حضرت جریر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: اللہ اس شخص پر رحم نیں کرتا جو لوگوں پر رحم نہیں کرتا۔ [مصنف ابن ابي شيبه/ كتاب الأدب/حدیث: 27004]

حضرت ابو عبیدہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: تو زمین والوں پر رحم کر آسمان والا تجھ پر رحم کرے گا۔ [مصنف ابن ابي شيبه/ كتاب الأدب/حدیث: 27005]

حضرت ہشام بن عروہ فرماتے ہیں کہ ان کے والد حضرت عروہ نے ارشاد فرمایا: مجھے یہ بات پہنچی ہے کہ تورات میں لکھا ہوا ہے کہ جیسے تم رحم کرو گے تم پر رحم کیا جائے گا۔ [مصنف ابن ابي شيبه/ كتاب الأدب/حدیث: 27006]

حضرت اسامہ بن زید فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک اللہ اپنے رحم کرنے والے بندوں پر رحم کرتا ہے۔ [مصنف ابن ابي شيبه/ كتاب الأدب/حدیث: 27007]

حضرت جابر فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جو شخص رحم نہیں کرتا اس پر رحم نہیں کیا جاتا۔ [مصنف ابن ابي شيبه/ كتاب الأدب/حدیث: 27008]

حضرت ابو ایوب انصاری فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: کسی مسلمان کے لیے جائز نہیں کہ وہ اپنے بھائی سے تین دن سے زیادہ قطع تعلقی کرے۔ وہ دونوں آپس میں ملیں تو یہ اس سے اعراض کرے اور وہ اس سے اعراض کرے اور ان دونوں میں بہتر وہ ہے جو سلام میں پہل کرلے۔ [مصنف ابن ابي شيبه/ كتاب الأدب/حدیث: 27009]

حضرت سعد فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: کسی مسلمان کے لیے جائز نہیں کہ وہ اپنے بھائی سے تین دن سے زیادہ تک قطع تعلق کرے۔ [مصنف ابن ابي شيبه/ كتاب الأدب/حدیث: 27010]

حضرت ابو الاحوص فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: دو مسلمانوں کے درمیان تین دن سے زیادہ قطع تعلقی جائز نہیں۔ [مصنف ابن ابي شيبه/ كتاب الأدب/حدیث: 27011]

حضرت عامر بن یحییٰ معافری فرماتے ہیں کہ حضرت فضالہ بن عبید نے جو نبی کریم صلی اللہ علیہ وآلہ وسلم کے صحابی ہیں ارشاد فرمایا: جو شخص اپنے بھائی سے تین دن سے زائد قطع تعلقی کرتا ہے تو وہ جہنم میں ہوگا مگر یہ کہ اللہ اس کی اس بات کا تدارک توبہ کے ذریعہ فرما دے۔ [مصنف ابن ابي شيبه/ كتاب الأدب/حدیث: 27012]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: خبردار! تم آپس میں بغض مت رکھو، اور تم حسد مت کرو، اور نہ ایک دوسرے سے پیٹھ پھرو، اور اللہ کے بندو! بھائی بھائی بن جاؤ اور تم میں سے کوئی بھی اپنے بھائی سے تین دن سے زائد تک قطع تعلقی مت کرے۔ [مصنف ابن ابي شيبه/ كتاب الأدب/حدیث: 27013]