حضرت ابو اسحاق رحمہ اللہ فرماتے ہیں کہ میں حضرت یسیر بن عمرو کے پاس اٹھ کر گیا اور میں نے عرض کیا: کیا آپ دیکھتے نہیں جو عمرو بن ابی قرہ نے مجھے بیان کیا ہے؟ اور میں نے وہ بات ان سے بیان کی۔ آپ نے فرمایا: اس نے سچ کہا، حضرت عمر رضی اللہ عنہ کا خط یہی لے کر آیا تھا۔ [مصنف ابن ابي شيبه/كتاب السير/حدیث: 35031]

حضرت ابن ابی ذئب رحمہ اللہ فرماتے ہیں کہ امام زہری رحمہ اللہ نے ارشاد فرمایا: قیدی کے مال کو اور اس کی بیوی کو روک لیا جائے گا یہاں تک کہ ان دونوں کو سپرد کردیا جائے گا یا وہ دونوں مرجائیں۔ [مصنف ابن ابي شيبه/كتاب السير/حدیث: 35032]

امام اوزاعی رحمہ اللہ فرماتے ہیں کہ میں نے حضرت زہری رحمہ اللہ سے اس شخص کے بارے میں سوال کیا جس کو دشمن کی زمین میں قیدی بنا لیا گیا ہو کہ اس کی بیوی کب نکاح کرے گی؟ آپ رحمہ اللہ نے فرمایا: وہ نکاح نہیں کرسکتی جب تک اسے اس کا زندہ ہونا معلوم ہو۔ [مصنف ابن ابي شيبه/كتاب السير/حدیث: 35033]

حضرت ہشام رحمہ اللہ فرماتے ہیں کہ حضرت حسن رحمہ اللہ نے دشمن کے قبضہ میں موجود قیدی کے بارے میں ارشاد فرمایا: اگر وہ کسی کو کوئی عطیہ دے یا کسی کو اپنی مرضی سے کوئی چیز دے اور اپنے ثلث مال کی وصیت کر دے تو جائز ہے۔ [مصنف ابن ابي شيبه/كتاب السير/حدیث: 35034]

حضرت ابن ابی ذئب رحمہ اللہ فرماتے ہیں کہ امام زہری رحمہ اللہ نے ارشاد فرمایا: کہ قیدی کے لیے اپنے مال میں صرف ثلث کی وصیت کرنا جائز ہے۔ [مصنف ابن ابي شيبه/كتاب السير/حدیث: 35035]

حضرت شعبی رحمہ اللہ فرماتے ہیں کہ حضرت شریح رحمہ اللہ نے ارشاد فرمایا: اس کی میراث کا سب سے زیادہ محتاج تو وہ قیدی ہے۔ [مصنف ابن ابي شيبه/كتاب السير/حدیث: 35036]

حضرت قتادہ رحمہ اللہ فرماتے ہیں کہ حضرت حسن رحمہ اللہ نے قیدی کے وارث بننے کے بارے میں ارشاد فرمایا: بیشک وہ اس وراثت کا محتاج ہے۔ [مصنف ابن ابي شيبه/كتاب السير/حدیث: 35037]

حضرت ابن بی ذئب رحمہ اللہ فرماتے ہیں کہ امام زہری رحمہ اللہ نے ارشاد فرمایا: قیدی وارث بنے گا۔ [مصنف ابن ابي شيبه/كتاب السير/حدیث: 35038]

حضرت قتادہ رحمہ اللہ فرماتے ہیں کہ حضرت سعید بن المسیب رحمہ اللہ نے ارشاد فرمایا: قیدی وارث بنے گا۔ [مصنف ابن ابي شيبه/كتاب السير/حدیث: 35039]

حضرت سفیان رحمہ اللہ اس شخص سے نقل کرتے ہیں جس نے حضرت ابراہیم رحمہ اللہ کو یوں فرماتے ہوئے سنا کہ قیدی وارث نہیں بنے گا۔ [مصنف ابن ابي شيبه/كتاب السير/حدیث: 35040]