اشعث سے روایت ہے کہ حضرت شعبی نے فرمایا کہ جب ورثاء میں سے دو یا تین آدمی گواہی دیں تو یہ گواہی ان کی طرف سے خود اپنے خلاف اقرار ہی سمجھی جائے گی۔ [مصنف ابن ابي شيبه/كتاب الوصايا/حدیث: 33058]

حکم اور حماد حضرت ابراہیم سے روایت کرتے ہیں کہ وہ قرضہ ورثاء پر ان کے ملنے والی وراثت کے حساب سے لاگو ہوجائے گا۔ [مصنف ابن ابي شيبه/كتاب الوصايا/حدیث: 33059]

اشعث سے روایت ہے کہ حضرت حسن نے فرمایا کہ وہ دونوں گواہ مسلمان ہیں، اس لئے ان کی گواہی تمام ورثاء پر نافذ ہوگی۔ [مصنف ابن ابي شيبه/كتاب الوصايا/حدیث: 33060]

حکم سے روایت ہے کہ ابراہیم نے فرمایا کہ جب دو وارث گواہی دے دیں تو قرضہ انہی کے حصّوں میں واجب ہوگا۔ [مصنف ابن ابي شيبه/كتاب الوصايا/حدیث: 33061]

اور خود حضرت حکم فرماتے ہیں کہ وہ قرضہ سب ورثاء پر واجب ہوگا۔ [مصنف ابن ابي شيبه/كتاب الوصايا/حدیث: 33062]

منصور سے روایت ہے کہ حضرت حارث نے فرمایا کہ جب دو وارث کسی آدمی کے لئے قرضے کی گواہی دے دیں تو اس کو اس کا قرضہ دلا دیا جائے گا۔ [مصنف ابن ابي شيبه/كتاب الوصايا/حدیث: 33063]

یونس روایت کرتے ہیں کہ حضرت حسن نے فرمایا کہ جب کوئی وارث گواہی دے دے تو تمام ورثاء پر قرضہ لاگو ہوجائے گا۔ [مصنف ابن ابي شيبه/كتاب الوصايا/حدیث: 33064]

ہارون بن ابراہیم روایت کرتے ہیں کہ حضرت محمد بن سیرین سے ایک آدمی کے بارے میں پوچھا گیا جس نے کہا تھا کہ اگر مجھے کچھ ہوجائے تو میرا غلام آزاد ہے، پھر اس کو اس کے بیچنے کی ضرورت پڑگئی، کیا وہ اس کو بیچ سکتا ہے؟ فرمایا: ”جی ہاں!“ [مصنف ابن ابي شيبه/كتاب الوصايا/حدیث: 33065]

جابر سے روایت ہے کہ حضرت عامر نے اس آدمی کے بارے میں فرمایا جس نے اپنے غلام سے کہا کہ اگر میں اس بیماری میں مر جاؤں تو تو آزاد ہے، کہ اس کے لئے موت تک اس غلام کو بیچنا جائز نہیں ہے۔ [مصنف ابن ابي شيبه/كتاب الوصايا/حدیث: 33066]

ہشام سے روایت ہے کہ حضرت حسن اور محمد نے اس بات کو ناپسند کیا ہے کہ وصی وراثت کے مال میں سے کچھ خریدے۔ [مصنف ابن ابي شيبه/كتاب الوصايا/حدیث: 33067]