سیدنا انس رضی اللہ عنہ بیان کرتے ہیں: سیدنا ابوبکر رضی اللہ عنہ نے کہا: نبی کریم صلی اللہ علیہ وسلم نے یہ بات ارشاد فرمائی ہے: ”جب وہ لوگ اس بات کی گواہی دے دیں کہ اللہ تعالیٰ کے علاوہ اور کوئی معبود نہیں ہے اور محمد صلی اللہ علیہ وسلم اللہ کے رسول ہیں، اور وہ لوگ نماز قائم کریں، زکوٰۃ ادا کریں، تو وہ اپنی جان اور اپنے مال مجھ سے محفوظ کر لیں گے، البتہ ان کا حق برقرار رہے گا اور ان لوگوں کا حساب اللہ تعالیٰ کے ذمے ہو گا۔“ (پھر سیدنا ابوبکر رضی اللہ عنہ نے فرمایا) ”اللہ کی قسم! اگر وہ لوگ مجھے ایک ایسی رسی کی ادائیگی سے انکار کریں، جسے وہ نبی کریم صلی اللہ علیہ وسلم کو ادا کیا کرتے تھے، تو میں اس بات پر بھی ان کے ساتھ جنگ کروں گا۔“ [سنن الدارقطني/ كتاب زكاة/حدیث: 1883]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”مجھے تین باتوں کا حکم دیا گیا ہے، مجھے یہ حکم دیا گیا ہے کہ میں لوگوں کے ساتھ اس وقت تک جنگ کرتا رہوں، جب تک وہ یہ اعتراف نہ کر لیں کہ اللہ تعالیٰ کے علاوہ اور کوئی معبود نہیں، وہ نماز ادا کریں، زکوٰۃ ادا کریں، جب وہ ایسا کر لیں گے، تو اپنی جان اور مال کو مجھ سے محفوظ کر لیں، البتہ ان کا حق باقی رہے گا اور ان کا حساب اللہ تعالیٰ کے ذمے ہو گا۔“ [سنن الدارقطني/ كتاب زكاة/حدیث: 1884]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”مجھے یہ حکم دیا گیا ہے کہ لوگوں کے ساتھ اس وقت تک جنگ کرتا رہوں، جب تک وہ اس بات کی گواہی نہ دیں کہ اللہ تعالیٰ کے علاوہ کوئی معبود نہیں ہے، نماز قائم کریں، زکوٰۃ ادا کریں، جب وہ ایسا کر لیں گے، تو ان کے جان و مال میرے لیے قابل احترام ہو جائیں گے اور ان کا حساب اللہ تعالیٰ کے ذمے ہو گا۔“ [سنن الدارقطني/ كتاب زكاة/حدیث: 1885]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”مجھے اس بات کا حکم دیا گیا ہے کہ میں لوگوں کے ساتھ اس وقت تک جنگ کرتا رہوں، جب تک وہ اس بات کی گواہی نہ دیں کہ اللہ تعالیٰ کے علاوہ اور کوئی معبود نہیں ہے، وہ مجھ پر، میری لائی ہوئی (تعلیمات) پر ایمان لائیں، جب وہ میری لائی ہوئی تعلیمات کا اقرار کر لیں گے، تو اپنی جان اور اپنے مال کو مجھ سے محفوظ کر لیں گے، البتہ ان کا حق برقرار رہے گا اور ان لوگوں کا حساب اللہ تعالیٰ کے ذمے ہو گا۔“ [سنن الدارقطني/ كتاب زكاة/حدیث: 1886]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”آدمی کے مال میں اس وقت تک زکوٰۃ لازم نہیں ہوتی، جب تک ایک سال نہ گزر جائے۔“ دیگر راویوں نے اسے موقوف روایت کے طور پر نقل کیا ہے۔ [سنن الدارقطني/ كتاب زكاة/حدیث: 1887]

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”مال مستفید میں زکوٰۃ اس وقت تک لازم نہیں ہوتی، جب تک اس پر ایک سال نہ گزر جائے۔“ [سنن الدارقطني/ كتاب زكاة/حدیث: 1888]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی ہے: ”مال میں زکوٰۃ اس وقت تک دینا لازم نہیں ہوتی، جب تک اس پر ایک سال نہ گزر جائے۔“ یہاں پر بعض الفاظ نقل کرنے میں راویوں نے اختلاف کیا ہے۔ [سنن الدارقطني/ كتاب زكاة/حدیث: 1889]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب زكاة/حدیث: 1890]

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”مال میں زکوٰۃ اس وقت تک لازم نہیں ہوتی، جب تک اس پر ایک سال نہ گزر جائے۔“ [سنن الدارقطني/ كتاب زكاة/حدیث: 1891]

سیدنا علی رضی اللہ عنہ ارشاد فرماتے ہیں: ”مال میں زکوٰۃ اس وقت تک لازم نہیں ہوتی، جب تک اس پر ایک سال نہ گزر جائے۔“ [سنن الدارقطني/ كتاب زكاة/حدیث: 1892]