حضرت عبد الرحمن بن عصمہ رحمہ اللہ فرماتے ہیں کہ حضرت عائشہ رضی اللہ عنہا نے ارشاد فرمایا: اگر اللہ نے چاہا تو تم ایمان والے ہو۔ [مصنف ابن ابي شيبه/كتاب الإيمان/حدیث: 32391]

حضرت عطاء بن السائب رحمہ اللہ فرماتے ہیں کہ حضرت ابو عبد الرحمن رحمہ اللہ نے ارشاد فرمایا: جب تم میں سے کسی ایک سے سوال کیا جائے: کیا تم مومن ہو؟ تو وہ ہرگز شک مت کرے۔ [مصنف ابن ابي شيبه/كتاب الإيمان/حدیث: 32392]

حضرت زیاد بن علاقہ رحمہ اللہ فرماتے ہیں کہ حضرت عبد اللہ بن یزید رحمہ اللہ نے ارشاد فرمایا: جب تم میں سے کسی ایک سے سوال کیا جائے: کہ کیا تم مومن ہو؟ تو وہ ہرگز اپنے ایمان میں شک مت کرے۔ [مصنف ابن ابي شيبه/كتاب الإيمان/حدیث: 32393]

حضرت موسیٰ بن ابی کثیر رحمہ اللہ ایک آدمی سے، جس کا نام نہیں لیا گیا، نقل کرتے ہیں کہ اس کے والد نے کہا: میں نے حضرت عبد اللہ بن مسعود رضی اللہ عنہ کو فرماتے ہوئے سنا: کہ میں مومن ہوں۔ [مصنف ابن ابي شيبه/كتاب الإيمان/حدیث: 32394]

حضرت اعمش رحمہ اللہ فرماتے ہیں کہ حضرت ابو وائل رحمہ اللہ نے فرمایا: ایک آدمی حضرت عبد اللہ رضی اللہ عنہ کے پاس آ کر کہنے لگا: میں چند سواروں سے ملا تو میں نے ان سے پوچھا: تم کون لوگ ہو؟ وہ کہنے لگے: ہم ایمان والے ہیں، آپ رضی اللہ عنہ نے فرمایا: انہوں نے یوں کیوں نہیں کہہ دیا: کہ ہم جنت میں ہیں!! [مصنف ابن ابي شيبه/كتاب الإيمان/حدیث: 32395]

حضرت ابن طاوس رحمہ اللہ اپنے والد حضرت طاوس رحمہ اللہ سے، اور حضرت محل رحمہ اللہ حضرت ابراہیم رحمہ اللہ سے نقل کرتے ہیں کہ جب ان دونوں (حضرت طاوس اور حضرت ابراہیم رحمہما اللہ) سے ایمان کا پوچھا جاتا تو فرماتے: ہم ایمان لائے اللہ پر، اور اس کے فرشتوں پر اور اس کی کتابوں پر اور اس کے رسولوں پر۔ [مصنف ابن ابي شيبه/كتاب الإيمان/حدیث: 32396]

حضرت محل رحمہ اللہ حضرت ابراہیم رحمہ اللہ سے نقل کرتے ہیں کہ جب ان دونوں (حضرت طاوس اور حضرت ابراہیم رحمہما اللہ) سے پوچھا جاتا تو فرماتے: ہم ایمان لائے اللہ پر، اور اس کے فرشتوں پر اور اس کی کتابوں پر اور اس کے رسولوں پر۔ [مصنف ابن ابي شيبه/كتاب الإيمان/حدیث: 32397]

حضرت شیبانی رحمہ اللہ فرماتے ہیں کہ میں نے حضرت عبد اللہ بن معقل رحمہ اللہ سے ملاقات کی تو میں نے ان سے عرض کی: دین داروں میں سے کچھ لوگ عیب لگاتے ہیں میرے یوں کہنے پر: میں مومن ہوں۔ تو حضرت عبد اللہ بن معقل رحمہ اللہ نے فرمایا: تحقیق تم ناکام و نامراد ہو اگر تم مومن نہ ہو۔ [مصنف ابن ابي شيبه/كتاب الإيمان/حدیث: 32398]

حضرت سوار بن شبیب رحمہ اللہ فرماتے ہیں کہ ایک آدمی حضرت ابن عمر رضی اللہ عنہما کی خدمت میں حاضر ہو کر کہنے لگا: یہاں کچھ لوگ ہیں جو میرے خلاف کفر کی گواہی دیتے ہیں، تو آپ رضی اللہ عنہ نے فرمایا: تم یوں کیوں نہیں کہتے؛ اللہ کے سوا کوئی معبود نہیں۔ اس طرح ان کی تکذیب کرو۔ [مصنف ابن ابي شيبه/كتاب الإيمان/حدیث: 32399]

حضرت ابن علاقہ رحمہ اللہ فرماتے ہیں کہ حضرت عبد اللہ بن یزید الانصاری رضی اللہ عنہ نے ارشاد فرمایا: تم اپنے آپ کو ان ناموں کے ساتھ مسمّٰی کرو جو اللہ نے تمہارے نام رکھے ہیں۔ حنیفی، مسلمان اور مومن۔ [مصنف ابن ابي شيبه/كتاب الإيمان/حدیث: 32400]