حضرت خثیمہ رحمہ اللہ فرماتے ہیں کہ عیسیٰ بن مریم علیہ السلام اور یحییٰ علیہ السلام دونوں خالہ زاد تھے اور عیسیٰ علیہ السلام اون کا کپڑا پہنتے تھے اور یحییٰ علیہ السلام اونٹ کے بالوں کا کپڑا پہنتے تھے اور ان میں سے کسی کے پاس بھی نہ کوئی درہم ہوتا تھا اور نہ ہی دینار ہوتا تھا اور نہ ہی کوئی غلام ہوتا تھا اور نہ ہی کوئی باندی ہوتی تھی اور نہ ہی کوئی ایسا ٹھکانہ ہوتا تھا کہ جہاں وہ پناہ گزین ہوسکیں۔ جس جگہ بھی رات ہوجاتی وہیں ٹھہر جاتے۔ پھر جب انہوں نے جدا ہونے کا ارادہ کیا تو یحییٰ علیہ السلام نے عیسیٰ علیہ السلام سے عرض کیا کہ مجھے کوئی وصیت کردیں تو انہوں نے کہا کہ غصہ مت کرنا تو یحییٰ علیہ السلام نے کہا کہ میں غصہ کرنے پر قابو نہیں کرسکتا تو عیسیٰ علیہ السلام نے کہا کہ مال کو جمع مت کرنا تو یحییٰ علیہ السلام نے جواب دیا کہ البتہ یہ کام شاید ہوسکے۔ [مصنف ابن ابي شيبه/كتاب الزهد/حدیث: 38464]

حضرت قتادہ رحمہ اللہ سے قرآن پاک کی آیت { بِکَأْسٍ مِنْ مَعِینٍ } کی تفسیر میں منقول ہے کہ یہ گلاس بہتی ہوئی شراب سے پر ہوں گے۔ [مصنف ابن ابي شيبه/كتاب الزهد/حدیث: 38465]

حضرت ابوالعلاء رحمہ اللہ فرماتے ہیں کہ آپ صلی اللہ علیہ وسلم کے صحابہ میں سے کسی کی وفات کا وقت قریب آیا تو کہنے لگا کہ ہائے افسوس، ہائے افسوس۔ ان سے پوچھا گیا آپ کس بات پر افسوس کررہے ہیں تو اس نے جواب دیا کہ میں نے رسول اللہ صلی اللہ علیہ وسلم سے پوچھا کہ مجھ کو دنیا میں کیا چیز کافی ہوگی تو آپ صلی اللہ علیہ وسلم نے جواب دیا کہ ایک غلام اور ایک سواری۔ پس نہ تو میں خاموش ہی رہا کہ سوال نہ کرتا اور نہ جس وقت میں نے سوال کیا اس پر عمل کیا اور میں نے دنیا حاصل کی اور میری ملک میں اتنا اتنا مال ہے اور مجھ کو موت نے آن گھیرا ہے۔ [مصنف ابن ابي شيبه/كتاب الزهد/حدیث: 38466]

حضرت مجاہد رحمہ اللہ فرماتے ہیں کہ اس امت کے بارے میں یہ آیت نازل ہوئی { قل أَؤُنَبِّئُکُمْ بِخَیْرٍ مِنْ ذَلِکُمْ } تو عمر رضی اللہ عنہ نے فرمایا کہ اے اللہ اس وقت۔ [مصنف ابن ابي شيبه/كتاب الزهد/حدیث: 38467]

حضرت محمد بن واسع فرماتے ہیں کہ میں مکہ سے آیا تو خندق پر ایک پل تھا، وہاں مجھے پکڑ لیا گیا اور مروان بن مہلب کے پاس لے جایا گیا جو بصرہ کے امیر تھے۔ انہوں نے مجھے مرحبا کہا اور فرمایا اے ابوعبداللہ آپ کی کوئی حاجت ہو؟ میں نے کہا کہ میری حاجت یہ ہے کہ اگر آپ طاقت رکھیں تو اسی طرح ہوجائیں کہ جس طرح بنی عدی کے بھائی نے کہا تھا۔ انہوں نے سوال کیا کہ بنی عدی کے بھائی کون ہیں؟ تو میں نے جواب دیا کہ ”علاء بن زیاد“ ہیں۔ ان کے کسی دوست کو ایک مرتبہ کسی کام پر عامل مقرر کیا گیا تو انہوں نے اسے لکھا کہ ”اما بعد“ اگر تو طاقت رکھے کہ تو رات اس حالت میں گزارے کہ تیری کمر ہلکی ہو اور تیرا پیٹ خالی ہو اور تیری ہتھیلیاں مسلمانوں کے خون اور اموال سے پاک ہوں تو اگر تو نے یہ کام کرلیا تو تجھ پر کوئی راستہ نہیں۔ راستہ تو ان لوگوں پر ہے کہ جو لوگوں پر ظلم کرتے ہیں اور زمین میں زیادتی کرتے ہیں۔ مروان نے کہا کہ اللہ کی قسم! بالکل سچ فرمایا اور نصیحت کی۔ پھر مروان نے پوچھا کہ آپ کی کوئی ضرورت ہے ابوعبداللہ؟ تو میں نے کہا کہ میری ضرورت یہ ہے کہ تو مجھے میرے گھر والوں سے ملا دے۔ تو اس نے جواب دیا کہ کیوں نہیں۔ [مصنف ابن ابي شيبه/كتاب الزهد/حدیث: 38468]

حضرت ابن سابط رحمہ اللہ فرماتے ہیں کہ جنت میں ایک ایسا درخت ہے کہ اللہ نے تمام اچھی آوازیں اس ہی کی جڑ سے پیدا کی ہیں جو جنتیوں کو محظوظ کرے گا اور آسودہ کرے گا۔ [مصنف ابن ابي شيبه/كتاب الزهد/حدیث: 38469]

حضرت حسن رحمہ اللہ کا ارشاد ہے کہ تین علماء اکٹھے ہوئے تو انہوں نے ایک دوسرے سے کہا کہ تیری امید کتنی ہے؟ تو ایک نے جواب دیا کہ میرا خیال ہے کہ میں ایک مہینہ زندہ رہ سکوں پھر مر جاؤں گا۔ تو انہوں نے کہا کہ یہ تو بڑی امید ہے۔ پھر دوسرے سے پوچھا کہ تجھے کتنی امید ہے؟ اس نے جواب دیا کہ میرا خیال ہے کہ میں ایک جمعہ تک رہ سکوں گا پھر مر جاؤں گا۔ انہوں نے تیسرے سے سوال کیا کہ تیری کیا امید ہے؟ تو اس نے جواب دیا کہ اس شخص کو کیا امید ہوسکتی ہے کہ جس کی جان ہی کسی دوسرے کے پاس ہو؟“ [مصنف ابن ابي شيبه/كتاب الزهد/حدیث: 38470]

حضرت حسن رحمہ اللہ کا ارشاد ہے کہ ابن آدم کی مثال یہ بیان کی جاتی تھی کہ وہ اس شخص کی سی ہے کہ جس کی موت کا وقت قریب آگیا تو اس کے اہل و عیال اور اس کا مال اور عمل اس کے پاس آئے تو اس نے اپنے اہل و عیال سے کہا کہ اس موت کو مجھ سے دور کرو تو انہوں نے جواب دیا کہ ہم تو دنیا کے امور میں سے منع کرسکتے ہیں لیکن اس موت کو نہیں روک سکتے۔ پھر اس نے اپنے مال سے کہا کہ مجھ سے اس کو دور کرو تو اس نے جواب دیا کہ میں تو تیری صرف دنیا ہی کی زینت تھا لیکن اس امر کو میں تجھ سے دور نہیں کرسکتا۔ پھر اس کا عمل اچھل کر آگے آیا اور کہا کہ میں ہی تیرا وہ ساتھی ہوں کہ تیرے ساتھ قبر میں داخل ہوجاؤں گا اور جس جگہ بھی تو جائے گا میں تیرے ساتھ ہوں گا تو اس آدمی نے کہا کہ اللہ کی قسم! اگر مجھے پہلے احساس ہوجاتا تو تو میرے نزدیک ان تینوں میں سب سے زیادہ پسندیدہ ہوتا۔ راوی فرماتے ہیں کہ حسن رحمہ اللہ نے فرمایا کہ ابھی ہی سے اس کو دوسروں پر ترجیح دو۔ [مصنف ابن ابي شيبه/كتاب الزهد/حدیث: 38471]

حضرت کردوس ثعلبی رحمہ اللہ فرماتے ہیں کہ تورات میں یہ بات لکھی ہے کہ اللہ سے ڈرو بچ جاؤ گے۔ کیونکہ بچاؤ صرف تقویٰ میں ہی ہے۔ رحم کرو تم پر بھی رحم کیا جائے گا۔ توبہ کرو تمہاری توبہ قبول کی جائے گی۔ [مصنف ابن ابي شيبه/كتاب الزهد/حدیث: 38472]

حضرت ابی نضرہ رحمہ اللہ سے مروی ہے کہ ایک آدمی جنت میں داخل ہوا تو اس نے اپنے غلام کو اپنے سے اوپر ستارے کی طرح دیکھا تو اس نے سوال کیا کہ اللہ کی قسم اے میرے رب! یہ تو میرا دنیا میں غلام تھا اس کو اس مرتبہ پر کس نے پہنچا دیا تو اللہ نے جواب دیا کہ اس کے عمل تجھ سے اچھے تھے۔ [مصنف ابن ابي شيبه/كتاب الزهد/حدیث: 38473]