حضرت عیسیٰ فرماتے ہیں کہ میں نے حضرت شعبی کے علاوہ ایک شخص کو یہ فرماتے ہوئے سنا: ان دونوں کو لعان پر مجبور کیا جائے گا اور انہیں قید رکھا جائے گا یہاں تک کہ وہ دونوں لعان کرلیں۔ [مصنف ابن ابي شيبه/كتاب الحدود/حدیث: 30350]

حضرت شعبی نے ارشاد فرمایا: جب لعان میں حد دور کردی جائے تو اس بچہ کو اس سے ملا دیا جائے گا۔ [مصنف ابن ابي شيبه/كتاب الحدود/حدیث: 30351]

حضرت جابر کے واسطہ سے بھی حضرت شعبی کا یہی ارشاد منقول ہے۔ [مصنف ابن ابي شيبه/كتاب الحدود/حدیث: 30352]

حضرت لیث فرماتے ہیں کہ حضرت مجاہد اور حضرت عطاء نے ارشاد فرمایا: جب لعان میں حد دور کردی جائے تو اس بچہ کو اس سے ملا دیا جائے گا۔ [مصنف ابن ابي شيبه/كتاب الحدود/حدیث: 30353]

حضرت مغیرہ فرماتے ہیں کہ ابراہیم سے اس شخص کے بارے میں مروی ہے جو اپنی بیوی سے لعان کرلے پھر وہ اس پر تہمت لگا دے۔ آپ نے فرمایا: اس پر حد لگائی جائے گی۔ [مصنف ابن ابي شيبه/كتاب الحدود/حدیث: 30354]

حضرت عامر نے فرمایا: اس کو کوڑے نہیں مارے جائیں گے۔ [مصنف ابن ابي شيبه/كتاب الحدود/حدیث: 30355]

حضرت شعبہ فرماتے ہیں کہ میں نے حضرت حکم اور حضرت حماد سے اس آدمی کے متعلق دریافت کیا جس نے اپنی بیوی سے لعان کیا پھر اس کی بیوی نے بچہ جنا پس وہ کہنے لگا: یہ میرا نہیں ہے تو اس کا کیا حکم ہے؟ ان دونوں حضرات نے فرمایا: اسے مارا جائے گا۔ [مصنف ابن ابي شيبه/كتاب الحدود/حدیث: 30356]

حضرت ابن جریج فرماتے ہیں کہ حضرت عطاء نے ارشاد فرمایا: اگر ان دونوں نے لعان کرلیا پھر اس نے اپنی بیوی پر تہمت لگائی تو اس پر حد نہیں لگائی جائے گی۔ ابن جریج فرماتے ہیں کہ میں نے کہا: یہ کیسے؟ حالانکہ اس نے خود کو جھٹلا دیا ہے۔ آپ نے فرمایا: اس پر حد نہیں لگائی جائے گی، وہ اللہ کی لعنت کا مستحق ہوچکا ہے، اللہ کی کتاب (کے مطابق)۔ [مصنف ابن ابي شيبه/كتاب الحدود/حدیث: 30357]

حضرت حکم فرماتے ہیں کہ ابراہیم نے ارشاد فرمایا اگر کوڑے لگے ہوئے شخص نے اپنی بیوی پر تہمت لگائی تو اسے بھی کوڑے مارے جائیں گے اور ان دونوں کے درمیان لعان نہیں ہوگا۔ [مصنف ابن ابي شيبه/كتاب الحدود/حدیث: 30358]

راوی فرماتے ہیں: میں نے حسن بصری اور حضرت عامر سے پوچھا؟ تو ان دونوں حضرات نے فرمایا: وہ لعان کرے گا۔ [مصنف ابن ابي شيبه/كتاب الحدود/حدیث: 30359]