حضرت محمد بن عبید اللہ الثقفی رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: معاذ رضی اللہ عنہ قیامت کے دن علماء سے ایک پتھر پھینکنے کے فاصلے کے برابر آگے ہوں گے۔ [مصنف ابن ابي شيبه/كتاب الفضائل/حدیث: 34468]

حسن رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: معاذ رضی اللہ عنہ قیامت کے دن علماء سے کچھ فاصلے پر آگے ہوں گے۔ [مصنف ابن ابي شيبه/كتاب الفضائل/حدیث: 34469]

حضرت ابو قلابہ رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: یقینا ہر امت کا ایک امین ہوتا ہے۔ اور بیشک ہماری امت کا امین ابو عبیدہ بن جراح ہیں۔ [مصنف ابن ابي شيبه/كتاب الفضائل/حدیث: 34470]

حسن رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میرے صحابہ رضی اللہ عنہم میں سے کوئی ایک بھی نہیں ہے مگر یہ کہ اگر میں چاہتا تو اس کے اخلاق کی کسی بات پر گرفت کرسکتا تھا سوائے ابو عبیدہ رضی اللہ عنہ کے۔ [مصنف ابن ابي شيبه/كتاب الفضائل/حدیث: 34471]

حضرت حذیفہ رضی اللہ عنہ فرماتے ہیں کہ نبی کریم صلی اللہ علیہ وآلہ وسلم کے پاس نجران کے دو پادری آئے عاقب اور سید۔ ان دونوں نے کہا: آپ صلی اللہ علیہ وسلم ہمارے ساتھ ایسے شخص کو بھیجیں جو پوری طرح امانت دار ہو۔ تو نبی کریم صلی اللہ علیہ وآلہ وسلم کے صحابہ خواہش کرنے لگے۔ آپ صلی اللہ علیہ وسلم نے فرمایا: اے ابو عبیدہ بن جراح! تم کھڑے ہو جاؤ۔ [مصنف ابن ابي شيبه/كتاب الفضائل/حدیث: 34472]

حضرت حذیفہ رضی اللہ عنہ سے نبی کریم صلی اللہ علیہ وآلہ وسلم کا ما قبل والا ارشاد اس سند سے بھی منقول ہے۔ [مصنف ابن ابي شيبه/كتاب الفضائل/حدیث: 34473]

حضرت ابراہیم رحمہ اللہ فرماتے ہیں کہ حضرت عمر رضی اللہ عنہ کہنے لگے۔ میں کس کو خلیفہ بناؤں؟! کاش کہ ابو عبیدہ بن جراح ہوتے۔ [مصنف ابن ابي شيبه/كتاب الفضائل/حدیث: 34474]

حضرت ابو صالح رحمہ اللہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ابو عبیدہ بن جراح رضی اللہ عنہ اچھے شخص ہیں۔ [مصنف ابن ابي شيبه/كتاب الفضائل/حدیث: 34475]

حضرت عطیہ رحمہ اللہ فرماتے ہیں کہ حضرت عبادہ بن صامت رضی اللہ عنہ آئے اور فرمایا: اے اللہ کے رسول صلی اللہ علیہ وسلم ! میرے یہود میں بہت سے موالی ہیں۔ جن کی تعداد بہت زیادہ ہے۔ اور ان کی مدد موجود ہے۔ اور میں یہود کی ولایت سے اللہ اور اس کے رسول صلی اللہ علیہ وسلم کی طرف بری ہوں۔ پس اللہ رب العزت نے حضرت عبادہ رضی اللہ عنہ کے بارے میں یہ آیت اتاری: {إنَّمَا وَلِیُّکُمُ اللَّہُ وَرَسُولُہُ وَالَّذِینَ آمَنُوا } سے لے کر { بِأَنَّہُمْ قَوْمٌ لاَیَعْقِلُونَ } تک۔ [مصنف ابن ابي شيبه/كتاب الفضائل/حدیث: 34476]

حضرت عبد العزیز بن رفیع رحمہ اللہ فرماتے ہیں کہ جب حضرت علی رضی اللہ عنہ جنگ صفین میں جانے لگے تو حضرت ابو مسعود رضی اللہ عنہ کو لوگوں پر خلیفہ بنادیا۔ پس جب حضرت علی رضی اللہ عنہ واپس لوٹے تو ان سے فرمایا: کیا تو نے وہ بات کی ہے جو مجھے تمہاری طرف سے پہنچی ہے اے فروخ؟! یقینا تم بوڑھے ہو تحقیق تمہاری عقل چلی گئی۔ آپ رضی اللہ عنہ نے فرمایا: کیا میری عقل چلی گئی حالانکہ اللہ اور اس کے رسول صلی اللہ علیہ وسلم کی خاطر میرے لیے جنت واجب ہوگئی ہے؟ تم اس کو جانتے ہو۔ [مصنف ابن ابي شيبه/كتاب الفضائل/حدیث: 34477]