حضرت حسان بن مخارق فرماتے ہیں کہ مجھے خبر پہنچی کہ ایک آدمی حضرت عمر بن خطاب کے ہمر اہ سفر میں گیا درآنحالیکہ وہ روزہ دار تھا جب اس نے روزہ افطار کرلیا تو اس نے اپنا ہاتھ حضرت عمر کے چمڑے کے مشکیزے کی طرف بڑھایا جو لٹکا ہوا تھا اور اس میں نبیذ موجود تھی جس کو اونٹ نے خوب ہلادیا تھا۔ پس اس شخص اسے پی لیا اور نشہ میں مدہوش ہوگیا اس پر حضرت عمر نے اس پر حد لگائی اس نے آپ سے کہا: بیشک میں نے تو تمہارے مشکیزے سے پی تھی؟ آپ نے اس سے فرمایا: بیشک ہم نے تمہارے نشہ میں مدہوش ہونے کی وجہ سے تمہیں کوڑے مارے ہیں۔ [مصنف ابن ابي شيبه/كتاب الحدود/حدیث: 30290]

حضرت ہشام فرماتے ہیں کہ حضرت حسن بصری سے نبیذ پی کر نشہ میں مدہوش ہونے والے کے بارے میں مروی ہے کہ اسے اسی کوڑے مارے جائیں گے۔ [مصنف ابن ابي شيبه/كتاب الحدود/حدیث: 30291]

حضرت عبیدہ فرماتے ہیں کہ حضرت ابراہیم نے ارشاد فرمایا: نبیذ کے پینے کی صورت میں حدلگائی جائے گی۔ [مصنف ابن ابي شيبه/كتاب الحدود/حدیث: 30292]

حضرت عبیدہ فرماتے ہیں کہ حضرت ابو وائل نے ارشاد فرمایا: اس میں حد جاری نہیں ہوگی۔ [مصنف ابن ابي شيبه/كتاب الحدود/حدیث: 30293]

حضرت عبداللہ بن شداد فرماتے ہیں کہ حضرت ابن عباس رضی اللہ عنہما نے ارشاد فرمایا: نبیذ سے نشہ میں مدہوش ہونے کی صورت میں اسی کوڑے ہیں۔ [مصنف ابن ابي شيبه/كتاب الحدود/حدیث: 30294]

حضرت فضیل فرماتے ہیں کہ حضرت شقیق ضبی نے ارشاد فرمایا: اس میں حد ہوگی، اسی کوڑے مارے جائیں گے۔ [مصنف ابن ابي شيبه/كتاب الحدود/حدیث: 30295]

حضرت شعبی فرماتے ہیں کہ حضرت علی رضی اللہ عنہ نے چھوٹے مٹکوں میں لوگوں کو انگور کا پکا ہوا شیرہ دیا پس اس سے ایک آدمی نشہ میں مدہوش ہوگیا حضرت علی رضی اللہ عنہ نے اسے اسی کوڑے مارے راوی کہتے ہیں سب لوگوں نے آپ کے پاس اس بات کی گواہی دی کہ یہ شخص اسی شیرہ سے نشہ میں مدہوش ہوا ہے جو آپ نے لوگوں کو دیا تھا۔ آپ نے فرمایا: اس نے اس میں سے اتنا کیوں پی لیا کہ یہ نشہ میں چور ہوگیا؟ [مصنف ابن ابي شيبه/كتاب الحدود/حدیث: 30296]

حضرت حضین ابو ساسان فرماتے ہیں کہ اہل کوفہ میں سے چند لوگ سوار ہو کر حضرت عثمان کے پاس آئے انہوں نے آپ کو ولید بن عقبہ کے شرا ب پینے کے متعلق بتلایا۔ تو حضرت علی رضی اللہ عنہ نے اس بارے میں آپ سے بات کی۔ حضر ت عثمان نے فرمایا: اپنے چچا زاد بھائی کے پاس جاؤ اور تم اس پر حد قائم کرو سو حضرت علی رضی اللہ عنہ نے فرمایاٖ اے حسن! کھڑے ہو اور اسے کوڑے مارو اس نے کہا: تم اس عمل کے اہل نہیں! اپنے علاوہ کسی کو سپرد کرو آپ نے فرمایا: بلکہ تو ضعیف ہوگیا، کمزور ہوگیا اور عاجز ہوگیا ہے اے عبداللہ بن جعفر کھڑے ہوجاؤ پس انہوں نے اس کو کوڑے مارنے شروع کردیے اور حضرت علی رضی اللہ عنہ شمار کررہے تھے یہاں تک کہ وہ چالیس تک پہنچ گئے، آپ نے فرمایا: ٹھہرو یا فرمایا: رک جاؤ رسول اللہ صلی اللہ علیہ وآلہ وسلم نے چالیس کوڑے مارے ہیں اور حضرت ابوبکر نے بھی چایس کوڑے مارے ہیں اور حضرت عمر نے اس کی اسی کوڑے تک تکمیل فرمائی ہے اور تمام سنت طریقے ہیں۔ [مصنف ابن ابي شيبه/كتاب الحدود/حدیث: 30297]

حضرت حسن بصری فرماتے ہیں کہ حضر ت عمر نے شراب میں اسی کوڑے لگائے۔ [مصنف ابن ابي شيبه/كتاب الحدود/حدیث: 30298]

حضرت ابو عبدالرحمن فرماتے ہیں کہ حضرت علی رضی اللہ عنہ نے ارشاد فرمایا: اہل شام میں سے چند لوگوں نے شراب پی۔ اس وقت ان پر یزید بن ابو سفیان امیر تھے اور ان لوگوں نے کہا: یہ ہمارے لیے حلال ہے، اور انہوں نے اس آیت کی تاویل کی: ایمان اور اعمال صالحہ والوں پر کوئی چیز کھانے میں کوئی حرج نہیں [المائدة: 93] ۔ یزید بن ابی سفیان نے اس بارے میں حضرت عمر کو خط لکھا۔ حضرت عمر نے لکھا کہ قبل اس کے کہ یہ لوگ تمہارے پاس والوں کو بگاڑیں انہیں میرے پاس بھجوا دو۔ جب وہ آئے تو حضرت عمر نے ان کے بارے میں مشورہ کیا۔ آپ سے کہا گیا اے امیرالمومنین! ہمارا خیال ہے کہ ان لوگوں نے اللہ کے بارے میں جھوٹ بولا اور اپنے دین میں وہ بات مقرر کی جس کی اللہ نے اجازت نہیں دی۔ لہٰذا انہیں قتل کروا دیں۔ اس دوران حضرت علی رضی اللہ عنہ خاموش رہے۔ حضرت عمر نے پوچھا اے ابوالحسن! آپ کیا کہتے ہیں؟ حضرت علی رضی اللہ عنہ نے کہا کہ میری رائے ہے کہ آپ ان سے توبہ کا مطالبہ کریں، اگر وہ توبہ کرتے ہیں تو انہیں شراب پینے کی وجہ سے اسی اسی کوڑے لگائیں اور اگر توبہ نہ کریں تو قتل کردیں، کیونکہ انہوں نے اللہ پر جھوٹ گھڑا ہے اور اپنے دین میں وہ بات مقرر کی جس کی اللہ نے اجازت نہیں دی۔ حضرت عمر نے ان سے توبہ کا مطالبہ کیا تو انہوں نے توبہ کر لی، اس پر آپ نے انہیں اسی اسی کوڑے لگائے۔ [مصنف ابن ابي شيبه/كتاب الحدود/حدیث: 30299]