حضرت حکم رحمہ اللہ فرماتے ہیں کہ حضرت علی رضی اللہ عنہ نے مرتد کی میراث کو اس کے مسلمان ورثہ کے درمیان تقسیم فرمایا۔ [مصنف ابن ابي شيبه/كتاب السير/حدیث: 34961]

حضرت قاسم بن عبد الرحمن رحمہ اللہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: جب مرتد کو قتل کردیا جائے تو اس کی اولاد اس کی وارث بنے گی۔ [مصنف ابن ابي شيبه/كتاب السير/حدیث: 34962]

حضرت جریر بن حازم رحمہ اللہ فرماتے ہیں کہ حضرت عمر بن عبد العزیز رحمہ اللہ نے مرتد کی وراثت کے بارے میں یوں خط لکھا۔ یہ اس کے مسلمان ورثاء کے لیے ہے۔ اور اس کے دین والوں کو کچھ بھی نہیں ملے گا۔ [مصنف ابن ابي شيبه/كتاب السير/حدیث: 34963]

حضرت ابو الصباح رحمہ اللہ فرماتے ہیں کہ میں نے حضرت سعید بن المسیب رحمہ اللہ کو ارشاد فرماتے ہوئے سنا: کہ مرتد کے ہم وارث بنیں گے وہ ہمارے وارث نہیں بنیں گے۔ [مصنف ابن ابي شيبه/كتاب السير/حدیث: 34964]

حضرت موسیٰ بن ابی کثیر رحمہ اللہ فرماتے ہیں کہ میں نے حضرت سعید بن المسیب رحمہ اللہ سے مرتد کی وراثت کے بارے میں سوال کیا کہ جب اسے قتل کردیا جائے تو کیا وہ پہنچائی جائے گی؟ آپ رحمہ اللہ نے فرمایا: پہنچائے جانے کا کیا مطلب؟ راوی کہتے ہیں: میں نے عرض کیا کہ اس کے ورثہ وارث بنیں گے؟ آپ رحمہ اللہ نے فرمایا: ہم مسلمان تو اس کے وارث بنیں گے وہ ہم مسلمانوں کے وارث نہیں بن سکتے۔ [مصنف ابن ابي شيبه/كتاب السير/حدیث: 34965]

حضرت قتادہ رحمہ اللہ فرماتے ہیں کہ حضرت حسن رحمہ اللہ نے ارشاد فرمایا: مرتد کو قتل کردیا جائے گا۔ اور اس کی میراث مسلمان ورثہ کے درمیان تقسیم ہوگی۔ [مصنف ابن ابي شيبه/كتاب السير/حدیث: 34966]

حضرت اشعث رحمہ اللہ فرماتے ہیں کہ حضرت امام شعبی رحمہ اللہ اور حضرت حکم رحمہ اللہ ان دونوں حضرات نے ارشاد فرمایا: مرتد کی میراث اس کی بیوی اور اس کے مسلمان ورثاء کے درمیان تقسیم کی جائے گی۔ [مصنف ابن ابي شيبه/كتاب السير/حدیث: 34967]

حضرت خلاس رحمہ اللہ فرماتے ہیں حضرت علی رضی اللہ عنہ نے مرتدہ عورت کے بارے میں ارشاد فرمایا: اس کو باندی بنا لیا جائے گا۔ [مصنف ابن ابي شيبه/كتاب السير/حدیث: 34968]

اور حضرت حماد رحمہ اللہ نے فرمایا: اس کو قتل کردیا جائے گا۔ [مصنف ابن ابي شيبه/كتاب السير/حدیث: 34969]

حضرت ابو رزین رحمہ اللہ فرماتے ہیں کہ حضرت ابن عباس رضی اللہ عنہما نے ارشاد فرمایا: جب عورتیں اسلام سے مرتد ہوجائیں تو ان کو قتل نہیں کیا جائے گا بلکہ ان کو قید کردیا جائے گا اور اسلام کی طر ف بلایا جائے گا اور اسلام پر ان کو مجبور کیا جائے گا۔ [مصنف ابن ابي شيبه/كتاب السير/حدیث: 34970]