حضرت سلیمان بن بریدہ سے رسول اللہ صلی اللہ علیہ وآلہ وسلم کا مذکورہ ارشاد اس سند سے بھی منقول ہے۔ [مصنف ابن ابي شيبه/ كتاب الأدب/حدیث: 27824]

حضرت قتادہ فرماتے ہیں کہ ہمیں یہ بات پہنچی ہے کہ رسول اللہ صلی اللہ علیہ وآلہ وسلم سے نرد کے مہروں کے ساتھ کھیلنے کے متعلق سوال کیا گیا؟ آپ صلی اللہ علیہ وآلہ وسلم نے فرمایا: بیشک یہ تو عجمیوں کا جوا ہے۔ راوی کہتے ہیں کہ حضر ت قتادہ ہر چیز کے ساتھ کھیلنے کو مکروہ سمجھتے تھے یہاں تک کہ کنکریوں کے ساتھ کھیلنے کو بھی۔ [مصنف ابن ابي شيبه/ كتاب الأدب/حدیث: 27825]

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے چوسر کے مہروں کے ساتھ کھیلنے سے منع فرمایا۔ [مصنف ابن ابي شيبه/ كتاب الأدب/حدیث: 27826]

حضرت ابو ایوب فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: کہ مثال اس شخص کی جو چوسر کے دو مہروں سے کھیلتا ہے اور جوا نہیں لگاتا اس شخص کی سی ہے جو خنزیر کی چربی کا تیل تو لگاتا ہو اور اس کا گوشت نہ کھاتا ہو۔ [مصنف ابن ابي شيبه/ كتاب الأدب/حدیث: 27827]

حضرت مجاہد فرماتے ہیں کہ حضرت ابن عمر رضی اللہ عنہما نے ارشاد فرمایا: کہ میں اپنا ہاتھ خنزیر کے گوشت میں ڈالوں یہ میرے نزدیک زیادہ پسندیدہ ہے اس بات سے کہ میں چوسر کھیلوں۔ [مصنف ابن ابي شيبه/ كتاب الأدب/حدیث: 27828]

حضر ت برد بن معمر بن یزید فرماتے ہیں کہ میں نے حضر ت عائشہ رضی اللہ عنہا سے چوسر کے متعلق سوال کیا؟ آپ نے فرمایا: اللہ نے چوسر کو بھلائی سے دور کیا اور اللہ تعالیٰ نے اس کے کھیلنے والے کو بھی بھلائی سے دور کیا۔ [مصنف ابن ابي شيبه/ كتاب الأدب/حدیث: 27829]

حضرت ابو الاشہب نخعی فرماتے ہیں کہ میں نے حضر ت ابن عباس رضی اللہ عنہما کو یوں فرماتے ہوئے سنا کہ کوئی خنزیر کے خون میں اس قدر آلودہ ہوجائے کہ وہ اس پر خوب پھیل جائے یہ بہتر ہے اس سے کہ وہ چوسر کھیلے۔ [مصنف ابن ابي شيبه/ كتاب الأدب/حدیث: 27830]

حضرت جعفر کے والد فرماتے ہیں کہ حضرت علی رضی اللہ عنہ نے ارشاد فرمایا: کہ چوسر یا شطرنج جوا ہیں۔ [مصنف ابن ابي شيبه/ كتاب الأدب/حدیث: 27831]

حضرت نافع فرماتے ہیں کہ حضرت ابن عمر رضی اللہ عنہما جب کسی کے گھر میں چوسر کے مہرے پاتے تو ان کو توڑ دیتے اور جو شخص ان سے کھیلتا تو اس کو مارتے تھے۔ [مصنف ابن ابي شيبه/ كتاب الأدب/حدیث: 27832]

حضرت مسعر حضرت عبد الملک بن عمیر سے نقل کرتے ہیں کہ حضرت ابو الاحوص نے ارشاد فرمایا: جبکہ حضرت سفیان حضرت عبد الملک بن عمیر سے اور وہ حضرت ابوالاحوص سے نقل کرتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: کہ تم ان نشان لگے مہروں سے بچو جنہیں للکار کر پھینکا جاتا ہے، اس لیے کہ یہ جوا ہے۔ [مصنف ابن ابي شيبه/ كتاب الأدب/حدیث: 27833]