حضرت ابوہریرہ فرماتے ہیں کہ ایک آدمی نے نبی کریم صلی اللہ علیہ وآلہ وسلم کی خدمت میں آکر عرض کیا اے اللہ کے رسول (صلی اللہ علیہ وآلہ وسلم)! مجھے بتلائیے کہ لوگوں میں سب سے زیادہ میرے حسن سلوک کا کون حقدار ہے؟ اس پر آپ صلی اللہ علیہ وآلہ وسلم نے فرمایا: جی ہاں! تیرے باپ کی قسم! تجھے ضرور خبر دی جائے گی، تیری ماں سب سے زیادہ حقدار ہے۔ اس شخص نے پوچھا: پھر کون؟ آپ صلی اللہ علیہ وآلہ وسلم نے فرمایا: تیری ماں! اس نے پوچھا: پھر کون؟ آپ صلی اللہ علیہ وآلہ وسلم نے فرمایا: تیرا باپ۔ [مصنف ابن ابي شيبه/ كتاب الأدب/حدیث: 27044]

حضرت عمارہ ابو سعید فرماتے ہیں کہ میں نے حضرت حسن سے پوچھا: کہ والدین کی نافرمانی کی انتہا کیا ہے؟ آپ نے فرمایا: یہ کہ تم ان کو محروم کردو اور ان سے قطع تعلقی کرو اور تم ان دونوں پر غصہ کی نظر ڈالو۔ اے عمارہ! ان کے ساتھ کیسا نیک سلوک ہوا!۔ [مصنف ابن ابي شيبه/ كتاب الأدب/حدیث: 27045]

حضرت یونس بن عبید فرماتے ہیں کہ گناہوں کے بوجھ تلے دبے شخص کے لیے والدین کی فرماں برداری کی وجہ سے جنت کی امید ہے اور عبادت گزار کے لیے والدین کی نافرمانی کی وجہ سے جہنم کا خوف ہے۔ [مصنف ابن ابي شيبه/ كتاب الأدب/حدیث: 27046]

حسن فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: والدین سے نیک سلوک کرنا جہاد سے کفایت کرتا ہے۔ [مصنف ابن ابي شيبه/ كتاب الأدب/حدیث: 27047]

حضرت سعد بن مسعود فرماتے ہیں کہ حضرت ابن عباس رضی اللہ عنہما نے ارشاد فرمایا: جس مسلمان کے والدین زندہ ہوں اور وہ صبح کرے ان دونوں سے نیک سلوک کرتے ہوئے تو اللہ تعالیٰ اس کے لئے جنت کے دو دروازے کھول دیتے ہیں اور جو کوئی مسلمان شام کرے ان دونوں سے برا سلوک کرتے ہوئے تو اللہ اس کے لیے جہنم کے دو دروازے کھول دیتے ہیں اور جب ان دونوں میں سے کوئی ایک اس سے ناراض ہو تو اللہ اس سے راضی نہیں ہوتے یہاں تک کہ وہ اس ناراض کو راضی کرے، راوی کہتے ہیں: میں نے پوچھاـ: اگرچہ وہ دونوں ظالم ہوں؟ آپ نے فرمایا: ہاں! اگرچہ وہ دونوں ظالم ہوں۔ [مصنف ابن ابي شيبه/ كتاب الأدب/حدیث: 27048]

حضرت ابو سعید فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: نافرمان ہمیشہ شراب پینے والا، اور احسان جتلانے والا جنت میں داخل نہ ہوگا۔ [مصنف ابن ابي شيبه/ كتاب الأدب/حدیث: 27049]

حضرت معاویہ بن اسحاق فرماتے ہیں کہ حضرت عروہ بن زبیر نے ارشاد فرمایا: جس نے اپنے والد کی طرف سخت نظر سے دیکھا اس نے فرماں برداری نہیں کی۔ [مصنف ابن ابي شيبه/ كتاب الأدب/حدیث: 27050]

حضرت لیث فرماتے ہیں کہ حضرت مجاہد نے اس آیت کا معنی یوں بیان کیا، آیت { فَلاَ تَقُلْ لَہُمَا أُفٍّ } جب وہ دونوں بڑھاپے کی اس حالت کو پہنچ جائیں کہ اسے ان کی ویسی ہی دیکھ بھال کرنی پڑے جیسی وہ بچپن میں اس کی کیا کرتے تھے تو یہ ان دونوں کو اُف مت کہے۔ [مصنف ابن ابي شيبه/ كتاب الأدب/حدیث: 27051]

حضرت محمد بن طلحہ بن معاویہ بن جاھمۃ السلمی فرماتے ہیں کہ ان کے والد نے فرمایا: کہ میں رسول اللہ صلی اللہ علیہ وآلہ وسلم کی خدمت میں آیا اور میں نے عرض کیا:ـ اے اللہ کے رسول (صلی اللہ علیہ وآلہ وسلم)! میں آپ کے ساتھ اللہ کے راستہ میں جہاد کے لیے جانا چاہتا ہوں۔ آپ صلی اللہ علیہ وآلہ وسلم نے پوچھا:ـ کیا تمہاری والدہ زندہ ہیں؟ میں نے عرض کیا: اے اللہ کے رسول (صلی اللہ علیہ وآلہ وسلم)! جی ہاں، آپ صلی اللہ علیہ وآلہ وسلم نے فرمایا: ان کے پاؤں کو لازم پکڑ لو (خدمت کرو) پس وہاں جنت ہے۔ [مصنف ابن ابي شيبه/ كتاب الأدب/حدیث: 27052]

حضرت ہشام بن عروہ فرماتے ہیں کہ ان کے والد حضرت عروہ بن زبیر نے اس آیت کی تفسیر یوں بیان فرمائی۔ آیت { فَلاَ تَقُلْ لَہُمَا أُفٍّ } ترجمہ: تم ان دونوں کو ”اُف“ تک مت کہو، فرمایا: اس کا مطلب ہے جب وہ دونوں کسی کام کے کرنے کا ارادہ کریں یا کوئی ان کو کوئی چیز پسند ہو تو ان دونوں کو روکو مت۔ [مصنف ابن ابي شيبه/ كتاب الأدب/حدیث: 27053]