جناب بکر بن عبداللہ رضی اللہ عنہ نے نبی کریم صلی اللہ علیہ وسلم سے یہ مذکورہ حدیث بیان کی تو انہوں نے اس میں جہاں لفظ «قَذَر» آیا ہے وہاں دونوں جگہ «خُبْث» استعمال کیا (اور معنی ان سب کا ”نجاست“ ہے)۔ [سنن ابي داود/كتاب الصلاة/حدیث: 651]

سیدنا شداد بن اوس رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”یہود کی مخالفت کرو، یہ لوگ اپنے جوتوں یا موزوں میں نماز نہیں پڑھتے ہیں۔“ [سنن ابي داود/كتاب الصلاة/حدیث: 652]

جناب عمرو بن شعیب (عن أبیہ عن جدہ رضی اللہ عنہ) کے واسطے سے مروی ہے، وہ روایت کرتے ہیں: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم جوتے اتار کر نماز پڑھتے تھے اور پہن کر بھی۔“ [سنن ابي داود/كتاب الصلاة/حدیث: 653]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی نماز پڑھے تو اپنے جوتوں کو اپنی دائیں جانب نہ رکھا کرے اور نہ بائیں جانب کہ اس طرح وہ کسی دوسرے کی دائیں جانب ہوں گے۔ ہاں اگر اس کی بائیں جانب کوئی اور نہ ہو تو اس طرف رکھ لے ورنہ انہیں اپنے دونوں قدموں کے درمیان میں رکھے۔“ [سنن ابي داود/كتاب الصلاة/حدیث: 654]

سیدنا ابوہریرہ رضی اللہ عنہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جب کوئی نماز پڑھنے لگے اور اپنے جوتے اتارے تو ان سے کسی دوسرے کو ایذا نہ دے۔ (یعنی اس کے آگے یا دائیں طرف نہ رکھے یا کسی اور طرح سے بھی اذیت کا باعث نہ بنے۔) چاہیے کہ انہیں اپنے قدموں کے درمیان میں رکھے یا پہنے ہوئے ہی نماز پڑھ لے۔“ [سنن ابي داود/كتاب الصلاة/حدیث: 655]

ام المؤمنین سیدہ میمونہ بنت حارث رضی اللہ عنہا بیان کرتی ہیں کہ ”رسول اللہ صلی اللہ علیہ وسلم نماز پڑھتے تو میں آپ صلی اللہ علیہ وسلم کے قریب برابر ہی میں ہوتی اور ایام سے ہوتی، آپ صلی اللہ علیہ وسلم سجدے کو جاتے تو بسا اوقات آپ صلی اللہ علیہ وسلم کا کپڑا بھی مجھے لگتا اور آپ صلی اللہ علیہ وسلم چھوٹی چٹائی پر نماز پڑھا کرتے تھے۔“ [سنن ابي داود/كتاب الصلاة/حدیث: 656]

سیدنا انس بن مالک رضی اللہ عنہ سے روایت ہے، انہوں نے کہا کہ ایک انصاری نے کہا: ”اے اللہ کے رسول! میں بھاری جسم والا ہوں“ (اور وہ واقعی موٹا تھا) ”میں آپ کی معیت میں نماز ادا نہیں کر سکتا۔“ اور اس نے آپ صلی اللہ علیہ وسلم کے لیے کھانا تیار کروایا اور آپ صلی اللہ علیہ وسلم کو اپنے گھر دعوت دی کہ ”آپ (میرے ہاں گھر میں) نماز پڑھیں، حتیٰ کہ آپ کو دیکھوں کہ آپ کیسے نماز پڑھتے ہیں، لہٰذا میں بھی آپ کی طرح کیا کروں۔“ (چنانچہ آپ صلی اللہ علیہ وسلم اس کے گھر تشریف لے گئے) تو ان لوگوں نے آپ صلی اللہ علیہ وسلم کے لیے چٹائی کے ایک ٹکڑے پر پانی چھڑکا (تاکہ وہ نرم ہو جائے)، آپ صلی اللہ علیہ وسلم نے اس پر کھڑے ہو کر دو رکعت نماز پڑھی۔ جارود کے بیٹے فلاں نے سیدنا انس رضی اللہ عنہ سے پوچھا کہ کیا آپ صلی اللہ علیہ وسلم ضحیٰ (چاشت کے وقت) کی نماز پڑھا کرتے تھے؟ انہوں نے کہا: ”میں نے آپ صلی اللہ علیہ وسلم کو صرف اسی دن یہ نماز پڑھتے دیکھا تھا۔“ [سنن ابي داود/كتاب الصلاة/حدیث: 657]

سیدنا انس بن مالک رضی اللہ عنہ سے روایت ہے کہ ”نبی کریم صلی اللہ علیہ وسلم سیدہ ام سلیم رضی اللہ عنہا کی ملاقات کے لیے جایا کرتے تھے تو بعض اوقات ان کے ہاں نماز کا وقت بھی ہو جاتا۔ پس آپ صلی اللہ علیہ وسلم ہماری ایک چٹائی پر نماز پڑھا کرتے تھے، وہ اس چٹائی پر پانی چھڑک دیا کرتی تھیں۔“ [سنن ابي داود/كتاب الصلاة/حدیث: 658]

سیدنا مغیرہ بن شعبہ رضی اللہ عنہ بیان کرتے ہیں کہ رسول اللہ صلی اللہ علیہ وسلم ”چٹائی اور رنگے ہوئے چمڑے پر نماز پڑھتے تھے۔“ [سنن ابي داود/كتاب الصلاة/حدیث: 659]

سیدنا انس بن مالک رضی اللہ عنہ سے مروی ہے کہ ”سخت گرمی کے موسم میں ہم رسول اللہ صلی اللہ علیہ وسلم کے ساتھ نماز پڑھا کرتے تھے، تو جب کوئی ہم میں سے اپنی پیشانی زمین پر نہ ٹکا سکتا، تو اپنا کپڑا بچھا لیتا پھر اس پر سجدہ کرتا۔“ [سنن ابي داود/كتاب الصلاة/حدیث: 660]