حضرت اسلم رحمہ اللہ جو حضرت عمر رضی اللہ عنہ کے آزاد کردہ غلام ہیں فرماتے ہیں کہ حضر ت عمر رضی اللہ عنہ نے اپنے گورنروں کو خط لکھ کر انہیں عورتوں اور بچوں کے قتل کرنے سے منع کیا۔ اور ان کو حکم دیا کہ وہ بالغوں کو قتل کردیں۔ [مصنف ابن ابي شيبه/كتاب السير/حدیث: 35341]

حضرت ابو الزبیر رحمہ اللہ فرماتے ہیں کہ حضرت جابر بن عبد اللہ رضی اللہ عنہ نے ارشاد فرمایا: کہ صحابہ رضی اللہ عنہ م مشرکین کے تاجروں کو قتل نہیں کرتے تھے۔ [مصنف ابن ابي شيبه/كتاب السير/حدیث: 35342]

حضرت اسود بن سریع رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: لوگوں کو کیا ہوا کہ انہوں نے قتل میں مبالغہ کیا یہاں تک کہ انہوں نے بچوں کو بھی قتل کردیا؟! اس پر قوم میں سے ایک شخص بولا: وہ تو مشرکین کے بچے تھے۔ رسول اللہ صلی اللہ علیہ وسلم نے فرمایا: کیا تمہارے میں جو بہترین لوگ ہیں کیا وہ مشرکین کی اولاد میں سے نہیں ہیں؟! بیشک کوئی بھی بچہ پیدا نہیں ہوتا مگر فطرت اسلام پر یہاں تک کہ جب وہ بالغ ہوتا ہے تو اظہار ما فی الضمیر کرتا ہے، یا اس کے والدین اس کو یہودی یا نصرانی بنا دیتے ہیں۔ [مصنف ابن ابي شيبه/كتاب السير/حدیث: 35343]

حضرت ابن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم جب لشکروں کو بھیجتے تو فرماتے کہ عبادت گاہوں میں موجود لوگوں کو قتل مت کرنا۔ [مصنف ابن ابي شيبه/كتاب السير/حدیث: 35344]

حضرت جویبر رحمہ اللہ فرماتے ہیں کہ حضر ت ضحاک رحمہ اللہ نے ارشاد فرمایا: کہ عورت اور بہت بوڑھے کو قتل کرنے سے روکا جاتا تھا۔ [مصنف ابن ابي شيبه/كتاب السير/حدیث: 35345]

حضرت ابوبکر رضی اللہ عنہ نے ایک لشکر روانہ کیا اور اسے فرمایا کہ اللہ کے نام کے ساتھ جہاد کرو۔ اے اللہ! ان کی موت کو اپنے راستے کی شہادت بنا دے پھر فرمایا تم ایسے لوگوں کے پاس پہنچو گے جو اپنی عبادت گاہوں میں ہوں گے، انہیں اور جس کام میں انہوں نے اپنے آپ کو لگا رکھا ہے اسے چھوڑ دو۔ اور تم ایسے لوگوں کے پاس پہنچو گے جنہوں نے اپنے سروں کے درمیانی حصے پٹیوں کی طرح مونڈ رکھے ہوں گے، تو ان کے سروں کے مونڈے ہوئے درمیانی حصے پر مارو۔ [مصنف ابن ابي شيبه/كتاب السير/حدیث: 35346]

حضرت راشدبن سعد رحمہ اللہ فرماتے ہیں کہ رسول اللہ صلی اللہ علیہ وسلم نے عورتوں، بچوں اور اس بڑے بوڑھے کو جس میں بالکل دم نہ ہو قتل کرنے سے منع فرمایا۔ [مصنف ابن ابي شيبه/كتاب السير/حدیث: 35347]

حضرت صفوان بن عسال رضی اللہ عنہ فرماتے ہیں کہ نبی کریم صلی اللہ علیہ وآلہ وسلم جب لشکر روانہ کرتے تو فرماتے کسی بچہ کو قتل مت کرنا۔ [مصنف ابن ابي شيبه/كتاب السير/حدیث: 35348]

حضرت صعب بن جثّامہ رضی اللہ عنہ فرماتے ہیں کہ رسول اللہ صلی اللہ علیہ وسلم سے پوچھا گیا: مشرکین کے گھروں سے اس گھر کے بارے میں جن پر رات کے وقت حملہ کیا جاتا ہے اس حال میں کہ ان میں عورتیں اور بچے بھی ہوتے ہیں؟ آپ صلی اللہ علیہ وسلم نے فرمایا: وہ ان ہی میں سے ہیں۔ [مصنف ابن ابي شيبه/كتاب السير/حدیث: 35349]

حضرت سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مشرکین کے بوڑھوں کو قتل کرو۔ اور جو بچے آغاز جوانی کو پہنچ چکے ہیں ان کو زندہ چھوڑ دو۔ [مصنف ابن ابي شيبه/كتاب السير/حدیث: 35350]