یہی روایت ایک اور سند کے ہمراہ منقول ہے، تاہم اس میں یہ الفاظ ہیں: ”ہم نبی کریم صلی اللہ علیہ وسلم کے زمانہ اقدس میں ام ولد کو فروخت کر دیا کرتے تھے۔“ [سنن الدارقطني/ كتاب المكاتب/حدیث: 4253]

سعید بن مسیب بیان کرتے ہیں: سیدنا عمر رضی اللہ عنہ نے ام ولد کنیزوں کو آزاد قرار دیا تھا، سیدنا عمر رضی اللہ عنہ نے یہ بات بیان کی تھی: نبی کریم صلی اللہ علیہ وسلم نے بھی انہیں آزاد قرار دیا ہے۔ [سنن الدارقطني/ كتاب المكاتب/حدیث: 4254]

سیدنا علی رضی اللہ عنہ کے بارے میں یہ بات منقول ہے: ایک مرتبہ انہوں نے ایک کنیز اور اس کے بچے کے درمیان علیحدگی کر دی تھی، تو نبی کریم صلی اللہ علیہ وسلم نے انہیں اس بات سے منع کیا تھا اور اس سودے کو ختم کر دیا تھا۔ [سنن الدارقطني/ كتاب المكاتب/حدیث: 4255]

سلیمان بن یسار بیان کرتے ہیں: ایک مرتبہ میں سیدنا زید بن ثابت رضی اللہ عنہ کے پاس بیٹھا ہوا تھا، ان کے پاس انصار کا ایک نوجوان آیا اور اس نے بتایا: میری ایک چچا زاد ہے، جس کا میں ولی ہوں، اس نے مدبر کے طور پر اپنی کنیز کو آزاد کر دیا ہے، اس (چچا زاد) کے پاس اس کنیز کے علاوہ اور کوئی مال نہیں ہے، تو سیدنا زید نے فرمایا: جب تک (تمہارا وہ چچا زاد) زندہ ہے، اس وقت تک تم اس کے ساتھ صلہ رحمی کرو۔ ابوبکر نامی راوی نے یہ کہا ہے: یہ حدیث ”غریب“ ہے۔ [سنن الدارقطني/ كتاب المكاتب/حدیث: 4256]

سیدنا عبداللہ بن عمر رضی اللہ عنہما ارشاد فرماتے ہیں: مدبرہ کنیزوں کی اولاد، ان کی آزادی کے ساتھ آزاد شمار ہو گی اور ان کی غلامی کے ساتھ غلام شمار ہو گی۔ [سنن الدارقطني/ كتاب المكاتب/حدیث: 4257]

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم کے زمانہ اقدس میں ایک شخص نے اپنے غلام کو آزاد کر دیا، اس نے مدبر کے طور پر اسے آزاد کیا تھا، تو نبی کریم صلی اللہ علیہ وسلم نے اس شخص کو یہ ہدایت کی کہ وہ اس غلام کو فروخت کر کے اپنے قرض کو ادا کر لے، تو اس شخص نے اس غلام کو آٹھ سو درہم میں فروخت کیا تھا۔ ابوجعفر نامی راوی بیان کرتے ہیں: جس وقت سیدنا جابر رضی اللہ عنہ نے یہ بات بیان کی، اس وقت میں بھی وہاں موجود تھا، انہوں نے اس بات کی اجازت دی تھی کہ اس کی خدمات کو فروخت کیا جا سکتا ہے۔ اس روایت کا راوی عبدالغفار ”ضعیف“ ہے، دیگر راویوں نے اسے ابوجعفر نامی راوی کے حوالے سے ”مرسل“ روایت کے طور پر نقل کیا ہے۔ [سنن الدارقطني/ كتاب المكاتب/حدیث: 4258]

ابوجعفر نامی راوی (شاید یہ امام باقر رضی اللہ عنہ ہیں) بیان کرتے ہیں کہ نبی کریم صلی اللہ علیہ وسلم نے مدبرہ کنیز کی خدمات کو فروخت کیا تھا۔ [سنن الدارقطني/ كتاب المكاتب/حدیث: 4259]

ابوجعفر نامی راوی بیان کرتے ہیں: نبی کریم صلی اللہ علیہ وسلم نے مدبرہ کنیز کی خدمات کو فروخت کیا تھا۔ ابوبکر نامی راوی بیان کرتے ہیں: مجھے اس بارے میں صرف یہی حدیث مل سکی ہے اور ابوجعفر نامی راوی اگرچہ ثقہ ہیں، لیکن ان کی روایت ”مرسل“ ہے۔ [سنن الدارقطني/ كتاب المكاتب/حدیث: 4260]

سیدنا جابر بن عبداللہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”مدبر کی خدمات فروخت کرنے میں کوئی حرج نہیں ہے، جبکہ وہ ضرورت مند ہو۔“ ابن طریف نامی راوی کے حوالے سے منقول ہونے کے اعتبار سے یہ روایت غلط ہے، صحیح روایت یہ ہے کہ اسے عبدالملک نامی راوی نے ابوجعفر نامی راوی سے ”مرسل“ روایت کے طور پر نقل کیا ہے اور یہ روایت پہلے گزر چکی ہے۔ [سنن الدارقطني/ كتاب المكاتب/حدیث: 4261]

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم نے مدبر کو فروخت کرنے کا حکم دیا ہے۔ [سنن الدارقطني/ كتاب المكاتب/حدیث: 4262]