حضرت عبد اللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: رشتہ داری کو قیامت کے دن رکھا جائے گا اس حال میں کہ اس کے سر میں لوہا ہوگا جیسا کہ تکلہ کے سر میں لوہا ہوتا ہے اور یہ انتہا کی فصیح زبان سے بات کرے گی۔ پس یہ اس شخص کو جوڑے گی جو اسے جوڑتا ہے اور اس شخص کو کاٹے گی جو اسے توڑتا ہے۔ [مصنف ابن ابي شيبه/ كتاب الأدب/حدیث: 27034]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: رشتہ داری رحمن سے نکلی ہوئی ایک شاخ ہے یہ قیامت کے دن آئے گی اور کہے گی۔ اے پروردگار، مجھے توڑا گیا، اے پروردگار! مجھ پر ظلم کیا گیا، اے پروردگار! مجھ سے برا سلوک روا رکھا گیا۔ [مصنف ابن ابي شيبه/ كتاب الأدب/حدیث: 27035]

حضرت ام سلمہ فرماتی ہیں کہ رسول اللہ صلی اللہ علیہ وآلہ وسلم نے ارشاد فرمایا: رشتہ داری ایک شاخ ہے جو رحمن کے حجزہ (کمر بند) کو تھامے ہوئے اپنے حق کے بارے میں التجا کرتی ہے، پس وہ (رحمن) فرماتا ہے: کیا تو اس پر راضی نہیں کہ میں اس شخص کو جوڑوں جو تجھے جوڑے اور اس شخص کو کاٹ دوں جو تجھے توڑے؟ جو شخص تجھے جوڑتا ہے اس نے مجھے جوڑا، اور جو تجھے توڑتا ہے اس نے مجھے توڑا۔ [مصنف ابن ابي شيبه/ كتاب الأدب/حدیث: 27036]

حضرت عبد اللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک رشتہ داری اللہ کے عرش سے معلق ہے اور صلہ رحمی کرنے والا نہیں ہے جو برابری کا معاملہ کرتا ہے۔ لیکن صلہ رحمی کرنے والا تو وہ شخص ہے کہ جب کوئی اس سے رشتہ داری توڑتا ہے تو وہ اس سے جوڑتا ہے۔ [مصنف ابن ابي شيبه/ كتاب الأدب/حدیث: 27037]

حضرت دُرّۃ فرماتی ہیں کہ میں نے پوچھا: اے اللہ کے رسول (صلی اللہ علیہ وآلہ وسلم)! لوگوں میں سے سب سے زیادہ پرہیز گار کون شخص ہے؟ آپ صلی اللہ علیہ وآلہ وسلم نے فرمایا: جو ان میں سب سے زیادہ نیکی کا حکم کرنے والا ہو اور برائی سے روکنے والا ہو، اور رشتہ داروں سے صلہ رحمی کا معاملہ کرنے والا ہو۔ [مصنف ابن ابي شيبه/ كتاب الأدب/حدیث: 27038]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: کوئی لڑکا اپنے والد کا بدلہ نہیں چکا سکتا، مگر یہ کہ وہ اپنے والد کو غلام پائے پھر اس کو خرید کر آزاد کر دے۔ [مصنف ابن ابي شيبه/ كتاب الأدب/حدیث: 27039]

حضرت عبد اللہ بن مسعود رضی اللہ عنہ فرماتے ہیں کہ میں نے پوچھا: اے اللہ کے رسول (صلی اللہ علیہ وآلہ وسلم)! کون سا عمل افضل ترین ہے؟ آپ صلی اللہ علیہ وآلہ وسلم نے فرمایا: نماز کو اس کے وقت میں ادا کرنا۔ میں نے پوچھا: پھر کون سا عمل افضل ہے؟ آپ صلی اللہ علیہ وآلہ وسلم نے فرمایا: والدین سے نیک سلوک کرنا۔ [مصنف ابن ابي شيبه/ كتاب الأدب/حدیث: 27040]

حضرت ابو الدرداء فرماتے ہیں کہ میں نے رسول اللہ صلی اللہ علیہ وآلہ وسلم کو فرماتے ہوئے سنا کہ باپ جنت کا درمیانی دروازہ ہے، پس اگر تو چاہے تو اس کی حفاظت کر اور اگر چاہے تو اس کو ضائع کر دے۔ [مصنف ابن ابي شيبه/ كتاب الأدب/حدیث: 27041]

حضرت ہشام فرماتے ہیں کہ حضرت حسن نے ارشاد فرمایا: ماں کا حصہ اچھے سلوک میں سے دو تہائی کے برابر ہے اور باپ کا ایک تہائی کے برابر ہے۔ [مصنف ابن ابي شيبه/ كتاب الأدب/حدیث: 27042]

حضرت ابو سلامہ السلامی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: میں آدمی کو اس کی ماں سے حسن سلوک کے بارے میں تین مرتبہ وصیت کرتا ہوں، میں آدمی کو اس کے باپ سے حسن سلوک کے بارے میں وصیت کرتا ہوں، میں آدمی کو اس کے اس مولیٰ کے بارے میں وصیت کرتا ہوں جو اس کے قریب ہو، اگرچہ اسے اس کی طرف سے اذیت ہی پہنچتی ہو۔ [مصنف ابن ابي شيبه/ كتاب الأدب/حدیث: 27043]