حضرت عمران بن حصین فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: حیا ساری کی ساری بھلائی ہے۔ [مصنف ابن ابي شيبه/ كتاب الأدب/حدیث: 26984]

حضرت میمون بن ابی شبیب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک اللہ حیا دار، بردبار، سفید پوش کو پسند فرماتے ہیں۔ اور فحش کلام کرنے والے، اور لوگوں سے چمٹ کر مانگنے والے کو مبغوض رکھتے ہیں۔ [مصنف ابن ابي شيبه/ كتاب الأدب/حدیث: 26985]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: حیاء ایمان میں سے ہے۔ اور ایمان جنت میں ہوگا۔ اور بد گوئی جفا میں سے ہے۔ اور جفا جہنم میں ہوگی۔ [مصنف ابن ابي شيبه/ كتاب الأدب/حدیث: 26986]

حضرت ابو سعید خدری فرماتے ہیں کہ رسول اللہ صلی اللہ علیہ وآلہ وسلم زیادہ حیا دار تھے باکرہ عورت سے اس کے پردے میں۔ اور جب آپ صلی اللہ علیہ وآلہ وسلم کسی چیز کو ناپسند سمجھتے تو ہم آپ صلی اللہ علیہ وآلہ وسلم کے چہرے میں اس کے اثرات پہچان لیتے۔ [مصنف ابن ابي شيبه/ كتاب الأدب/حدیث: 26987]

حضرت قیس فرماتے ہیں کہ حضرت عیینہ نبی کریم صلی اللہ علیہ وآلہ وسلم کے پاس اجازت لیے بغیر اندر آگئے۔ حضرت عائشہ رضی اللہ عنہا نے پوچھا: اے اللہ کے رسول (صلی اللہ علیہ وآلہ وسلم)! یہ کون شخص ہے؟ آپ صلی اللہ علیہ وآلہ وسلم نے فرمایا: یہ بیوقوف ہے جس کی قوم میں اطاعت کی جاتی ہے۔ پھر آپ صلی اللہ علیہ وآلہ وسلم کے پاس پینے کی کوئی چیز لائی گئی آپ صلی اللہ علیہ وآلہ وسلم نے پردہ کر کے اس کو نوش فرمایا، تو حضرت عائشہ رضی اللہ عنہا کہنے لگیں: یہ کیا ہے؟ اے اللہ کے رسول (صلی اللہ علیہ وآلہ وسلم)! آپ صلی اللہ علیہ وآلہ وسلم نے فرمایا: یہ حیا ان کے درمیان ایک خصلت ہے جو ان لوگوں کو عطا کی گئی ہے۔ اور تمہیں اس سے محروم رکھا گیا ہے۔ [مصنف ابن ابي شيبه/ كتاب الأدب/حدیث: 26988]

حضرت ابو مسعود فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: آخری بات جو لوگوں نے کلام نبوت سے حاصل کی وہ یہ ہے: جب تم حیا نہ کرو تو جو چاہے کرو۔ [مصنف ابن ابي شيبه/ كتاب الأدب/حدیث: 26989]

حضرت سعید بن مسیب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: حیا کا تھوڑا ہونا کفر ہے۔ [مصنف ابن ابي شيبه/ كتاب الأدب/حدیث: 26990]

حضرت سعید بن جبیر فرماتے ہیں کہ حضرت ابن عمر رضی اللہ عنہما نے ارشاد فرمایا: یقینا حیا اور ایمان دونوں اکھٹے ملے ہوئے ہیں، پس جب ان میں سے ایک اٹھتا ہے تو دوسرا بھی اٹھ جاتا ہے۔ [مصنف ابن ابي شيبه/ كتاب الأدب/حدیث: 26991]

حضرت حصین فرماتے ہیں کہ حضرت بکر نے ارشاد فرمایا: حیاء ایمان میں سے ہے اور ایمان جنت میں ہوگا۔ بد گوئی جفا میں سے ہے اور جفا جہنم میں ہوگی۔ [مصنف ابن ابي شيبه/ كتاب الأدب/حدیث: 26992]

حضرت سالم فرماتے ہیں کہ حضرت سعید بن جبیر کہ سورة آل عمران کی آیت میں سَیِّدًا سے مراد بردبار ہے۔ [مصنف ابن ابي شيبه/ كتاب الأدب/حدیث: 26993]