حضرت ابو وائل رحمہ اللہ اور ابراہیم رحمہ اللہ دونوں حضرات فرماتے ہیں کہ رسول اللہ صلی اللہ علیہ وسلم نے حضرت معاذ رضی اللہ عنہ کو یمن کا حاکم بنا کر بھیجا اور ان کو حکم دیا کہ وہ ہر بالغ سے جزیہ میں ایک دینار یا اس کے برابر معافر لیں۔ [مصنف ابن ابي شيبه/كتاب السير/حدیث: 34821]

حضرت اسلم رحمہ اللہ جو کہ حضرت عمر رضی اللہ عنہ کے آزاد کردہ غلام ہیں فرماتے ہیں کہ حضرت عمر رضی اللہ عنہ نے جزیہ وصول کرنے والے امیروں کی طرف خط لکھا: تم جزیہ مقرر نہ کرو مگر اس شخص پر جو بالغ ہو اور تم بچوں اور عورتوں پر بھی جزیہ مقرر مت کرو۔ راوی فرماتے ہیں کہ حضرت عمر رضی اللہ عنہ جزیہ دینے والوں کی گردنوں میں مہر لگاتے تھے۔ [مصنف ابن ابي شيبه/كتاب السير/حدیث: 34822]

حضرت لیث رحمہ اللہ فرماتے ہیں کہ حضرت مجاہد رحمہ اللہ نے ارشاد فرمایا: بتوں کے پجاریوں سے اسلام کی بنیاد پر قتال کیا جائے گا، اور اہل کتاب سے جزیہ کی بنیاد پر قتال کیا جائے گا۔ [مصنف ابن ابي شيبه/كتاب السير/حدیث: 34823]

حضرت مسروق رحمہ اللہ فرماتے ہیں کہ جب رسول اللہ صلی اللہ علیہ وسلم نے حضرت معاذ رضی اللہ عنہ کو یمن کا حاکم بنا کر بھیجا تو ان کو حکم دیا کہ وہ ہر بالغ سے ایک دینار یا اس کے برابر معافر لیں۔ [مصنف ابن ابي شيبه/كتاب السير/حدیث: 34824]

حضرت ابو مجلز رحمہ اللہ فرماتے ہیں کہ حضرت عمر رضی اللہ عنہ نے ہر شخص پر سال میں چوبیس درہم مقرر فرمائے۔ اور عورتوں اور بچوں سے ہٹا دیا۔ [مصنف ابن ابي شيبه/كتاب السير/حدیث: 34825]

حضرت اسلم رحمہ اللہ جو کہ حضرت عمر رضی اللہ عنہ کے آزاد کردہ غلام ہیں فرماتے ہیں کہ حضرت عمر رضی اللہ عنہ نے اپنے تمام گورنروں کو خط لکھا: کہ عورتوں اور بچوں سے جزیہ وصول نہ کرو، اور نہ وصول کرو مگر بالغ شخص سے، اور ان کی گردنوں پر مہر لگا دو۔ اور جزیہ ان کے سروں پر (فی کس) مقرر کرو۔ چاندی والوں پر چالیس درہم لازم ہیں۔ اور اس کے ساتھ مسلمانوں کی تنخواہیں بھی۔ اور سونے والوں پر چار دینار لازم ہیں۔ اور شام والوں پر ایک مدی گندم، اور تین قسط زیتون کا تیل، اور مصر والوں پر ایک اردب گندم، کپڑوں کے جوڑے، اور شہد۔ حضرت نافع رحمہ اللہ ان کی مقدار محفوظ نہ رکھ سکے کہ مقدار کتنی مقرر فرمائی۔ اور عراق والوں پر پندرہ صاع گندم۔ [مصنف ابن ابي شيبه/كتاب السير/حدیث: 34826]

راوی کہتے ہیں: حضرت عبید اللہ رحمہ اللہ نے فرمایا: انہوں نے کپڑوں کے جوڑے بھی ذکر فرمائے جو مجھے یاد نہیں رہے۔ [مصنف ابن ابي شيبه/كتاب السير/حدیث: 34827]

حضرت طاؤس رحمہ اللہ فرماتے ہیں کہ حضرت ابراہیم بن سعد رحمہ اللہ نے حضرت ابن عباس رضی اللہ عنہما سے ذمیوں سے لیے جانے والے اموال کے متعلق پوچھا؟ آپ رضی اللہ عنہ نے فرمایا: ضرورت سے زائد۔ [مصنف ابن ابي شيبه/كتاب السير/حدیث: 34828]

حضرت عنترہ ابو وکیع رحمہ اللہ فرماتے ہیں کہ حضرت علی رضی اللہ عنہ جزیہ میں سامان وصول کرتے تھے، سوئی والوں سے سوئیاں، بڑی سوئی والوں سے بڑی سوئیاں، اور رسی ساز سے رسی وصول کرتے تھے۔ [مصنف ابن ابي شيبه/كتاب السير/حدیث: 34829]

حضرت ابو عون محمد بن عبید اللہ الثقفی رحمہ اللہ فرماتے ہیں کہ حضرت عمر نے آدمیوں کی حالت کے اعتبار سے ان پر جزیہ مقرر فرمایا: مالدار پر اڑتالیس درہم، متوسط آدمی پر چوبیس درہم اور فقیر پر بارہ درہم۔ [مصنف ابن ابي شيبه/كتاب السير/حدیث: 34830]