حضرت سعید بن مسیب کا ارشاد ہے کہ شل ہاتھ میں جب کٹ جائے تو تہائی دیت ہوگی۔ [مصنف ابن ابي شيبه/كتاب الديات/حدیث: 28861]

حضرت ابراہیم نے فرمایا جب شل ہاتھ کٹ جائے تو اس میں تہائی دیت ہے۔ [مصنف ابن ابي شيبه/كتاب الديات/حدیث: 28862]

حضرت عمر بن خطاب سے مروی ہے کہ شل ہاتھ جب کٹ جائے تو اس میں تہائی دیت ہے۔ [مصنف ابن ابي شيبه/كتاب الديات/حدیث: 28863]

حضرت ابن عباس رضی اللہ عنہما سے مروی ہے کہ شل ہاتھ جب کٹ جائے تو اس میں تہائی دیت ہے۔ [مصنف ابن ابي شيبه/كتاب الديات/حدیث: 28864]

حضرت حسن، حضرت شعبی، اور حضرت حکم و حماد ابراہیم سے نقل کرتے ہوئے فرماتے ہیں کہ شل ہاتھ میں دو عادل آدمیوں کا فیصلہ ہوگا۔ [مصنف ابن ابي شيبه/كتاب الديات/حدیث: 28865]

حضرت حکم اور حضرت حماد، ابراہیم سے شل ہاتھ کے بارے میں نقل کرتے ہیں کہ ان حضرات نے فرمایا: اس میں دو عادل آدمیوں کا فیصلہ ہوگا۔ [مصنف ابن ابي شيبه/كتاب الديات/حدیث: 28866]

حضرت ابراہیم کا ارشاد ہے کہ کہا جاتا تھا کہ جب ہاتھ یا پاؤں ٹوٹ کر دوبارہ ٹھیک ہوجائے اور اس میں کوئی نقص بھی پیدا نہ ہو تو اس میں ”١٨٠“ درہم دیت ہے۔ [مصنف ابن ابي شيبه/كتاب الديات/حدیث: 28867]

ابراہیم سے مروی ہے کہ ہاتھ یا پاؤں جب ٹوٹ جائے تو اس میں صلح ہے۔ [مصنف ابن ابي شيبه/كتاب الديات/حدیث: 28868]

حضرت عبداللہ بن ذکوان سے مروی ہے کہ حضرت عمر نے ایک آدمی کے بارے میں فیصلہ فرمایا کہ جس کی پنڈلی ٹوٹ گئی اور پھر جڑ کر صحیح ہوگئی تھی بیس دینار کا، عبداللہ بن ذکوان کا ارشاد ہے کہ ان سے کہا گیا یہ (پنڈلی) تو کمزور ہوگئی ہے۔ [مصنف ابن ابي شيبه/كتاب الديات/حدیث: 28869]

حضرت شریح نے ایسے آدمی کے بارے میں کہ جس نے دوسرے کا ہاتھ توڑ دیا تھا پھر وہ صحیح ہوگیا فرمایا ہے کہ توڑنے والے پر صرف جوڑنے والے کی اجرت ہے، کیا وہ یعنی جس کا ہاتھ ٹوٹا تھا اس پر شکر ادا نہیں کرتا کہ اللہ نے اس کا ہاتھ ٹھیک کردیا ہے۔ [مصنف ابن ابي شيبه/كتاب الديات/حدیث: 28870]