حضرت عاصم رحمہ اللہ فرماتے ہیں کہ حضرت حسن رحمہ اللہ نے یہ آیت تلاوت فرمائی۔ صرف یہی سزا ہے ان لوگوں کی جو اللہ اور اس کے رسول صلی اللہ علیہ وسلم سے لڑائی کرتے ہیں۔ اور فرمایا: یہ اختیار امام کو ہے۔ [مصنف ابن ابي شيبه/كتاب السير/حدیث: 35001]

حضرت عمر بن عبدالعزیز فرماتے ہیں کہ سلطان اس شخص کے قتل کا نگران ہے جو دین کے خلاف جنگ کرے، اگرچہ اس نے کسی آدمی کے بھائی اور باپ کو قتل کیا ہو۔ جو دین کے خلاف جنگ کرے اور زمین میں فساد پھیلانے کی کوشش کرے اس پر سلطان کے علاوہ کسی کو اختیار نہیں۔ جب حدود امام کے پاس پہنچ جائیں تو ان کی معافی کی کوئی صورت نہیں اور ان کا قائم کرنا سنت ہے۔ [مصنف ابن ابي شيبه/كتاب السير/حدیث: 35002]

حضرت قتادہ رحمہ اللہ فرماتے ہیں کہ حضرت سعید بن المسیب رحمہ اللہ نے محارب کے بارے میں ارشاد فرمایا: کہ جب اس کو امام کے پاس لے گئے تو اس کو اختیار ہے کہ جو چاہے اس کے ساتھ معاملہ کرے۔ [مصنف ابن ابي شيبه/كتاب السير/حدیث: 35003]

حضرت نافع رحمہ اللہ فرماتے ہیں کہ حضرت ابن عمر رضی اللہ عنہما سے ان کے ایک بیٹے یا بھائی نے جہاد کے لیے جانے کے بارے میں سوال کیا تو انہوں نے فرمایا کہ وہ جائے اور واپس آجائے یہ مجھے زیادہ پسند ہے۔ [مصنف ابن ابي شيبه/كتاب السير/حدیث: 35004]

حضرت لیث رحمہ اللہ فرماتے ہیں کہ حضرت مجاہد رحمہ اللہ نے ارشاد فرمایا: مقتول کے ساتھ موزے اور چپل دفن نہیں کیے جائیں گے۔ [مصنف ابن ابي شيبه/كتاب السير/حدیث: 35005]

حضرت مغیرہ رحمہ اللہ فرماتے ہیں کہ حضرت ابراہیم رحمہ اللہ نے ارشاد فرمایا: مقتول سے پوستین لگا کپڑا، جرابیں، اور بڑے موزے اور چھوٹے موزے سب چیزیں اتار لی جائیں گی مگر یہ کہ دونوں جرابیں کفن کو پورا کریں تو ان دونوں کو چھوڑ دیا جائے گا۔ [مصنف ابن ابي شيبه/كتاب السير/حدیث: 35006]

حضرت عیزار بن حریث العبدی رحمہ اللہ فرماتے ہیں کہ حضرت زید بن صوحان رحمہ اللہ نے ارشاد فرمایا: کہ میرے کپڑے مت اتارنا مگر موزے اتار لینا۔ [مصنف ابن ابي شيبه/كتاب السير/حدیث: 35007]

حضرت ہشام بن حسان رحمہ اللہ فرماتے ہیں کہ امام محمد بن سیرین رحمہ اللہ سے جب شہید کو غسل دینے کے بارے میں پوچھا جاتا؟ تو آپ رحمہ اللہ حضرت حجر بن عدی رحمہ اللہ کے حوالہ سے نقل فرماتے کہ جب حضرت معاویہ رضی اللہ عنہ نے ان کو قتل کیا تو حضرت حجر رحمہ اللہ نے فرمایا: تم لوگ میری لوہے کی بیڑیاں مت کھولنا۔ اور نہ ہی میرے خون کو دھونا اور مجھے میری بیڑیوں اور میرے خون لگے رہنے کی حالت میں ہی دفن کرنا۔ پس میں کل حضرت معاویہ رضی اللہ عنہ سے شاہراہ پر ملوں گا۔ [مصنف ابن ابي شيبه/كتاب السير/حدیث: 35008]

حضرت یحییٰ بن عابس رحمہ اللہ نے حضرت قیس بن ابی حازم رحمہ اللہ کو بتایا کہ حضرت عمار بن یاسر رضی اللہ عنہ نے ارشاد فرمایا: تم لوگ مجھے میرے کپڑوں ہی میں دفن کرنا پس میں جھگڑالو ہوں گا۔ [مصنف ابن ابي شيبه/كتاب السير/حدیث: 35009]

حضرت یحییٰ بن عابس رحمہ اللہ سے بھی حضرت عمار بن یاسر رضی اللہ عنہ کا مذکورہ ارشاد اس سند سے منقول ہے۔ [مصنف ابن ابي شيبه/كتاب السير/حدیث: 35010]