حضرت عبدالرحمن بن ازھر فرماتے ہیں کہ نبی کریم صلی اللہ علیہ وآلہ وسلم کے پاس غزوہ حنین کے دن ایک شرابی لایا گیا سو رسول اللہ صلی اللہ علیہ وآلہ وسلم نے لوگوں سے فرمایا: تم اس کی طرف اٹھو۔ پس لو گ اس کی طرف گئے اور انہوں نے اپنی جوتیوں سے اسے مارا۔ [مصنف ابن ابي شيبه/كتاب الحدود/حدیث: 30300]

حضرت ابو سعید خدری فرماتے ہیں کہ رسول اللہ صلی اللہ علیہ وآلہ وسلم نے شراب میں دو جوتیوں سے چالیس ضربیں ماریں اور حضرت عمر نے ہر جوتی کے بدلے میں کوڑا مارنا شروع کیا۔ [مصنف ابن ابي شيبه/كتاب الحدود/حدیث: 30301]

حضرت سمیط بن عمیر فرماتے ہیں کہ ایک آدمی جمعہ کے دن مسجد میں داخل ہوا اور اس نے چار رکعت نماز پڑھ لی اس پر ایک آدمی نے اپنے ساتھی سے کہا: کیا تم نے بھی وہی دیکھا جو میں نے دیکھا؟ وہ کہنے لگا: ہاں پھر ان دونوں نے اس شخص کو پکڑا اور اسے حضرت ابو موسیٰ اشعری کے پاس لائے اور کہنے لگے: بیشک یہ شخص مسجد میں داخل ہوا اور اس نے چار رکعت نماز پڑھی آپ نے پوچھا: کیا اس کے علاوہ بھی کچھ کیا؟ انہوں نے کہا: نہیں۔ آپ نے فرمایا: بیشک یہ تو شک کی بات ہے۔ آپ نے پوچھا: تجھے اس کام پر کس بات نے ابھارا؟ اس شخص نے جواب دیا: میں نے آج سے پہلے کبھی شراب نہیں پی تو آپ نے اسے اسّی کوڑے مارے۔ [مصنف ابن ابي شيبه/كتاب الحدود/حدیث: 30302]

حضرت ابو سعید فرماتے ہیں کہ نبی کریم صلی اللہ علیہ وآلہ وسلم نے شراب میں چالیس کوڑے مارے۔ [مصنف ابن ابي شيبه/كتاب الحدود/حدیث: 30303]

حضرت یعلی رضی اللہ عنہ بن امیہ نے حضرت عمر بن خطاب سے فرمایا یا ان کو خط لکھا: بیشک ہمارے پاس ایسے لوگ لائے گئے ہیں جنہوں نے شراب پی ہے، پس ہم کس حالت میں ان پر حد قائم کریں؟ حضرت عمر نے فرمایا: ان سے قرآن پڑھواؤ اور ان کی چادر بہت سی چادروں کے درمیان ڈال دو پس اگر وہ قرآن نہ پڑھ سکیں اور اپنی چادر کو نہ پہچان سکیں تو ان پر حد قائم کردو۔ [مصنف ابن ابي شيبه/كتاب الحدود/حدیث: 30304]

حضرت ابوبکر بن عمرو بن عتبہ فرماتے ہیں کہ (راوی فرماتے ہیں میرا خیال ہے کہ انہوں نے حضرت عمر سے نقل کیا) حضرت عمر نے ارشاد فرمایا: حد نہیں ہوگی مگر اس چیز میں جو عقل کو اچک لے۔ [مصنف ابن ابي شيبه/كتاب الحدود/حدیث: 30305]

حضرت عبداللہ بن عتبہ فرماتے ہیں (راوی فرماتے ہیں میرا خیال ہے کہ) حضرت عمر سے نقل فرمایا: کہ حد نہیں ہوگی مگر اس چیز میں جو عقل کو اچک لے۔ [مصنف ابن ابي شيبه/كتاب الحدود/حدیث: 30306]

حضرت سعید بن سعید فرماتے ہیں کہ حضرت عطاء نے ارشاد فرمایا: جب مسلمان ذمی کی شراب چوری کرلے تو اس کا ہاتھ کاٹا جائے گا اور جب وہ کسی مسلمان کی شراب چوری کرلے تو اس کا ہاتھ نہیں کٹے گا۔ [مصنف ابن ابي شيبه/كتاب الحدود/حدیث: 30307]

حضرت عامر فرماتے ہیں کہ حضرت شریح نے ایک مسلمان کو شراب کا ضامن بنایا جو اس نے کسی ذمی کی بہاد ی تھی۔ [مصنف ابن ابي شيبه/كتاب الحدود/حدیث: 30308]

حضرت اشعث فرماتے ہیں کہ حضرت حسن بصری نے ارشاد فرمایا: جس شخص نے یہودی یا عیسائی کی چوری کی یا ذمی سے لے لی تو اس کا ہاتھ کاٹا جائے گا۔ [مصنف ابن ابي شيبه/كتاب الحدود/حدیث: 30309]