۔ سیدناعبدالرحمن بن ابی بکر رضی اللہ عنہ سے مروی ہے کہ رسول اللہ صلی اللہ علیہ وآلہ وسلم نے فرمایا: اس اونٹنی پر سوار ہو جاؤ اوراپنی بہن عائشہ کو اپنے پیچھے بٹھا لو، پھر جب تم تنعیم کے ٹیلے سے اترو تو احرام باندھ لو اور (عمرہ کے لیے) آ جاؤ۔ یہ روانگی والی رات کی بات تھی۔ [الفتح الربانی/كتاب الحج والعمرة/حدیث: 4149]

۔ (دوسری سند) یہ حدیث بھی سابق حدیث کی مانند ہے، البتہ اس میں ہے: جب تم تنعیم کے ٹیلے سے اترو تو عائشہ احرام باندھ لے، پس بیشک یہ عمرہ مقبول ہو گا۔ [الفتح الربانی/كتاب الحج والعمرة/حدیث: 4150]

۔ سعید بن جییرکہتے ہیں: میں نے سیدنا عبد اللہ بن عباس رضی اللہ عنہ سے کہا:ابوالعباس! مجھے تعجب ہے کہ صحابہ کا اس جگہ کے بارے میں بھی اختلاف ہے کہ آپ صلی اللہ علیہ وآلہ وسلم نے تلبیہ کہاں سے پڑھا تھا؟ سیدنا عبد اللہ بن عباس رضی اللہ عنہ نے فرمایا: اس کے بارے میں میں سب سے زیادہ علم رکھتا ہوں، رسول اللہ صلی اللہ علیہ وآلہ وسلم نے چونکہ ایک ہی حج کیا تھا، اس لئے یہ اختلاف ہوا ہے، تفصیل یہ ہے کہ رسول اللہ صلی اللہ علیہ وآلہ وسلم حج کے ارادہ سے روانہ ہوئے، جب آپ صلی اللہ علیہ وآلہ وسلم ذوالحلیفہ میں اپنی مسجد میں دو رکعت نماز پڑھ کر فارغ ہوئے تو آپ صلی اللہ علیہ وآلہ وسلم نے وہیں سے تلبیہ پڑھا تھا اور حج کا احرام باندھا تھا، جن لوگوں نے یہ تلبیہ آپ سے سنا، انہوں نے اس کو یاد کر لیا، پھر جب آپ صلی اللہ علیہ وآلہ وسلم سواری پر سوارے ہوئے اور اونٹنی سیدھی ہوئی تو آپ صلی اللہ علیہ وآلہ وسلم نے دوبارہ تلبیہ پڑھا، کچھ لوگوں نے پہلی بار یہ تلبیہ سنا، بات یہ ہے کہ لوگ مختلف گروہوں اور قافلوں کی صورت میں آ رہے تھے، بہرحال جب اونٹنی آپ صلی اللہ علیہ وآلہ وسلم کو لے کر سیدھی کھڑی ہوئی تو اس وقت کچھ لوگوں نے آپ صلی اللہ علیہ وآلہ وسلم سے تلبیہ سنا اورانہوں نے یہ کہہ دیا کہ آپ صلی اللہ علیہ وآلہ وسلم نے اونٹنی کے کھڑے ہونے کے بعد تلبیہ پڑھا۔اس کے بعد رسول اللہ صلی اللہ علیہ وآلہ وسلم آگے روانہ ہوئے اور جب بیداء کے ٹیلے پر پہنچے تو آپ صلی اللہ علیہ وآلہ وسلم نے پھر تلبیہ پڑھا، جن لوگوں نے آپ صلی اللہ علیہ وآلہ وسلم سے وہاں تلبیہ سنا انہوں نے کہہ دیا کہ آپ صلی اللہ علیہ وآلہ وسلم نے بیداء کے ٹیلہ پر جا کر تلبیہ پڑھا تھا، اللہ کی قسم! آپ صلی اللہ علیہ وآلہ وسلم نے جہاں نماز پڑھی تھی وہیں سے تلبیہ شروع کیا تھا، اس کے بعد جب آپ صلی اللہ علیہ وآلہ وسلم کی اونٹنی سیدھی کھڑی ہوئی تو آپ صلی اللہ علیہ وآلہ وسلم نے پھر تلبیہ پڑھا تھا اور جب آپ صلی اللہ علیہ وآلہ وسلم بیداء کے ٹیلہ پر پہنچے تب بھی آپ صلی اللہ علیہ وآلہ وسلم نے تلبیہ پڑھا تھا۔ پس جن لوگوں نے سیدنا عبد اللہ بن عباس رضی اللہ عنہ کے قول کو اختیار کیا ہے وہ دو رکعت نماز سے فارغ ہو کر تلبیہ پڑھتے ہیں۔ [الفتح الربانی/كتاب الحج والعمرة/حدیث: 4151]

۔ سیدناانس بن مالک رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے ظہر کی نماز ادا کی، اس کے بعد آپ صلی اللہ علیہ وآلہ وسلم سوار ہوئے اور جب بیداء کے ٹیلے پر پہنچے تو آپ صلی اللہ علیہ وآلہ وسلم نے تلبیہ پکارا۔ [الفتح الربانی/كتاب الحج والعمرة/حدیث: 4152]

۔ سالم بن عبد اللہ کہتے ہیں کہ سیدنا عبد اللہ بن عمر رضی اللہ عنہ یہ کہا کرتے تھے: یہ ہے وہ مقامِ بیداء، جس کے متعلق لوگ رسول اللہ صلی اللہ علیہ وآلہ وسلم کی طرف غلط بات منسوب کرتے ہیں، اللہ کی قسم! نبی کریم صلی اللہ علیہ وآلہ وسلم نے تو اس مقام سے احرام باندھا اور تلبیہ پڑھا تھا، جہاں اس وقت مسجد ذوالحلیفہ ہے۔ [الفتح الربانی/كتاب الحج والعمرة/حدیث: 4153]

۔ (دوسری سند) جب سیدنا ابن عمر رضی اللہ عنہ کے سامنے بیداء کا ذکر کیا جاتا تو وہ اسے برا بھلا کہتے اورپھر بیان کرتے کہ رسول اللہ صلی اللہ علیہ وآلہ وسلم نے تو ذوالحلیفہ سے احرام باندھا تھا۔ [الفتح الربانی/كتاب الحج والعمرة/حدیث: 4154]

۔ سیدنا عبد اللہ بن عمر رضی اللہ عنہ سے مروی ہے کہ جب رسول اللہ صلی اللہ علیہ وآلہ وسلم رکاب میں پاؤں رکھتے اور آپ صلی اللہ علیہ وآلہ وسلم کی اونٹنی سیدھی کھڑی ہو جاتی تو آپ صلی اللہ علیہ وآلہ وسلم ذوالحلیفہ مسجد کے مقام سے تلبیہ کہتے۔ [الفتح الربانی/كتاب الحج والعمرة/حدیث: 4155]

۔ سیدہ عائشہ رضی اللہ عنہ سے روایت ہے کہ رسول اللہ صلی اللہ علیہ وآلہ وسلم جب احرام باندھنے کا ارادہ کرتے تو خطمی بوٹی اور اُشنان گھاس سے اپنا سر دھوتے اور سر پر کچھ زیتون کا تیل بھی لگاتے تھے۔ [الفتح الربانی/كتاب الحج والعمرة/حدیث: 4156]

۔ سیدہ عائشہ رضی اللہ عنہ سے روایت ہے، وہ کہتی ہیں: حجۃ الوداوع کے موقع پر میں نے اپنے ان ہاتھوں سے رسول اللہ صلی اللہ علیہ وآلہ وسلم کو احرام باندھتے وقت اور احرام کھولتے وقت مختلف اشیاء سے بنی ہوئی خو شبو لگائی تھی،یعنی جب آپ صلی اللہ علیہ وآلہ وسلم احرام باندھنے لگے تو اس وقت لگائی اور جب آپ صلی اللہ علیہ وآلہ وسلم نے دس ذوالحجہ کو طوافِ افاضہ سے پہلے جمرۂ عقبہ کو کنکریاں ماریں تو اس وقت خوشبو لگائی تھی۔ [الفتح الربانی/كتاب الحج والعمرة/حدیث: 4157]

۔ عروہ کہتے ہیں: میں نے سیدہ عائشہ رضی اللہ عنہ سے پوچھا: آپ نے رسول اللہ صلی اللہ علیہ وآلہ وسلم کو کونسی خوشبو لگائی تھی؟ انہوں نے کہا: سب سے عمدہ خوشبو (یعنی کستوری)۔ [الفتح الربانی/كتاب الحج والعمرة/حدیث: 4158]