حضرت زید بن ارقم رضی اللہ عنہ فرماتے ہیں کہ رسول اکرم صلی اللہ علیہ وسلم پر سب سے پہلے حضرت علی رضی اللہ عنہ اسلام لائے۔ [مصنف ابن ابي شيبه/كتاب التاريخ/حدیث: 36144]

راوی فرماتے ہیں کہ ابراہیم رحمہ اللہ کے سامنے اس کا ذکر ہوا تو انہوں نے اس کا انکار کیا اور فرمایا: ابوبکر۔ [مصنف ابن ابي شيبه/كتاب التاريخ/حدیث: 36145]

حضرت سالم رحمہ اللہ فرماتے ہیں کہ میں نے حضرت ابن الحنفیہ سے عرض کیا لوگوں میں حضرت ابوبکر پہلے اسلام لانے والے ہیں؟ فرمایا کہ نہیں۔ [مصنف ابن ابي شيبه/كتاب التاريخ/حدیث: 36146]

حضرت مجاہد رحمہ اللہ فرماتے ہیں کہ سب سے پہلے اسلام کا اظہار کرنے والے سات خوش نصیب ہیں، رسول اکرم صلی اللہ علیہ وسلم ، حضرت ابوبکر، حضرت بلال، حضرت خباب، حضرت صہیب، حضرت عمار اور حضرت عمار کی والدہ حضرت سمیہ رضی اللہ عنہم حضور اکرم صلی اللہ علیہ وسلم کو تکلیف دینے سے ان کے چچا نے روکا ہوا تھا اور حضرت ابوبکر رضی اللہ عنہ کو تکلیف دینے سے ان کی قوم والوں نے باقی لوگوں کو کفار نے پکڑ لیا اور لوہے کی زرہیں پہنا کر ان کو سورج کی تپش میں جھلسنے کے لئے ڈال دیا یہاں تک کہ مشقت انتہا کو پہنچ گئی۔ پھر جو کفار نے مانگا وہ انہوں نے ان کو دے دیا پھر ان میں سے ہر ایک کے پاس ان کی قوم کے لوگ آئے چمڑے کے بچھونے لے کر جن میں پانی تھا، انہوں نے ان کو ان میں ڈال دیا اور پھر ان کے پہلوؤں سے پکڑ کر اٹھایا سوائے حضرت بلال رضی اللہ عنہ کے جب شام ہوئی تو ابو جہل آیا اور اس نے حضرت سمیہ رضی اللہ عنہا کو گالیاں دینا اور فحش باتیں کہنا شروع کردیا اور ان کی شرم گاہ میں نیزہ مار کر شہید کردیا، یہ پہلی شہیدہ تھیں جو اسلام میں شہید ہوئیں سوائے حضرت بلال رضی اللہ عنہ کے ان کو اللہ کی راہ میں اپنی جان کی کوئی پروا نہ رہی یہاں تک کہ کفار بھی تنگ آ کر اکتا گئے، انہوں نے حضرت بلال رضی اللہ عنہ کی گردن میں رسی ڈال دی اور پھر اپنے بچوں کو حکم دیا تو وہ ان کو لے کر مکہ کے دونوں پہاڑوں کے درمیان دوڑاتے اور حضرت بلال رضی اللہ عنہ احد احد فرماتے جاتے۔ [مصنف ابن ابي شيبه/كتاب التاريخ/حدیث: 36147]

حضرت شعبی رحمہ اللہ فرماتے ہیں کہ جو انہوں نے مانگا ان کو دیا سوائے حضرت خباب رضی اللہ عنہ کے وہ ان کی پشت کو گرم پتھر کے ساتھ لگاتے اور آپ کو اذیت دیتے یہاں تک کہ آپ رضی اللہ عنہ کی پشت کی رطوبت ختم ہوگیا۔ [مصنف ابن ابي شيبه/كتاب التاريخ/حدیث: 36148]

حضرت طارق بن شہاب رضی اللہ عنہ فرماتے ہیں کہ حضرت خباب رضی اللہ عنہ مہاجرین میں سے تھے اور ان کو اللہ کی راہ میں بہت تکالیف دی گئیں۔ [مصنف ابن ابي شيبه/كتاب التاريخ/حدیث: 36149]

حضرت کردوس رحمہ اللہ فرماتے ہیں کہ حضرت خباب بن الارت چھٹے نمبر پر اسلام لانے والوں میں سے تھے آپ کیلئے اسلام کا چھٹا حصہ تھا۔ [مصنف ابن ابي شيبه/كتاب التاريخ/حدیث: 36150]

حضرت براء رضی اللہ عنہ فرماتے ہیں کہ غزوہ بدر کے دن مجھے اور حضرت ابن عمر رضی اللہ عنہما کو نبی کریم صلی اللہ علیہ وسلم کے سامنے پیش کیا گیا آپ نے ہمیں چھوٹا سمجھا، پھر ہم دونوں غزوہ احد میں شریک ہوئے۔ [مصنف ابن ابي شيبه/كتاب التاريخ/حدیث: 36151]

حضرت عاصم رحمہ اللہ فرماتے ہیں کہ حضرت صبیح نے ابو عثمان سے دریافت کیا کہ آپ نے حضور صلی اللہ علیہ وسلم کی زیارت کی تھی؟ انہوں نے فرمایا: میں نبی کریم صلی اللہ علیہ وسلم کے زمانے میں مسلمان ہوگیا تھا اور تین دفعہ ان کو زکوٰۃ بھی ادا کی لیکن ان سے ملاقات نہ ہوسکی۔ [مصنف ابن ابي شيبه/كتاب التاريخ/حدیث: 36152]

حضرت سوید بن غفلہ رحمہ اللہ فرماتے ہیں کہ ہمارے پاس رسول اکرم صلی اللہ علیہ وسلم کا صدقہ وصول کرنے والا آیا۔ [مصنف ابن ابي شيبه/كتاب التاريخ/حدیث: 36153]