حضر ت عمران بن حدیر رحمہ اللہ فرماتے ہیں کہ حضرت ابو مجلز رحمہ اللہ نے اس آیت کے بارے میں: ترجمہ: صرف یہی جزاء ہے ان لوگوں کی جو اللہ اور اس کے رسول صلی اللہ علیہ وسلم سے جنگ کرتے ہیں۔ آپ رحمہ اللہ نے یوں ارشاد فرمایا: جب یہ آدمی قتل کرے اور مال بھی لے لے۔ تو ا س کو قتل کردیا جائے گا اور جب مال چھین لے اور راستہ کو پرخطر بنا دے تو اس کو سولی دی جائے گی۔ اور جب قتل کرے اور اس سے آگے نہ بڑھے تو اس کو قتل کردیا جائے گا۔ اور جب مال چھین لے اور یہ قتل نہ کرے تو اس کے ہاتھ پاؤں کاٹے جائیں گے۔ اور جب فساد پھیلائے تو اس کو ملک سے نکال دیا جائے گا۔ [مصنف ابن ابي شيبه/كتاب السير/حدیث: 34991]

حضرت حماد رحمہ اللہ فرماتے ہیں کہ حضرت ابراہیم رحمہ اللہ نے اس آیت: {إنَّمَا جَزَائُ الَّذِینَ یُحَارِبُونَ اللَّہَ وَرَسُولَہُ } کے بارے میں یوں ارشاد فرمایا: جب وہ نکل جائے اور راستہ کو پُر خطر بنا دے اور مال چھین لے۔ تو اس کا ایک ہاتھ اور ایک ٹانگ مخالف سمت سے کاٹ دی جائے گی۔ اور جب وہ راستہ کو پُر خطر بنا دے اور مال نہ چھینے تو اس کو ملک سے نکال دیا جائے گا۔ اور جب وہ قتل بھی کر دے تو اس کو بھی قتل کیا جائے گا اور جب وہ راستہ کو پُر خطر بنا دے اور مال چھین لے، اور قتل کر دے تو اس کو سولی دی جائے گی۔ [مصنف ابن ابي شيبه/كتاب السير/حدیث: 34992]

حضرت ابن جریج رحمہ اللہ فرماتے ہیں کہ مجھے حضرت سعیدبن جبیر رحمہ اللہ کے حوالے سے نقل کیا گیا ہے کہ آپ رحمہ اللہ نے ارشاد فرمایا: جو لڑائی کرے وہ محارب ہے۔ پھر آپ رحمہ اللہ نے فرمایا: اگر وہ خون کر دے تو اس کو قتل کیا جائے گا اور اگر وہ خون کر دے اور مال بھی چھین لے تو اس کو صولی دی جائے گی پس بیشک صولی دینا زیادہ سخت ہے، اور جب وہ مال چھین لے اور خون نہ کرے تو اس کا ایک ہاتھ اور ایک ٹانگ کاٹ دی جائے گی اللہ رب العزت کے اس قول کی وجہ سے: ترجمہ: یا ان کے ہاتھ اور ان کی ٹانگیں مخالف سمت سے کاٹ دی جائیں گی۔ پس اگر وہ توبہ کرلے تو اس کی توبہ اس کے اور اللہ کے درمیان ہوگی اور اس پر حد قائم کی جائے گی۔ [مصنف ابن ابي شيبه/كتاب السير/حدیث: 34993]

حضرت قتادہ رحمہ اللہ فرماتے ہیں کہ حضرت مورّق عجلی رحمہ اللہ نے ارشاد فرمایا: جب لڑائی کرنے والے کو پکڑ لیا جائے تو اس کو امیر کے پاس لے جایا جائے گا، پس اگر اس نے مال چھینا ہو اور قتل نہ کیا ہو تو اس کے ہاتھ اور پاؤں کاٹ دیے جائیں گے اور اس کو قتل نہیں کیا جائے گا اور اگر اس نے مال چھینا تھا اور قتل بھی کردیا تھا تو اس کو قتل کیا جائے گا اور سولی دی جائے گی، اور اگر اس نے مال نہیں چھینا اور قتل نہیں کیا تو اس کے ہاتھ اور پاؤں بھی نہیں کاٹے جائیں گے اور اگر اس نے مال نہیں چھینا اور نہ قتل کیا صر ف مسلمانوں کو تنگ کیا ہو تو اس کو ملک سے نکال دیا جائے گا۔ [مصنف ابن ابي شيبه/كتاب السير/حدیث: 34994]

حضرت ابن جریج رحمہ اللہ فرماتے ہیں کہ حضرت عطاء رحمہ اللہ نے ارشاد فریایا: محاربہ یعنی اللہ اور اس کے رسول صلی اللہ علیہ وسلم سے جنگ، شرک کرنا ہے۔ [مصنف ابن ابي شيبه/كتاب السير/حدیث: 34995]

حضرت مجاہد رحمہ اللہ، حضرت عطاء رحمہ اللہ، حضرت حسن رحمہ اللہ اور حضرت ضحاک رحمہ اللہ یہ سب حضرات فرماتے ہیں کہ امام کو محارب کے بارے میں اختیار دیا گیا ہے۔ [مصنف ابن ابي شيبه/كتاب السير/حدیث: 34996]

حضرت قاسم بن ابی بزہ رحمہ اللہ سے بھی حضرت مجاہد رحمہ اللہ کا یہی قول منقول ہے۔ [مصنف ابن ابي شيبه/كتاب السير/حدیث: 34997]

حضرت لیث رحمہ اللہ سے بھی حضرت عطاء رحمہ اللہ کے واسطے سے حضرت مجاہد رحمہ اللہ کا یہی قول منقول ہے۔ [مصنف ابن ابي شيبه/كتاب السير/حدیث: 34998]

حضرت ابو حرہ رحمہ اللہ سے بھی حسن رحمہ اللہ کا یہی قول منقول ہے۔ [مصنف ابن ابي شيبه/كتاب السير/حدیث: 34999]

حضرت جویبر رحمہ اللہ حضرت ضحاک رحمہ اللہ سے نقل کرتے ہیں۔ ان سب حضرات نے ارشاد فرمایا: امام کو محارب کے بارے میں اختیار ہے۔ [مصنف ابن ابي شيبه/كتاب السير/حدیث: 35000]