سیدنا عبداللہ بن عمرو رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب امام آخری رکعت پڑھنے کے بعد تشہد میں بیٹھا ہوا ہو اور اس کی اقتداء میں امام کے سلام پھیرنے سے پہلے کسی کا وضو ٹوٹ جائے، تو اس شخص کی نماز مکمل شمار ہو گی۔“ اس روایت کا راوی عبدالرحمن بن زیاد ضعیف ہے، اس کو مستند تسلیم نہیں کیا گیا ہے۔ [سنن الدارقطني/ كتاب الصلاة/حدیث: 1422]

سیدنا عبداللہ بن عمرو رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب امام نماز مکمل کر لے اور وہ بیٹھا ہوا ہو، اسی دوران سلام پھیرنے سے پہلے اس کا وضو ٹوٹ جائے، تو اس کی نماز مکمل ہو گی اور جو شخص اس کی اقتداء میں ہو، اس کی نماز پوری ہو گی۔“ [سنن الدارقطني/ كتاب الصلاة/حدیث: 1423]

سیدنا عبداللہ بن عمرو رضی اللہ عنہ بیان کرتے ہیں: ”جب آخری سجدے سے سر اٹھانے اور سیدھے بیٹھ جانے کے بعد امام کا وضو ٹوٹ جائے، تو اس کی نماز مکمل شمار ہو گی، اور اس شخص کی بھی نماز مکمل شمار ہو گی، جو اس کی اقتداء میں نماز کے آغاز سے شریک ہوا تھا۔“ [سنن الدارقطني/ كتاب الصلاة/حدیث: 1424]

سیدنا عمران بن حصین رضی اللہ عنہ بیان کرتے ہیں: مجھے بواسیر کی شکایت تھی، میں نے نبی کریم صلی اللہ علیہ وسلم سے اس بارے میں دریافت کیا، تو آپ نے ارشاد فرمایا: ”تم کھڑے ہو کر نماز ادا کرو گے، اگر ایسا نہیں کر سکتے، تو بیٹھ کر کرو، اگر ایسا بھی نہیں کر سکتے، تو پہلو کے بل لیٹ کر کرو۔“ [سنن الدارقطني/ كتاب الصلاة/حدیث: 1425]

یہی روایت بعض دیگر اسناد کے حوالے سے سیدنا عمران بن حصین رضی اللہ عنہ سے منقول ہے۔ [سنن الدارقطني/ كتاب الصلاة/حدیث: 1426]

سیدنا عمران بن حصین رضی اللہ عنہ بیان کرتے ہیں: مجھے ناصور کی شکایت تھی، میں نے نبی کریم صلی اللہ علیہ وسلم سے نماز کے بارے میں سوال کیا، تو آپ صلی اللہ علیہ وسلم نے ارشاد فرمایا: ”تم کھڑے ہو کر نماز ادا کرو، اگر یہ نہیں کر سکتے، تو بیٹھ کر کرو، اگر یہ بھی نہیں کر سکتے، تو پہلو کے بل ادا کرو۔“ [سنن الدارقطني/ كتاب الصلاة/حدیث: 1427]

یہی روایت ایک اور سند کے ہمراہ منقول ہے، تاہم اس میں بیماری کا نام ’باسور‘ نقل کیا گیا ہے۔ [سنن الدارقطني/ كتاب الصلاة/حدیث: 1428]

سیدنا یعلی بن امیہ رضی اللہ عنہ بیان کرتے ہیں: ہم نبی کریم صلی اللہ علیہ وسلم کے ساتھ سفر کرتے ہوئے ایک ایسی جگہ پر پہنچے جو تنگ تھی، ہمارے اوپر آسمان تھا اور ہمارے نیچے نشیب تھا، نماز کا وقت ہو گیا، موذن کو حکم دیا گیا، اس نے اذان دی اور اقامت کہی (راوی کو شک ہے، شاید یہ الفاظ ہیں) اذان کے بغیر ہی اقامت کہہ دی، پھر نبی کریم صلی اللہ علیہ وسلم آگے بڑھے اور آپ نے اپنی سواری پر موجود رہتے ہوئے نماز پڑھائی، ہم نے بھی اپنی سواریوں پر موجود رہتے ہوئے آپ صلی اللہ علیہ وسلم کی اقتداء میں نماز ادا کر لی، آپ نے سجدے میں اپنا سر مبارک کو رکوع سے تھوڑا سا زیادہ جھکایا۔ [سنن الدارقطني/ كتاب الصلاة/حدیث: 1429]

سیدنا ابن ام مکتوم رضی اللہ عنہ بیان کرتے ہیں: انہوں نے عرض کی: یا رسول اللہ! مجھے کوئی ساتھ لانے والا نہیں ہوتا، جو ہر وقت میرے ساتھ رہے، جبکہ میرے اور مسجد کے درمیان نالے بھی ہیں، درخت بھی ہیں، تو کیا میرے لیے اس بات کی گنجائش ہے کہ میں اپنے گھر میں نماز ادا کر لوں؟ نبی کریم صلی اللہ علیہ وسلم نے دریافت کیا: ”کیا تم اقامت کی آواز سنتے ہو؟“ انہوں نے عرض کیا: جی ہاں، نبی کریم صلی اللہ علیہ وسلم نے فرمایا: ”تم پھر یہاں (مسجد میں) آیا کرو۔“ [سنن الدارقطني/ كتاب الصلاة/حدیث: 1430]

سیدنا بلال رضی اللہ عنہ بیان کرتے ہیں: ایک مرتبہ ہم نبی کریم صلی اللہ علیہ وسلم کے ساتھ ایک سفر میں شریک تھے، آپ سو گئے، یہاں تک کہ سورج نکل آیا، نبی کریم صلی اللہ علیہ وسلم نے سیدنا بلال رضی اللہ عنہ کو حکم دیا، انہوں نے اذان دی، پھر نبی کریم صلی اللہ علیہ وسلم نے وضو کیا اور آپ نے دو رکعت ادا کی، پھر آپ نے صبح کی نماز (قضا کے طور پر) ادا کی۔ [سنن الدارقطني/ كتاب الصلاة/حدیث: 1431]