یہ بات مذکور ہے کہ حضرت اوزاعی رحمہ اللہ فرمایا کرتے تھے کہ دنیا میں زہد تعریف کو چھوڑ دینا ہے، فرمایا کرتے تھے کہ تو عمل کرے اور تیرا ارادہ یہ نہ ہو کہ لوگ تیرے اس عمل پر تیری تعریف کریں۔ [مصنف ابن ابي شيبه/كتاب الزهد/حدیث: 38424]

یہ بات مذکور ہے کہ حضرت زہری رحمہ اللہ فرمایا کرتے تھے کہ دنیا میں زہد اس وقت تک ہے کہ جب تک حرام تیرے صبر پر غالب نہ آجائے اور حلال تیرے شکر پر غالب نہ آجائے۔ [مصنف ابن ابي شيبه/كتاب الزهد/حدیث: 38425]

ایوب فرماتے ہیں کہ عالم کے لیے مناسب ہے کہ اللہ کے لیے عاجزی کے طور پر اپنے سر پر مٹی ڈالے۔ [مصنف ابن ابي شيبه/كتاب الزهد/حدیث: 38426]

حضرت ثابت فرماتے ہیں کہ میرے پاس رخصت سے متعلقہ ایسی احادیث ہیں کہ اگر میں تم کو بیان کردوں تو تم عمل میں سست ہوجاؤ گے۔ [مصنف ابن ابي شيبه/كتاب الزهد/حدیث: 38427]

حضرت ثابت فرماتے ہیں کہ میں نے بنی عدی کے بعض ایسے آدمیوں کو بھی دیکھا ہے کہ ان میں کوئی اس وقت تک نماز پڑھتا رہتا تھا جب تک کہ گھسٹ کر بستر تک آسکتا تھا۔ [مصنف ابن ابي شيبه/كتاب الزهد/حدیث: 38428]

حضرت عبداللہ بن مالک فرماتے ہیں کہ اللہ تعالیٰ کے لیے زمین میں بعض برتن ایسے ہیں جن میں سے اللہ صرف سخت، نرم اور صاف کو قبول فرماتا ہے۔ یعنی جو اس کی اطاعت میں سخت ہوں۔ اس کے ذکر کے وقت نرم ہوں اور میل کچیل سے صاف ہوں۔ [مصنف ابن ابي شيبه/كتاب الزهد/حدیث: 38429]

عثمان بن عبداللہ بن اوس رحمہ اللہ فرماتے ہیں کہ نبیوں میں ایک نبی یوں دعا کرتے تھے کہ اے اللہ! میری اس طرح حفاظت فرما کہ جس طرح بچے کی حفاظت کی جاتی ہے۔ فرماتے ہیں کہ مجھے اس بات سے رونا آگیا۔ [مصنف ابن ابي شيبه/كتاب الزهد/حدیث: 38430]

حضرت ابوایوب فرماتے ہیں کہ جو شخص یہ چاہتا ہے کہ اس کا حلم بڑھ جائے اور اس کا علم زیادہ ہو تو اس کو چاہیے کہ اپنے قبیلہ کے علاوہ کسی کے پاس بیٹھا کرے۔ [مصنف ابن ابي شيبه/كتاب الزهد/حدیث: 38431]

حضرت اعمش فرماتے ہیں کہ ہم لوگ جنازوں پر جایا کرتے تھے لیکن قوم کی حالت کی وجہ سے ہم کو یہ سمجھ میں نہیں آتا تھا کہ تعزیت کس سے کریں۔ [مصنف ابن ابي شيبه/كتاب الزهد/حدیث: 38432]

حضرت ثابت بنانی رحمہ اللہ فرماتے ہیں کہ ہم جنازوں کے پیچھے جایا کرتے تھے۔ پس ہم تختہ کے اردگرد صرف سروں پر چادر اوڑھ کر رونے والوں کو ہی دیکھتے تھے یا کوئی بہت غمگین۔ گویا کہ ان کے سروں پر پرندے بیٹھے ہوں۔ [مصنف ابن ابي شيبه/كتاب الزهد/حدیث: 38433]