حضرت نافع فرماتے ہیں کہ حضرت ابن عمر رضی اللہ عنہما کا گزر چند لوگوں پر ہوا جو چودہ گوٹ کھیل رہے تھے۔ آپ نے اس کو ان میں سے کسی کے سر پر مار کر توڑ دیا۔ [مصنف ابن ابي شيبه/ كتاب الأدب/حدیث: 27844]

حضرت عبد الکریم ابو امیہ فرماتے ہیں کہ حضرت اُم قثم نے ارشاد فرمایا: کہ حضرت علی رضی اللہ عنہ ہم پر داخل ہوئے اس حال میں کہ ہم چودہ گوٹ کھیل رہے تھے؟ آپ نے پوچھا: یہ کیا کر رہے ہو؟! ہم نے کہا: کہ ہم روزے سے ہیں تو اس کے ساتھ ہم اپنا دل بہلا رہے ہیں! آپ نے فرمایا: کیا میں تمہارے لیے ایک درھم کے اخروٹ نہ خرید لوں تم اس کے ساتھ دل بھی بہلانا اور اس کو چھوڑ دینا؟ راوی فرماتے ہیں کہ آپ نے پھر ہمارے لیے ایک درہم کے اخروٹ خریدے۔ [مصنف ابن ابي شيبه/ كتاب الأدب/حدیث: 27845]

حضرت ابو جعفر فرماتے ہیں کہ حضرت علی بن حسین رحمہ اللہ اپنی گھر والی کے ساتھ چودہ گوٹ کھیلتے تھے۔ [مصنف ابن ابي شيبه/ كتاب الأدب/حدیث: 27846]

حضرت نافع فرماتے ہیں کہ حضرت ابن عمر رضی اللہ عنہما اپنی دو باندیوں پر داخل ہوئے اس حال میں کہ وہ چودہ گوٹ کھیل رہی تھیں۔ آپ نے اسی سے ان دونوں کو مارا یہاں تک کہ وہ ٹوٹ گئی۔ [مصنف ابن ابي شيبه/ كتاب الأدب/حدیث: 27847]

حضرت یزید بن ابی عبید فرماتے ہیں کہ حضر ت سلمہ بن اکوع اپنے بیٹوں کو چودہ گوٹ کھیلنے سے منع کرتے تھے اور فرماتے کہ یہ لوگ اس میں جھوٹ بولتے ہیں اور جھوٹی قسمیں اٹھاتے ہیں۔ [مصنف ابن ابي شيبه/ كتاب الأدب/حدیث: 27848]

حضرت اسماعیل بن عبد الملک فرماتے ہیں کہ حضرت سعید بن جبیر چودہ گوٹ کھیلنے کو مکروہ سمجھتے تھے۔ [مصنف ابن ابي شيبه/ كتاب الأدب/حدیث: 27849]

حضرت لیث فرماتے ہیں کہ حضرت طاؤس سٹے کو مکروہ سمجھتے تھے اور فرماتے ہیں کہ یہ بھی جوا ہے۔ یہاں تک کہ آپ بچوں کے اخروٹ اور چوسر کے مہروں سے کھیلنے کو بھی مکروہ سمجھتے تھے۔ [مصنف ابن ابي شيبه/ كتاب الأدب/حدیث: 27850]

حضرت حماد بن نجیح فرماتے ہیں کہ میں نے حضرت ابن سیرین کو دیکھا کہ وہ عید کے دن چند لڑکوں کے پاس سے گزرے تھے جو اونٹوں کے باڑے کے پاس اخروٹ میں سٹہ بازی لگا رہے تھے۔ آپ نے فرمایا: اے بچو! سٹہ مت لگاؤ۔ اس لیے کہ سٹہ بازی بھی جوا ہے۔ [مصنف ابن ابي شيبه/ كتاب الأدب/حدیث: 27851]

حضرت عاصم فرماتے ہیں کہ حضرت محمد بن سیرین نے ارشاد فرمایا: ہر وہ بازی جس میں خطرہ ہو وہ جوا ہے۔ [مصنف ابن ابي شيبه/ كتاب الأدب/حدیث: 27852]

حضرت لیث فرماتے ہیں کہ حضرت عطاء اور حضرت مجاہد اور حضرت طاؤس یا ان میں سے دو حضرات نے فرمایا: کہ سٹہ بازی کی ہر قسم جوا ہے یہاں تک کہ بچوں کا اخروٹ کے ساتھ کھیلنا بھی جوا ہے۔ [مصنف ابن ابي شيبه/ كتاب الأدب/حدیث: 27853]