیہ وآلہ وسلم کے صحابہ میں سے دو آدمی اکٹھے سفر کر رہے تھے کہ ان کے درمیان کوئی درخت تفریق کردیتا پھر جب وہ دوبارہ ملتے تو ان میں سے ایک دوسرے پر سلام کرتا تھا۔ [مصنف ابن ابي شيبه/ كتاب الأدب/حدیث: 27371]

حضرت عمرو بن مرہ فرماتے ہیں کہ حضرت ابو البختری اور حضرت سعید بن جبیر، دونوں کو پیٹ کی تکلیف ہو رہی تھی، یہ دونوں واپس آتے، اور دوبارہ ایک دوسرے کو سلام کرتے۔ [مصنف ابن ابي شيبه/ كتاب الأدب/حدیث: 27372]

حضرت اعمش فرماتے ہیں کہ حضرت ابراہیم مجھ سے جدا نہیں ہوتے مگر سلام کر کے، میں آتا پھر میں جاتا تو وہ مجھے سلام کرتے، پھر میں آتا پھر میں جاتا تو وہ مجھے سلام کرتے۔ [مصنف ابن ابي شيبه/ كتاب الأدب/حدیث: 27373]