حضرت جابر بن عبداللہ سے روایت ہے کہ جب جنگ خیبر کا دن تھا تو لوگوں کو (شدید) بھوک نے آلیا۔ لوگوں نے پالتو گدھوں کو پکڑا اور انہیں ذبح کر کے ان کے گوشت سے ہانڈیوں کو بھر دیا۔ یہ خبر نبی کریم صلی اللہ علیہ وآلہ وسلم کو پہنچی تو حضرت جابر بیان کرتے ہیں کہ آپ صلی اللہ علیہ وآلہ وسلم نے ہمیں حکم دیا پس ہم نے ہانڈیوں کو الٹ دیا۔ آپ صلی اللہ علیہ وآلہ وسلم نے ارشاد فرمایا: اللہ تعالیٰ عنقریب تمہیں ایسا رزق دے گا جو اس سے زیادہ حلال اور طیب ہوگا۔ پس ہم نے ان ہانڈیوں کو اس حال میں الٹ دیا جبکہ وہ جوش دے رہی تھیں۔ رسول اللہ صلی اللہ علیہ وآلہ وسلم نے اس دن پالتو گدھوں اور خچروں کے گوشت کو حرام قرار دیا اور اسی طرح آپ صلی اللہ علیہ وآلہ وسلم نے کچلی والے ہر درندے کو حرام قرار دیا اور پنجے سے شکار کرنے والے ہر پرندے کو حرام قرار دیا۔ اور آپ صلی اللہ علیہ وآلہ وسلم نے مجثمہ (وہ بکری جس کو پتھر مار مار کر ہلاک کیا جائے)، جھپٹی ہوئی چیز اور لوٹی ہوئی چیز کو حرام قرار دیا۔ [مصنف ابن ابي شيبه/كتاب المغازي/حدیث: 39663]

حضرت علی رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے خیبر کی طرف سفر فرمایا پس جب آپ صلی اللہ علیہ وآلہ وسلم خیبر میں پہنچ گئے تو آپ صلی اللہ علیہ وآلہ وسلم نے حضرت عمر اور ان کے ہمراہ کچھ لوگوں کو اہل خیبر کے شہر یا قلعہ کی طرف روانہ فرمایا۔ انہوں نے (جا کر) ان کے ساتھ لڑائی کی۔ لیکن کچھ ہی دیر میں یہ مسلمانوں کا گروہ … حضرت عمر اور ان کے ساتھی … پسپا ہوگیا۔ پس حضرت عمر، اپنے ساتھیوں کو اور ان کے ساتھی حضرت عمر کو بزدلی کا طعنہ دیتے ہوئے (آپ صلی اللہ علیہ وآلہ وسلم کی خدمت میں) واپس آئے تو آپ صلی اللہ علیہ وآلہ وسلم کو یہ بات ناگوار گزری اور آپ صلی اللہ علیہ وآلہ وسلم نے ارشاد فرمایا۔ ”اب میں ضرور یہود کی طرف ایسا آدمی بھیجوں گا جو اللہ اور اس کے رسول سے محبت کرتا ہوگا اور اللہ اور اس کے رسول بھی اس سے محبت کرتے ہوں گے۔ وہ ان کے ساتھ لڑتا رہے گا یہاں تک کہ اللہ تعالیٰ اسی کے ہاتھ پر فتح عطا فرمائیں گے۔ وہ آدمی بھاگنے والا نہیں ہوگا۔“ (یہ بات سن کر) بہت سے لوگ اس کے امیدوار بن گئے اور اپنی گردنیں دراز کرنے لگے، اور آپ صلی اللہ علیہ وآلہ وسلم کے کہے ہوئے کو اپنے بارے میں دیکھنے کے منتظر ہوگئے۔ آپ صلی اللہ علیہ وآلہ وسلم کچھ دیر خاموش رہے پھر ارشاد فرمایا: علی رضی اللہ عنہ کہاں ہے؟ لوگوں نے عرض کیا۔ وہ تو آشوب چشم میں مبتلا ہیں۔ آپ صلی اللہ علیہ وآلہ وسلم نے ارشاد فرمایا: اس کو میرے پاس بلاؤ۔ پھر جب میں آپ صلی اللہ علیہ وآلہ وسلم کی خدمت میں حاضر ہوا۔ آپ صلی اللہ علیہ وآلہ وسلم نے میری آنکھیں کھولیں اور ان میں اپنا لعاب مبارک ڈالا۔ پھر آپ صلی اللہ علیہ وآلہ وسلم نے مجھے جھنڈا عطا فرمایا۔ اور میں اس جھنڈے کو لے کر دوڑتا ہوا چلا کہ مبادا میرے بارے میں نبی کریم صلی اللہ علیہ وآلہ وسلم کے دل میں کوئی خیال نہ آجائے یا کسی اور کے بارے میں کوئی خیال نہ آجائے۔ یہاں تک کہ میں دشمنوں کے پاس پہنچ گیا اور میں نے ان کے ساتھ قتال کیا۔ مرحب یہودی رجزیہ اشعار پڑھتا ہوا مبارزت کے لئے آیا تو میں بھی اس کے جواب میں رجزیہ اشعار پڑھتے ہوئے مبارزت کے لئے باہر نکلا پھر ہماری باہم مڈبھیڑ ہوگئی تو اللہ تعالیٰ نے اس کو میرے ہاتھ سے قتل کروا دیا۔ اور اس کے ساتھی پسپا ہوگئے اور قلعہ بند ہوگئے انہوں نے دروازہ بند کرلیا۔ ہم دروازہ پر پہنچے پس میں نے مسلسل دروازہ پر ضرب لگائی یہاں تک کہ اللہ تعالیٰ نے اس کو کھول دیا۔ [مصنف ابن ابي شيبه/كتاب المغازي/حدیث: 39664]

حضرت ابوہریرہ سے روایت ہے کہ اللہ کے نبی صلی اللہ علیہ وآلہ وسلم نے ارشاد فرمایا: آج کے دن میں ایک ایسے آدمی کے ہاتھ میں جھنڈا دوں گا کہ جس سے اللہ اور اس کے رسول محبت کرتے ہیں۔ اس پر لوگوں نے اوپر اوپر اٹھ کر دیکھنا شروع کیا تو آپ صلی اللہ علیہ وآلہ وسلم نے ارشاد فرمایا۔ علی رضی اللہ عنہ کہاں ہے؟ لوگوں نے کہا: ان کی آنکھ میں شکایت ہے۔ آپ صلی اللہ علیہ وآلہ وسلم نے حضرت علی رضی اللہ عنہ کو بلایا اور آپ صلی اللہ علیہ وآلہ وسلم نے اپنی دونوں ہتھیلیوں پر تھوکا اور ان کو حضرت علی رضی اللہ عنہ کی آنکھ پر پھیرا پھر آپ صلی اللہ علیہ وآلہ وسلم نے حضرت علی رضی اللہ عنہ کو جھنڈا حوالہ کردیا۔ پس اللہ تعالیٰ نے اسی دن حضرت علی رضی اللہ عنہ کے ہاتھ پر فتح عطا فرمائی۔ [مصنف ابن ابي شيبه/كتاب المغازي/حدیث: 39665]

حضرت عمر بیان کرتے ہیں کہ اگر یہ اندیشہ نہ ہوتا کہ بعد میں آنے والے لوگوں کو کچھ نہ ملے گا تو مسلمان کافروں کی جو بستی بھی فتح کرتے میں اسے مسلمانوں کے درمیان حصوں میں تقسیم کردیتا جیسے رسول اللہ صلی اللہ علیہ وآلہ وسلم نے خیبر کو مسلمانوں میں حصوں میں تقسیم فرما دیا۔ لیکن میں چاہتا ہوں کہ ایک جاری وظیفہ مسلمانوں کو ملتا رہے۔ اور میں اس بات کو ناپسند کرتا ہوں کہ بعد کے لوگوں کو کچھ نہ دیا جائے۔ [مصنف ابن ابي شيبه/كتاب المغازي/حدیث: 39666]

حضرت ابن عباس رضی اللہ عنہما سے روایت ہے کہ ایک آدمی نے خیبر کے دن ایک عورت کو قید کیا اور اس کو اپنے پیچھے سوار کرلیا۔ اس عورت نے اس آدمی کی تلوار کے قبضہ پر جھگڑا کیا تو اس آدمی نے اس عورت کو قتل کردیا۔ پھر رسول اللہ صلی اللہ علیہ وآلہ وسلم نے اس عورت کو (مقتول) دیکھا تو ارشاد فرمایا۔ اس عورت کو کس نے قتل کیا ہے؟ لوگوں نے آپ صلی اللہ علیہ وآلہ وسلم کو بتایا۔ تو آپ صلی اللہ علیہ وآلہ وسلم نے عورتوں کے قتل کرنے سے منع فرمایا۔ [مصنف ابن ابي شيبه/كتاب المغازي/حدیث: 39667]

حضرت عبد اللہ بن کعب بن مالک سے روایت ہے کہ رسول اللہ صلی اللہ علیہ وآلہ وسلم نے اس لشکر کو جسے آپ صلی اللہ علیہ وآلہ وسلم نے ابن ابی الحقیق کو خیبر میں قتل کرنے کے لئے بھیجا تھا۔ اس کو آپ صلی اللہ علیہ وآلہ وسلم نے اس بات سے منع فرمایا تھا کہ عورتوں اور بچوں کو قتل کرے۔ [مصنف ابن ابي شيبه/كتاب المغازي/حدیث: 39668]

حضرت عبد اللہ بن رباح بیان کرتے ہیں کہ حضرت معاویہ کی طرف کچھ وفود گئے اور ہم میں حضرت ابوہریرہ بھی تھے۔ یہ رمضان کے دنوں کی بات ہے۔ پس ہم میں سے بعض، بعض کے لئے کھانے کی دعوت کا اہتمام کرتے۔ راوی کا بیان ہے۔ حضرت ابوہریرہ ان میں سے تھے جو ہمارے لئے بہت زیادہ کھانے کی دعوت کا اہتما م کرتے تھے۔ اور ہمیں اپنے کجاوہ (منزل) کی طرف بلا لیتے تھے۔ راوی کہتے ہیں کہ میں نے (دل میں) کہا کہ کیوں نہ میں اپنے ساتھیوں کے لئے دعوت کا اہتمام کروں اور انہیں اپنے کجاوہ کی طرف بُلاؤں۔ کہتے ہیں: پس میں نے کھانے کا کہا اور وہ تیار کرلیا گیا اور شام کو حضرت ابوہریرہ سے میری ملاقات ہوئی تو میں نے (ان سے) کہا۔ آج کی رات میری طرف دعوت ہے۔ انہوں نے (آگے سے) فرمایا: کیا تم مجھ پر (آج) سبقت لے گئے ہو؟ کہتے ہیں: میں نے کہا: جی ہاں! راوی کہتے ہیں: پس میں نے سب کو بلایا اور وہ میرے پاس آگئے۔ حضرت ابوہریرہ کہنے لگے۔ اے گروہ انصار! کیا میں تمہیں، تمہاری باتوں میں سے ہی کچھ سُناؤں؟ راوی کہتے ہیں کہ پھر انہوں نے فتح مکہ کا (واقعہ) ذکر کیا۔ 2۔ حضرت ابوہریرہ کہنے لگے: رسول اللہ صلی اللہ علیہ وآلہ وسلم چلے یہاں تک کہ آپ صلی اللہ علیہ وآلہ وسلم مکہ میں داخل ہوگئے اور آپ صلی اللہ علیہ وآلہ وسلم نے میمنہ اور میسرہ میں سے ایک لشکر پر حضرت زبیر کو مقرر فرمایا اور حضرت خالد بن الولید کو دوسرے لشکر پر مقرر فرمایا۔ اور حضرت ابو عبیدہ کو خالی ہاتھ لوگوں پر مقرر فرمایا۔ پھر وہ لوگ وادی کے آنگن میں داخل ہوگئے۔ ابوہریرہ بیان کرتے ہیں۔ رسول اللہ صلی اللہ علیہ وآلہ وسلم ایک چھوٹے سے لشکر میں تھے۔ فرماتے ہیں کہ آپ صلی اللہ علیہ وآلہ وسلم نے مجھے آواز دی۔ فرمایا۔ اے ابوہریرہ! میں نے عرض کیا۔ میں حاضر ہوں۔ یا رسول اللہ صلی اللہ علیہ وآلہ وسلم! آپ صلی اللہ علیہ وآلہ وسلم نے فرمایا: میرے لئے انصار کو آواز دو۔ میرے پاس صرف میرے انصار (صحابہ) ہی آئیں۔ ابوہریرہ کہتے ہیں۔ پس میں نے انہیں آواز دی۔ کہتے ہیں: وہ سب حاضر ہوگئے یہاں تک کہ انہوں نے آپ صلی اللہ علیہ وآلہ وسلم کو اپنے جھرمٹ میں لے لیا۔ 3۔ راوی کہتے ہیں: قریش نے اپنے بہت سے پیرو اور متفرق لوگوں کو جمع کر رکھا تھا۔ اور قریش کہہ رہے تھے۔ ہم ان لوگوں کو (پہلے) آگے بھیجیں گے پس اگر ان کو کچھ (فائدہ) ملا تو ہم ان کے ساتھ شریک ہوں گے اور اگر یہ لوگ مارے گئے تو ہم سے جو سوال کیا گیا ہم وہ دے چکے ہوں گے۔ 4۔ جب انصار نے رسول اللہ صلی اللہ علیہ وآلہ وسلم کو اپنے جھرمٹ میں لیا ہوا تھا تو آپ صلی اللہ علیہ وآلہ وسلم نے ان سے فرمایا تھا۔ قریش کے پیرو اور ان متفرق لوگوں کے بارے میں تمہاری کیا رائے ہے؟ پھر آپ صلی اللہ علیہ وآلہ وسلم نے اپنے ہاتھوں میں سے ایک دوسرے کے ساتھ مار کر اشارہ فرماتے ہوئے کہا۔ ان کو مار ڈالو، سلیمان راوی نے بھی اپنے دائیں ہتھیلی کے کنارے کو بائیں ہتھیلی پر مارا، ان کو خوب مارو یہاں تک کہ تم مجھے صفاء پر ملو۔ راوی کہتے ہیں۔ پھر ہم اس حالت میں روانہ ہوئے کہ ہم سے جو کوئی بھی اُن (اتباعِ قریش) میں سے کسی کو قتل کرنا چاہے تو اس کو قتل کرسکتا تھا۔ اور ان میں سے کوئی بھی ہمیں کچھ نہیں کہہ سکتا تھا۔ ابو سفیان نے (نبی کریم صلی اللہ علیہ وآلہ وسلم سے) عرض کیا۔ یا رسول اللہ صلی اللہ علیہ وآلہ وسلم! قریش کے عوام کو مباح قرار دیا گیا ہے؟ (پھر تو) آج کے بعد قریش (باقی) نہیں ہوں گے، راوی کہتے ہیں: آپ صلی اللہ علیہ وآلہ وسلم نے ارشاد فرمایا: جو شخص اپنا دروازہ بند کرلے گا وہ مامون ہوگا اور جو شخص ابو سفیان کے گھر میں داخل ہوجائے گا وہ بھی مامون ہوگا۔ راوی کہتے ہیں: پھر لوگوں نے اپنے اپنے دروازے بند کرلیے۔ 5۔ ابوہریرہ کہتے ہیں۔ پھر رسول اللہ صلی اللہ علیہ وآلہ وسلم آگے بڑھے یہاں تک کہ آپ صلی اللہ علیہ وآلہ وسلم نے حجر اسود کا استلام کیا اور بیت اللہ کا طواف کیا۔ پھر آپ صلی اللہ علیہ وآلہ وسلم بیت اللہ کی ایک جانب رکھے ہوئے بُت کی طرف آئے جس کی مشرکین مکہ عبادت کرتے تھے۔ اور آپ صلی اللہ علیہ وآلہ وسلم کے ہاتھ میں (اس وقت) کمان تھی اور آپ صلی اللہ علیہ وآلہ وسلم نے اس کو ٹیڑھی جانب سے پکڑا ہوا تھا۔ آپ صلی اللہ علیہ وآلہ وسلم نے اس قوس (کمان) کو اس بت کی آنکھ میں مارنا شروع کیا اور ارشاد فرمایا: حق آن پہنچا اور باطل مٹ گیا اور یقینا باطل ایسی چیز ہے جو مٹنے والی ہے۔ پھر جب آپ صلی اللہ علیہ وآلہ وسلم طواف سے فارغ ہوئے تو آپ صلی اللہ علیہ وآلہ وسلم صفا پہاڑی کی طرف آئے اور آپ صلی اللہ علیہ وآلہ وسلم اس پر اس جگہ تک بلند ہوئے جہاں سے بیت اللہ دکھائی دیتا ہے تو آپ صلی اللہ علیہ وآلہ وسلم نے اپنے ہاتھ بلند کئے اور اللہ تعالیٰ کی تعریف اور خدا کا ذکر کرنے لگے اور جو کچھ اللہ نے چاہا اس کی دعا کرنے لگے۔ راوی کہتے ہیں: انصار آپ صلی اللہ علیہ وآلہ وسلم کے نیچے تھے۔ انصار ایک دوسرے سے کہنے لگے: ان صاحب کو تو اپنی بستی کی رغبت اور اپنے خاندان کی شفقت نے آلیا ہے۔ حضرت ابوہریرہ کہتے ہیں: پھر وحی آگئی، اور جب وحی آتی تو ہم پر مخفی نہ رہتی تھی۔ لوگوں میں سے کوئی بھی رسول اللہ صلی اللہ علیہ وآلہ وسلم کی طرف نگاہ نہ اٹھاتا یہاں تک کہ وحی پوری ہوجاتی۔ جب وحی پوری ہوگئی تو رسول اللہ صلی اللہ علیہ وآلہ وسلم نے فرمایا: اے گروہ انصار! انہوں نے عرض کیا: یا رسول اللہ صلی اللہ علیہ وآلہ وسلم! ہم حاضر ہیں۔ آپ صلی اللہ علیہ وآلہ وسلم نے فرمایا: تم نے کہا ہے کہ ان صاحب کو تو اپنی بستی کی رغبت اور اپنے خاندان کی شفقت نے آلیا ہے۔ انہوں نے عرض کیا: یا رسول اللہ صلی اللہ علیہ وآلہ وسلم! ہم نے واقعی یہ بات کہی ہے۔ آپ صلی اللہ علیہ وآلہ وسلم نے فرمایا: پھر میرا نام کیا ہوگا؟ ہرگز نہیں! میں اللہ کا بندہ اور اس کا رسول ہوں۔ میں نے اللہ کی طرف اور تمہاری طرف ہجرت کی ہے۔ میرا جینا تمہارا جینا ہے اور میرا مرنا تمہارا مرنا ہے۔ راوی کہتے ہیں: پھر وہ روتے ہوئے آپ صلی اللہ علیہ وآلہ وسلم کی طرف بڑھے اور کہنے لگے: بخدا! یا رسول اللہ صلی اللہ علیہ وآلہ وسلم! ہم نے جو کچھ کہا وہ صرف اللہ اور اس کے رسول کے بارے میں اپنی غیرت (اور حرص) کی وجہ سے کہا۔ آپ صلی اللہ علیہ وآلہ وسلم نے فرمایا: بیشک اللہ اور اس کا رسول تمہارا عذر قبول کرتے ہیں اور تمہاری تصدیق کرتے ہیں۔ [مصنف ابن ابي شيبه/كتاب المغازي/حدیث: 39669]

حضرت ابو سلمہ اور یحییٰ بن عبد الرحمان بن حاطب دونوں بیان کرتے ہیں کہ رسول اللہ صلی اللہ علیہ وآلہ وسلم اور مشرکین (مکہ) کے درمیان جنگ بندی کا وقفہ تھا۔ اور بنو کعب بنو بکر کے درمیان مکہ میں لڑائی ہوگئی۔ بنی کعب کی طرف سے ایک فریادی نبی کریم صلی اللہ علیہ وآلہ وسلم کی خدمت میں حاضر ہوا اور اس نے کہا۔ ع اے خدا! میں محمد کو اپنے اور اس کے آباء کی پرانی قسم دیتا ہوں۔ کہ تم مدد کرو۔ اللہ تمہیں ہدایت دے۔ سخت مدد اور اللہ کے بندوں کو بلاؤ وہ مدد کے لئے آئیں گے۔ 2۔ پس ایک بادل گزرا اور وہ کڑکا تو آپ صلی اللہ علیہ وآلہ وسلم نے ارشاد فرمایا۔ یہ بادل بنو کعب کی مدد کے لئے کھڑک رہا ہے۔ پھر آپ صلی اللہ علیہ وآلہ وسلم نے حضرت عائشہ رضی اللہ عنہا سے فرمایا: میرا سامان تیار کرو۔ اور کسی کو یہ بات نہ بتانا۔ پس (اسی دوران) حضرت عائشہ رضی اللہ عنہا کے پاس حضرت ابوبکر تشریف لائے اور انہوں نے امی عائشہ رضی اللہ عنہا کی حالت کو متغیر پایا تو انہوں نے پوچھا: یہ کیا ہے؟ حضرت عائشہ رضی اللہ عنہا نے جواب دیا۔ رسول اللہ صلی اللہ علیہ وآلہ وسلم نے مجھے حکم فرمایا ہے کہ میں آپ صلی اللہ علیہ وآلہ وسلم کا سامان تیار کروں۔ حضرت ابوبکر نے پوچھا۔ کہاں کے لئے؟ حضرت عائشہ رضی اللہ عنہا نے جواب دیا۔ مکہ کے لئے۔ حضرت ابوبکر نے کہا۔ بخدا! ابھی تک ہمارے اور ان کے درمیان جنگ بندی کا وقفہ ختم تو نہیں ہوا۔ پھر حضرت ابوبکر رسول اللہ صلی اللہ علیہ وآلہ وسلم کی خدمت میں حاضر ہوئے اور آپ صلی اللہ علیہ وآلہ وسلم کے سامنے یہ بات ذکر کی۔ آپ صلی اللہ علیہ وآلہ وسلم نے ارشاد فرمایا۔ ان لوگوں نے پہلے غدر کیا ہے۔ 3۔ پھر آپ صلی اللہ علیہ وآلہ وسلم نے راستہ بند کرنے کا حکم دیا پھر آپ صلی اللہ علیہ وآلہ وسلم اور دیگر مسلمان نکل پڑے اور اہل مکہ کو یوں گھیر لیا کہ ان کو کوئی خبر نہ مل سکی۔ ابو سفیان نے حکیم بن حزام سے کہا۔ اے حکیم! بخدا! ہم لوگوں کو گھیر لیا گیا ہے اور ہم ڈھک چکے ہیں۔ کیا تم اس کام کے لئے تیار ہو۔ کہ ہم یہاں سے مرالظہران تک سوار ہو کر (حالات) دیکھیں۔ شاید ہمیں کوئی خبر مل جائے۔ قبیلہ خزاعہ کے بدیل بن ورقاء کعبی نے کہا۔ میں بھی تمہارے ساتھ چلوں۔ ابو سفیان اور حکیم نے کہا۔ اگر تم چاہو تو چل پڑو۔ راوی کہتے ہیں۔ پس یہ لوگ سوار ہو کر جب مرالظہران کی پہاڑی کے قریب پہنچے۔ اور اندھیرا ہوگیا تو وہ گھاٹی پر چڑھ گئے۔ تو دیکھا کہ آگ نے پوری وادی کو گھیرا ہوا ہے۔ ابو سفیان نے حکیم سے کہا: اے حکیم! یہ آگ کیسی ہے؟ بدیل بن ورقاء نے کہا: یہ بنو عمرو کی آگ ہے جنہیں جنگ نے بھوکا کردیا ہے۔ ابو سفیان نے کہا: نہیں، تیرے باپ کی قسم! بنو عمرو تو ان سے زیادہ ذلیل اور تعداد میں کم ہیں۔ 4۔ پس جب پیلو کے درخت ان سے ہٹ گئے تو انہیں رسول اللہ صلی اللہ علیہ وآلہ وسلم کے پہرہ داروں نے، انصاری صحابہ کی ایک جماعت نے پکڑ لیا۔ اس رات حضرت عمر بن خطاب پہرہ داروں پر ذمہ دار تھے۔ پہرہ دار صحابہ ان کو، ابو سفیان وغیرہ کو لے کر حضرت عمر کے پاس حاضر ہوئے۔ اور آ کر کہنے لگے۔ ہم آپ کے پاس اہل مکہ میں سے چند لوگ پکڑ کر لائے ہیں۔ حضرت عمر، انہیں دیکھ کر ہنسنے لگے اور، فرمایا: خدا کی قسم! اگر تم میرے پاس ابو سفیان کو لے آتے تو بھی کچھ زیادہ نہ ہوتا۔ پہرہ دار صحابہ نے کہا: خدا کی قسم! ہم آپ کے پاس ابو سفیان ہی کو لائے ہیں۔ (اس پر) حضرت عمر نے فرمایا: اس کو بند کرلو۔ صحابہ نے ابو سفیان کو بند کرلیا۔ یہاں تک کہ صبح ہوگئی پھر حضرت عمر ابو سفیان کو لے کر نبی کریم صلی اللہ علیہ وآلہ وسلم کی خدمت میں حاضر ہوئے۔ ابو سفیان سے کہا گیا۔ بیعت (اسلام) کرلو۔ ابو سفیان نے کہا، میں اس وقت یہی صورت یا اس سے بھی بدتر صورت ہی موجود پاتا ہوں۔ پھر اس نے (آپ صلی اللہ علیہ وآلہ وسلم سے) بیعت کرلی۔ پھر حکیم بن حزام سے کہا گیا۔ تم (بھی) بیعت کرلو۔ اس نے کہا: میں آپ سے بیعت کرتا ہوں اور میں کھڑا ہی گروں گا۔ راوی کہتے ہیں: رسول اللہ صلی اللہ علیہ وآلہ وسلم نے ارشاد فرمایا: جہاں تک ہماری طرف کی بات ہے تو تم کھڑے ہی گرو گے۔ 5۔ پس جب یہ لوگ واپس ہوئے تو حضرت ابوبکر نے عرض کیا۔ یا رسول اللہ صلی اللہ علیہ وآلہ وسلم! ابو سفیان ایک ایسا آدمی ہے جو شہرت کو پسند کرتا ہے۔ آپ صلی اللہ علیہ وآلہ وسلم نے فرمایا: جو شخص ابو سفیان کے گھر میں داخل ہوجائے وہ مامون ہے سوائے ابن خطل، مقیس بن صبابہ اللیثی، عبد اللہ بن سعد بن ابی سرح اور دو گانے والی باندیاں۔ اگر تم ان (مستثنیٰ) لوگوں کو کعبہ کے غلافوں میں بھی چمٹا ہوا پاؤ تو بھی ان کو قتل کر ڈالو۔ راوی کہتے ہیں۔ پھر جب یہ لوگ واپس ہوئے تو حضرت ابوبکر نے عرض کیا۔ اگر آپ ابو سفیان کے بارے میں حکم دیں کہ اس کو راستہ میں روک دیا جائے اور پھر آپ لوگوں کو کوچ کرنے کا حکم دیں۔ پس حضرت عباس نے ابوسفیان کو راستہ میں پالیا (اور روک دیا) حضرت عباس نے ابو سفیان سے کہا۔ کیا تم بیٹھو گے تاکہ کچھ نظارہ کرو؟ ابو سفیان نے کہا: کیوں نہیں! اور یہ (راستہ میں روکنا اور نظارہ دکھانا) سب کچھ صرف اس لئے تھا کہ ابو سفیان ان کی کثرت کو دیکھے اور ان کے بارے میں پوچھے۔ 6۔ اسی دوران قبیلہ جہینہ کے لوگ گزرے تو ابو سفیان نے پوچھا: اے عباس! یہ کون ہیں؟ حضرت عباس نے کہا: یہ جہینہ ہیں۔ ابو سفیان نے کہا: مجھے جہینہ سے کیا واسطہ! بخدا! میرے اور ان کے درمیان کبھی کوئی جنگ نہیں ہوئی۔ پھر قبیلہ مزینہ گزرا تو اس نے پوچھا: اے عباس! یہ کون ہیں؟ حضرت عباس نے کہا: یہ مزینہ ہیں۔ ابو سفیان نے کہا: مجھے مزینہ سے کیا واسطہ! بخدا! میرے اور ان کے درمیان کبھی کوئی جنگ نہیں ہوئی۔ پھر قبیلہ سلیم گزرا تو اس نے پوچھا: اے عباس! یہ کون ہیں؟ حضرت عباس نے کہا: یہ سلیم ہیں۔ راوی کہتے ہیں: پھر عرب کے گروہ گزرنے لگے۔ اس کے پاس سے اسلم اور غفار گزرے، وہ ان کے بارے میں پوچھتا اور حضرت عباس اسے بتاتے۔ پھر رسول اللہ صلی اللہ علیہ وآلہ وسلم لوگوں کے آخر میں مہاجرین اولین اور انصار کے درمیان ایسی زرہ میں گزرے جو آنکھوں کو خیرہ کر رہی تھی۔ ابو سفیان نے پوچھا: اے عباس! یہ کون ہیں؟ حضرت عباس نے کہا: یہ رسول اللہ صلی اللہ علیہ وآلہ وسلم ہیں جو مہاجرین اولین اور انصار میں ہیں۔ ابو سفیان نے کہا: تمہارے بھتیجے کی بادشاہی تو بہت بڑی ہوگئی ہے۔ حضرت عباس نے کہا: نہیں، بخدا! وہ بادشاہ نہیں ہیں بلکہ یہ نبوت ہے۔ اور وہ لوگ دس ہزار یا بارہ ہزار تھے۔ راوی کہتے ہیں: رسول اللہ صلی اللہ علیہ وآلہ وسلم نے جھنڈا حضرت سعد بن عبادہ کو دیا اور حضرت سعد نے اسے اپنے بیٹے حضرت قیس بن سعد کو دے دیا۔ ابو سفیان سوار ہو کر لوگوں سے آگے نکل گیا یہاں تک کہ گھاٹی سے ان کے سامنے ظاہر ہوا۔ اہل مکہ نے اس سے کہا: تمہارے پیچھے کیا ہے؟ اس نے کہا: میرے پیچھے بہت بڑی جماعت ہے، میرے پیچھے وہ ہے جس کے مقابلہ کی تم میں طاقت نہیں، میرے پیچھے وہ ہے جس جیسا میں نے نہیں دیکھا۔ جو میرے گھر میں داخل ہوجائے وہ مامون ہے۔ چناچہ لوگ اس کے گھر میں گھسنے لگے۔ رسول اللہ صلی اللہ علیہ وآلہ وسلم تشریف لائے اور مکہ کے بالائی حصہ میں حجون پر ٹھہرے۔ آپ صلی اللہ علیہ وآلہ وسلم نے حضرت زبیر بن عوام کو گھڑ سواروں کے ساتھ وادی کے بالائی حصہ میں بھیجا اور حضرت خالد بن ولید کو گھڑ سواروں کے ساتھ وادی کے نچلے حصہ میں بھیجا۔ رسول اللہ صلی اللہ علیہ وآلہ وسلم نے ارشاد فرمایا: (اے مکہ!) تو اللہ کی زمین میں سب سے بہتر ہے اور اللہ کے نزدیک اس کی زمین میں سب سے زیادہ محبوب ہے۔ بخدا! اگر مجھے تجھ سے نکالا نہ جاتا تو میں نہ نکلتا۔ یہ مجھ سے پہلے کسی کے لئے حلال نہیں ہوا اور نہ میرے بعد کسی کے لئے حلال ہوگا۔ میرے لئے اسے دن کی صرف ایک گھڑی کے لئے حلال کیا گیا اور میری اس گھڑی میں یہ حرام ہے۔ اس کے درخت نہ کاٹے جائیں، اس کے پہاڑ کی گھاس نہ کاٹی جائے اور اس کی گری پڑی چیز کو صرف اعلان کرنے والا اٹھائے۔ ایک آدمی نے جسے شاء کہا جاتا تھا، اور لوگ کہتے ہیں کہ حضرت عباس نے، آپ صلی اللہ علیہ وآلہ وسلم سے عرض کیا: یا رسول اللہ! سوائے اذخر کے، کیونکہ یہ ہمارے گھروں، ہماری قبروں اور ہمارے لوہاروں کے لئے ہے، یا کہا: ہمارے لوہاروں اور ہماری قبروں کے لئے۔ ابن خطل تو کعبہ کے پردوں سے چمٹا ہوا پایا گیا اور قتل کردیا گیا۔ اور مقیس بن صبابہ کو لوگوں نے صفا اور مروہ کے درمیان پایا تو بنو کعب کے چند آدمی اسے قتل کرنے کے لئے اس کی طرف لپکے۔ اس کے چچا زاد نمیلہ نے ان سے کہا: اسے چھوڑ دو، بخدا! جو آدمی بھی اس کے قریب آئے گا میں اسے اپنی اس تلوار سے ماروں گا یہاں تک کہ وہ ٹھنڈا ہوجائے۔ چناچہ وہ اس سے پیچھے ہٹ گئے۔ تو اس نے تلوار لے کر اس پر حملہ کیا اور اس کا سر پھاڑ دیا اور اس نے ناپسند کیا کہ کوئی اس پر فخر کرے۔ پھر رسول اللہ صلی اللہ علیہ وآلہ وسلم نے بیت اللہ کا طواف کیا۔ پھر حضرت عثمان بن طلحہ داخل ہوئے تو آپ صلی اللہ علیہ وآلہ وسلم نے فرمایا: اے عثمان! چابی کہاں ہے؟ انہوں نے کہا: وہ میری والدہ سلامہ بنت سعد کے پاس ہے۔ رسول اللہ صلی اللہ علیہ وآلہ وسلم نے انہیں اس کے پاس بھیجا تو اس نے کہا: نہیں، لات اور عزیٰ کی قسم! میں یہ کبھی انہیں نہیں دوں گی۔ انہوں نے کہا: اب ایسا معاملہ آگیا ہے جو اس معاملہ سے مختلف ہے جس پر ہم تھے۔ اگر تم نے ایسا نہ کیا تو میں اور میرا بھائی قتل کردیئے جائیں گے۔ راوی کہتے ہیں: تو اس نے چابی انہیں دے دی۔ وہ اسے لے کر آئے یہاں تک کہ جب رسول اللہ صلی اللہ علیہ وآلہ وسلم کے سامنے پہنچے تو انہیں ٹھوکر لگی اور چابی ان سے گر گئی۔ رسول اللہ صلی اللہ علیہ وآلہ وسلم اس کی طرف اٹھے اور اس پر اپنا کپڑا جھکا دیا۔ پھر حضرت عثمان نے آپ صلی اللہ علیہ وآلہ وسلم کے لئے دروازہ کھولا اور رسول اللہ صلی اللہ علیہ وآلہ وسلم کعبہ میں داخل ہوئے، اس کے کونوں اور اطراف میں تکبیر کہی اور اللہ کی تعریف کی۔ پھر دو ستونوں کے درمیان دو رکعات نماز پڑھی، پھر باہر تشریف لائے اور دونوں دروازوں کے درمیان کھڑے ہوئے۔ حضرت علی رضی اللہ عنہ فرماتے ہیں: میں نے اس کی طرف نظریں اٹھائیں اور مجھے امید ہوئی کہ چابی ہمیں دے دی جائے گی تاکہ حاجیوں کو پانی پلانا اور دربانی دونوں ہمارے پاس ہوں۔ رسول اللہ صلی اللہ علیہ وآلہ وسلم نے فرمایا: عثمان کہاں ہیں؟ لو، جو اللہ نے تمہیں عطا کیا ہے۔ اور چابی انہیں دے دی۔ پھر حضرت بلال کعبہ کی چھت پر چڑھے اور اذان دی۔ خالد بن اسید نے کہا: یہ کیسی آواز ہے؟ لوگوں نے کہا: بلال بن رباح کی۔ اس نے کہا: ابوبکر کا حبشی غلام؟ لوگوں نے کہا: ہاں۔ اس نے کہا: کہاں ہے؟ لوگوں نے کہا: کعبہ کی چھت پر۔ اس نے کہا: بنو ابی طلحہ کی بلند جگہ پر؟ لوگوں نے کہا: ہاں۔ اس نے کہا: وہ کیا کہہ رہا ہے؟ لوگوں نے کہا: وہ کہہ رہا ہے: میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد اللہ کے رسول ہیں۔ اس نے کہا: اللہ نے ابو خالد کو یہ آواز سننے سے بچا کر عزت دی۔ اس سے مراد اس کا باپ ہے جو بدر کے دن مشرکین میں قتل ہوا تھا۔ پھر رسول اللہ صلی اللہ علیہ وآلہ وسلم حنین کی طرف نکلے اور ہوازن نے حنین میں آپ کے خلاف لشکر جمع کیا۔ پھر لڑائی ہوئی تو رسول اللہ صلی اللہ علیہ وآلہ وسلم کے صحابہ کو شکست ہوئی۔ اللہ تعالیٰ نے فرمایا: اور حنین کے دن، جب تمہاری کثرت نے تمہیں اترا دیا تھا تو وہ تمہارے کچھ کام نہ آئی۔ پھر اللہ نے اپنے رسول اور مومنوں پر اپنی سکینت نازل فرمائی۔ رسول اللہ صلی اللہ علیہ وآلہ وسلم اپنی سواری سے اترے اور فرمایا: اے اللہ! اگر تو چاہے تو آج کے بعد تیری عبادت نہ کی جائے۔ چہرے بگڑ جائیں۔ پھر آپ صلی اللہ علیہ وآلہ وسلم نے اپنے ہاتھ میں موجود کنکریاں ان پر پھینکیں تو وہ پیٹھ پھیر کر بھاگ گئے۔ رسول اللہ صلی اللہ علیہ وآلہ وسلم نے قیدی اور مال لے لیے اور ان سے فرمایا: اگر تم چاہو تو فدیہ اور اگر چاہو تو قیدی۔ انہوں نے کہا: آج ہم اپنے حسب پر کسی چیز کو ترجیح نہیں دیں گے۔ رسول اللہ صلی اللہ علیہ وآلہ وسلم نے فرمایا: جب میں باہر نکلوں تو مجھ سے مانگنا، میں تمہیں وہ دے دوں گا جو میرا ہے اور مسلمانوں میں سے کوئی مجھ سے عذر نہیں کرے گا۔ جب رسول اللہ صلی اللہ علیہ وآلہ وسلم باہر تشریف لائے تو انہوں نے آپ کو پکارا۔ آپ صلی اللہ علیہ وآلہ وسلم نے فرمایا: جو میرا ہے وہ میں نے تمہیں دے دیا۔ اور مسلمانوں نے بھی ایسا ہی کہا، سوائے عیینہ بن حصن بن حذیفہ بن بدر کے، اس نے کہا: جو میرا ہے وہ میں نہیں دوں گا۔ آپ صلی اللہ علیہ وآلہ وسلم نے فرمایا: اس میں تمہارا حق برقرار ہے۔ راوی کہتے ہیں: تو اس دن اس کے حصہ میں ایک کانی بوڑھی عورت آئی۔ پھر رسول اللہ صلی اللہ علیہ وآلہ وسلم نے اہل طائف کا تقریباً ایک ماہ محاصرہ کیا۔ حضرت عمر بن خطاب نے عرض کیا: یا رسول اللہ صلی اللہ علیہ وآلہ وسلم! مجھے اجازت دیجئے کہ میں ان کے پاس جا کر انہیں اللہ کی طرف بلاؤں۔ آپ صلی اللہ علیہ وآلہ وسلم نے فرمایا: پھر تو وہ تمہیں قتل کردیں گے۔ پھر حضرت عروہ ان کے پاس گئے اور انہیں اللہ کی طرف بلایا تو بنو مالک کے ایک آدمی نے انہیں تیر مار کر شہید کردیا۔ رسول اللہ صلی اللہ علیہ وآلہ وسلم نے فرمایا: اپنی قوم میں اس کی مثال صاحب یاسین کی طرح ہے۔ اور رسول اللہ صلی اللہ علیہ وآلہ وسلم نے فرمایا: ان کے مویشی لے لو اور ان پر تنگی کرو۔ پھر رسول اللہ صلی اللہ علیہ وآلہ وسلم واپس لوٹے یہاں تک کہ جب نخلہ میں پہنچے تو لوگ آپ سے مانگنے لگے۔ [مصنف ابن ابي شيبه/كتاب المغازي/حدیث: 39670]

حضرت انس فرماتے ہیں کہ یہاں تک کہ انہوں نے آپ صلی اللہ علیہ وآلہ وسلم کی چادر آپ کی پشت سے کھینچ لی اور چاند کے ٹکڑے جیسی (پشت مبارک) ظاہر ہوگئی۔ آپ صلی اللہ علیہ وآلہ وسلم نے ارشاد فرمایا: میری چادر مجھے واپس کر دو، تمہارا باپ نہ رہے! کیا تم مجھے بخیل سمجھتے ہو؟ بخدا! اگر ان دونوں کے درمیان جو کچھ ہے وہ اونٹوں اور بکریوں کی صورت میں میرا ہوتا تو میں تمہیں دے دیتا۔ پھر آپ صلی اللہ علیہ وآلہ وسلم نے اس دن مؤلفۃ القلوب کو سو سو اونٹ دیئے اور لوگوں کو بھی عطا فرمایا۔ اس پر انصار نے بات کی۔ تو رسول اللہ صلی اللہ علیہ وآلہ وسلم نے انہیں بلایا اور ارشاد فرمایا: تم نے ایسا ایسا کہا ہے۔ کیا میں نے تمہیں گمراہ نہیں پایا تو اللہ نے میرے ذریعہ تمہیں ہدایت دی؟ انہوں نے عرض کیا: کیوں نہیں۔ آپ صلی اللہ علیہ وآلہ وسلم نے فرمایا: کیا میں نے تمہیں تنگ دست نہیں پایا تو اللہ نے تمہیں غنی کردیا؟ انہوں نے عرض کیا: کیوں نہیں۔ آپ صلی اللہ علیہ وآلہ وسلم نے فرمایا: کیا میں نے تمہیں ایک دوسرے کا دشمن نہیں پایا تو اللہ نے میرے ذریعہ تمہارے دلوں میں الفت ڈال دی؟ انہوں نے عرض کیا: کیوں نہیں۔ آپ صلی اللہ علیہ وآلہ وسلم نے فرمایا: اگر تم چاہو تو کہہ سکتے ہو: آپ ہمارے پاس بے یار و مددگار آئے تو ہم نے آپ کی مدد کی۔ انہوں نے عرض کیا: اللہ اور اس کے رسول کا احسان زیادہ ہے۔ آپ صلی اللہ علیہ وآلہ وسلم نے فرمایا: اگر تم چاہو تو کہہ سکتے ہو: آپ ہمارے پاس نکالے ہوئے آئے تو ہم نے آپ کو پناہ دی۔ انہوں نے عرض کیا: اللہ اور اس کے رسول کا احسان زیادہ ہے۔ آپ صلی اللہ علیہ وآلہ وسلم نے فرمایا: اور اگر تم چاہو تو کہہ سکتے ہو: آپ ہمارے پاس تنگ دست آئے تو ہم نے آپ کی غم خواری کی۔ انہوں نے عرض کیا: اللہ اور اس کے رسول کا احسان زیادہ ہے۔ آپ صلی اللہ علیہ وآلہ وسلم نے فرمایا: کیا تم اس پر راضی نہیں کہ لوگ بکریاں اور اونٹ لے کر لوٹیں اور تم اللہ کے رسول کو لے کر اپنے گھروں کو لوٹو؟ انہوں نے عرض کیا: کیوں نہیں۔ پھر رسول اللہ صلی اللہ علیہ وآلہ وسلم نے ارشاد فرمایا: لوگ اوپر کا کپڑا ہیں اور انصار اندر کا کپڑا ہیں۔ اور آپ صلی اللہ علیہ وآلہ وسلم نے بنو عبد الاشہل کے حضرت عباد بن وقش کو تقسیم پر مقرر فرمایا۔ قبیلہ اسلم کا ایک آدمی برہنہ حالت میں آیا جس کے بدن پر کوئی کپڑا نہیں تھا اور کہنے لگا: مجھے ان چادروں میں سے ایک چادر پہنا دیں۔ انہوں نے کہا: یہ مسلمانوں کے حصے ہیں اور میرے لئے حلال نہیں کہ میں تمہیں ان میں سے کچھ دوں۔ اس کی قوم نے کہا: اسے ان میں سے ایک چادر پہنا دیں، اگر کسی نے اس بارے میں بات کی تو یہ ہمارے حصوں اور ہمارے عطیات میں سے ہے۔ چناچہ انہوں نے اسے ایک چادر دے دی۔ یہ بات رسول اللہ صلی اللہ علیہ وآلہ وسلم کو پہنچی تو آپ صلی اللہ علیہ وآلہ وسلم نے فرمایا: جس کے بارے میں مجھے اس کا اندیشہ تھا، تمہارے بارے میں مجھے اس کا اندیشہ نہیں تھا۔ انہوں نے عرض کیا: یا رسول اللہ! میں نے اسے یہ چادر اس وقت تک نہیں دی جب تک اس کی قوم نے یہ نہ کہا کہ اگر کسی نے اس بارے میں بات کی تو یہ ہمارے حصوں اور ہمارے عطیات میں سے ہے۔ آپ صلی اللہ علیہ وآلہ وسلم نے فرمایا: اللہ تمہیں جزائے خیر دے، اللہ تمہیں جزائے خیر دے۔ [مصنف ابن ابي شيبه/كتاب المغازي/حدیث: 39671]

حضرت ابن سابط سے روایت ہے کہ رسول اللہ صلی اللہ علیہ وآلہ وسلم نے عثمان بن طلحہ کو کپڑے کے پیچھے سے (کعبہ کی) چابی عطا کی)۔ [مصنف ابن ابي شيبه/كتاب المغازي/حدیث: 39672]