حضرت اسلم منقری فرماتے ہیں کہ حضرت سعید بن جبیر جب چوسر کھیلنے والوں پر گزرتے تو آپ انہیں سلام نہیں کرتے تھے۔ [مصنف ابن ابي شيبه/ كتاب الأدب/حدیث: 27854]

حضرت یزید بن أبو زیاد فرماتے ہیں کہ حضرت زیاد بن حدیر کا گزر چند لوگوں پر ہوا جو چوسر کھیل رہے تھے آپ نے لاعلمی میں انہیں سلام کردیا۔ پھر آپ دوبارہ واپس آئے اور فرمایا: مجھے میرا سلام واپس لوٹا دو۔ [مصنف ابن ابي شيبه/ كتاب الأدب/حدیث: 27855]

حضرت بنانہ فرماتی ہیں کہ حضرت عثمان پہلی بارش میں نہاتے تھے۔ [مصنف ابن ابي شيبه/ كتاب الأدب/حدیث: 27856]

حضرت ابن ابی ملیکہ فرماتے ہیں کہ حضرت ابن عباس رضی اللہ عنہما بارش میں نہاتے تھے، اپنے کپڑے نکلواتے، یہاں تک کہ اپنی زین بھی پہلی بارش میں نکلواتے تھے۔ [مصنف ابن ابي شيبه/ كتاب الأدب/حدیث: 27857]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم پہلی بارش میں نہایا کرتے تھے۔ [مصنف ابن ابي شيبه/ كتاب الأدب/حدیث: 27858]

حضرت سعد بن رزین اپنے کسی شیخ سے نقل کرتے ہیں کہ حضرت علی رضی اللہ عنہ جب بارش دیکھتے تو اپنے کپڑے اتار دیتے اور بیٹھ جاتے اور فرماتے: یہ ابھی ابھی عرش سے آئی ہے۔ [مصنف ابن ابي شيبه/ كتاب الأدب/حدیث: 27859]

حضرت انس سے روایت ہے کہ ایک مرتبہ ہم رسول اللہ صلی اللہ علیہ وآلہ وسلم کے ساتھ تھے کہ بارش شروع ہوگئی۔ رسول اللہ صلی اللہ علیہ وآلہ وسلم باہر تشریف لائے اور اپنے جسم مبارک سے کپڑا ہٹا لیا یہاں تک کہ بارش آپ کو لگی۔ ہم نے عرض کیا: یا رسول اللہ! آپ نے ایسا کیوں کیا؟ آپ نے فرمایا کہ یہ ابھی ابھی اپنے رب کے پاس سے آئی ہے۔ [مصنف ابن ابي شيبه/ كتاب الأدب/حدیث: 27860]

حضرت عمرو بن اوس فرماتے ہیں کہ ان کے والد حضرت اوس نے ارشاد فرمایا: کہ ہم لوگ رسول اللہ صلی اللہ علیہ وآلہ وسلم کے پاس بیٹھے ہوئے تھے اس حال میں کہ آپ صلی اللہ علیہ وآلہ وسلم ہمیں قصہ بیان فرما رہے تھے اور ہمیں وعظ و نصیحت فرما رہے تھے۔ [مصنف ابن ابي شيبه/ كتاب الأدب/حدیث: 27861]

حضرت مالک بن مغول فرماتے ہیں کہ حضرت ابو عبد الرحمن سلمی نے ارشاد فرمایا: کہ تم لوگ حضرت ابو الاحوص کے سوا کسی بھی قصہ گو کی مجلس اختیار مت کرو۔ [مصنف ابن ابي شيبه/ كتاب الأدب/حدیث: 27862]

حضرت اسماعیل فرماتے ہیں کہ چند لوگوں نے امام شعبی سے یہ بات ذکر کی کہ قصہ گو کے پاس بیٹھنا غلام آزاد کرنے کے برابر ہے! اس پر آپ نے ارشاد فرمایا: میں ایک غلام آزاد کروں یہ میرے نزدیک زیادہ پسندیدہ ہے اس سے کہ میں چار مہینہ تک قصہ گو کے ساتھ ہم مجلس ہوں۔ [مصنف ابن ابي شيبه/ كتاب الأدب/حدیث: 27863]