حضرت یحییٰ بن سعید فرماتے ہیں کہ نشہ میں چور دو آدمیوں میں سے ایک نے اپنے ساتھی کو قتل کردیا تو حضرت معاویہ نے اس کو بھی بدلے میں قتل کردیا۔ [مصنف ابن ابي شيبه/كتاب الحدود/حدیث: 30320]

حضرت برد فرماتے ہیں کہ حضرت مکحول اور حضرت زھری نے فرمایا: نشہ میں مدہوش شخص کا طلاق دینا جائز ہے اور اس کا ہاتھ کاٹا جائے گا اگر وہ چوری کرلے۔ [مصنف ابن ابي شيبه/كتاب الحدود/حدیث: 30321]

حضرت حنظلہ بن ابو سفیان فرماتے ہیں کہ حضرت قاسم سے اس نشہ میں مدہوش آدمی کے بارے میں سوال کیا گیا جس نے چوری کی تھی؟ آپ نے فرمایا: اگر وہ اس سے پہلے چوری کے معاملے میں مشہور ہے تو اس کا ہاتھ کاٹ دو وگرنہ نہیں۔ [مصنف ابن ابي شيبه/كتاب الحدود/حدیث: 30322]

حضرت محمد بن سالم فرماتے ہیں کہ حضرت شعبی سے ابتدائی نشہ والے کے بارے میں مروی ہے کہ اگر وہ چوری کرے تو اس کا ہاتھ کاٹ دیا جائے گا۔ اور اس کو تمام جنایات میں پکڑا جائے گا۔ [مصنف ابن ابي شيبه/كتاب الحدود/حدیث: 30323]

حضرت اوزاعی فرماتے ہیں کہ حضرت زھری سے نشہ میں مدہوش آدمی کے بارے میں مروی ہے کہ جب وہ آزاد کرلے یا طلاق دے تو اس کو مانا جائے گا اور اس پر حد قائم کی جائے گی۔ [مصنف ابن ابي شيبه/كتاب الحدود/حدیث: 30324]

حضرت معمر فرماتے ہیں کہ حضرت زھری نے ارشاد فرمایا: اگر وہ چوری کرے تو اس کا ہاتھ کاٹ دیا جائے اور اگر وہ قتل کرے تو اسے بھی قتل کردیا جائے۔ [مصنف ابن ابي شيبه/كتاب الحدود/حدیث: 30325]

حضرت مغیرہ فرماتے ہیں کہ ابراہیم نے ارشاد فرمایا: نشہ میں مدہوش آدمی جو بات بھی کرے وہ اس پر نافذ کی جائے گی۔ [مصنف ابن ابي شيبه/كتاب الحدود/حدیث: 30326]

حضرت ہشام فرماتے ہیں کہ حضرت حسن بصری اور حضرت محمد بن سیرین نے ارشاد فرمایا: اگر وہ چوری کرے تو اس کا ہاتھ کاٹ دیا جائے۔ [مصنف ابن ابي شيبه/كتاب الحدود/حدیث: 30327]

حضرت عاصم فرماتے ہیں کہ حضرت حسن بصری نے ارشاد فرمایا: چار چیزیں بادشاہ کے سپرد ہیں زکوٰۃ، نماز، سزائیں اور فیصلے۔ [مصنف ابن ابي شيبه/كتاب الحدود/حدیث: 30328]

حضرت جبلہ بن عطیہ فرماتے ہیں کہ حضرت ابن محیریز نے ارشاد فرمایا: جمعہ، سزائیں، زکوٰۃ اور مال فئی بادشاہ کے سپرد ہیں۔ [مصنف ابن ابي شيبه/كتاب الحدود/حدیث: 30329]