سیدنا ابوہریرہ رضی اللہ عنہ نبی کریم صلی اللہ علیہ وسلم سے ذوالیدین کے قصے میں بیان کرتے ہیں کہ ”آپ نے تکبیر کہی اور سجدہ کیا۔“ جبکہ ہشام بن حسان نے روایت کیا کہ ”آپ نے تکبیر کہی (یعنی تحریمہ) پھر «اللهُ أَكْبَرُ» کہا اور سجدہ کیا۔“ امام ابوداؤد رحمہ اللہ کہتے ہیں: ”اس حدیث کو حبیب بن شہید، حمید، یونس اور عاصم احول (چاروں) نے محمد بن سیرین سے اور وہ سیدنا ابوہریرہ رضی اللہ عنہ سے بیان کرتے ہیں اور ان میں سے کسی نے بھی وہ بات ذکر نہیں کی جو حماد بن زید نے ہشام سے بیان کی ہے کہ آپ نے تکبیر (تکبیر تحریمہ) کہی پھر تکبیر کہی اور سجدہ کیا۔ اسی طرح حماد بن سلمہ اور ابوبکر بن عیاش بھی ہشام سے یہ روایت ذکر کرتے ہیں تو انہوں نے بھی حماد بن زید والی یہ بات ذکر نہیں کی کہ آپ نے تکبیر (تکبیر تحریمہ) کہی پھر تکبیر کہی۔“ [سنن ابي داود/أبواب تفريع استفتاح الصلاة /حدیث: 1011]

سعید بن مسیب، ابوسلمہ اور عبیداللہ بن عبداللہ (تینوں) سیدنا ابوہریرہ رضی اللہ عنہ سے یہ قصہ بیان کرتے ہیں، انہوں نے کہا: ”نبی کریم صلی اللہ علیہ وسلم نے سہو کے سجدے نہیں کیے حتیٰ کہ اللہ نے آپ کو اس کا یقین دلا دیا۔“ [سنن ابي داود/أبواب تفريع استفتاح الصلاة /حدیث: 1012]

ابن شہاب سے روایت ہے کہ ابوبکر بن سلیمان بن ابی حثمہ (تابعی) نے ان سے بیان کیا کہ انہیں رسول اللہ صلی اللہ علیہ وسلم سے یہ خبر پہنچی ہے۔ انہوں نے کہا کہ ”آپ صلی اللہ علیہ وسلم نے شک کی بنا پر کیے جانے والے سجدے اس وقت تک نہیں کیے جب تک کہ لوگوں نے مل کر نہیں بتایا۔“ ابن شہاب کہتے ہیں کہ مجھے یہ حدیث سعید بن مسیب نے سیدنا ابوہریرہ رضی اللہ عنہ سے بیان کی (علاوہ ازیں) کہا کہ مجھے ابوسلمہ بن عبدالرحمٰن، ابوبکر بن حارث بن ہشام اور عبیداللہ بن عبداللہ (نے بھی سیدنا ابوہریرہ رضی اللہ عنہ سے روایت کی ہے)۔ امام ابوداؤد رحمہ اللہ نے کہا: ”یحییٰ بن ابی کثیر اور عمران بن ابی انس نے ابوسلمہ بن عبدالرحمٰن اور علاء بن عبدالرحمٰن سے بواسطہ ان کے والد کے روایت کی ہے اور یہ سب سیدنا ابوہریرہ رضی اللہ عنہ سے یہ قصہ بیان کرتے ہیں اور اس میں دو سجدے کرنے کا ذکر نہیں ہے۔“ امام ابوداؤد رحمہ اللہ نے کہا: ”اور زبیدی نے زہری سے، وہ ابوبکر بن سلیمان بن ابی حثمہ سے، وہ نبی کریم صلی اللہ علیہ وسلم سے روایت کرتے ہیں اور اس میں کہا کہ آپ صلی اللہ علیہ وسلم نے سہو کے دونوں سجدے نہیں کیے۔“ [سنن ابي داود/أبواب تفريع استفتاح الصلاة /حدیث: 1013]

ابوسلمہ بن عبدالرحمٰن، سیدنا ابوہریرہ رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے ظہر کی نماز پڑھائی تو آپ صلی اللہ علیہ وسلم نے دو رکعتوں پر سلام پھیر دیا۔ آپ صلی اللہ علیہ وسلم سے کہا گیا: ”(کیا) نماز کم ہو گئی ہے؟“ تب آپ صلی اللہ علیہ وسلم نے دو رکعتیں (مزید) پڑھیں پھر دو سجدے کیے۔ [سنن ابي داود/أبواب تفريع استفتاح الصلاة /حدیث: 1014]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے ایک فرض نماز میں دو رکعتوں پر سلام پھیر دیا تو ایک شخص نے آپ صلی اللہ علیہ وسلم سے کہا: ”کیا نماز کم ہو گئی ہے؟ اے اللہ کے رسول! یا آپ بھول گئے ہیں؟“ آپ صلی اللہ علیہ وسلم نے فرمایا: ”ان میں سے کچھ بھی نہیں ہوا۔“ تو لوگوں نے کہا: ”تحقیق آپ نے ایسا کیا ہے، اے اللہ کے رسول!“ تب آپ صلی اللہ علیہ وسلم نے دو رکعتیں مزید پڑھائیں، پھر آپ پلٹے اور سہو کے دو سجدے نہیں کیے۔ امام ابوداؤد رحمہ اللہ نے کہا: اس روایت کو داؤد بن حصین نے بواسطہ ابوسفیان مولیٰ ابن ابی احمد، سیدنا ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے یہ قصہ بیان کیا تو کہا: ”پھر آپ نے دو سجدے کیے جبکہ آپ سلام کے بعد بیٹھے ہوئے تھے۔“ [سنن ابي داود/أبواب تفريع استفتاح الصلاة /حدیث: 1015]

ضمضم بن جوس ہفانی نے سیدنا ابوہریرہ رضی اللہ عنہ سے یہ خبر بیان کی، انہوں نے کہا: ”پھر آپ صلی اللہ علیہ وسلم نے سلام کے بعد سہو کے دو سجدے کیے۔“ [سنن ابي داود/أبواب تفريع استفتاح الصلاة /حدیث: 1016]

سیدنا ابن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے ہمیں نماز پڑھائی تو ”دو رکعتوں پر سلام پھیر دیا“ اور ابن سیرین کی حدیث کی مانند بیان کیا جو سیدنا ابوہریرہ رضی اللہ عنہ سے مروی ہے اور کہا: ”پھر آپ صلی اللہ علیہ وسلم نے سلام پھیرا، پھر سہو کے دو سجدے کیے۔“ [سنن ابي داود/أبواب تفريع استفتاح الصلاة /حدیث: 1017]

سیدنا عمران بن حصین رضی اللہ عنہ بیان کرتے ہیں کہ رسول اللہ صلی اللہ علیہ وسلم نے عصر کی نماز میں تین رکعات پر سلام پھیر دیا۔ پھر آپ صلی اللہ علیہ وسلم اپنے حجرات میں تشریف لے گئے، تو ایک آدمی جس کا نام خرباق تھا آپ کی طرف گیا اور یہ لمبے ہاتھوں والا تھا، کہنے لگا: ”اے اللہ کے رسول! کیا نماز کم کر دی گئی ہے؟“ تو آپ صلی اللہ علیہ وسلم غصے میں چادر گھسیٹتے ہوئے باہر تشریف لائے اور کہا: ”کیا یہ سچ کہتا ہے؟“ لوگوں نے کہا: ”ہاں!“ تب آپ نے وہ رکعت پڑھائی، پھر سلام پھیرا، پھر دو سجدے کیے، پھر سلام پھیرا۔ [سنن ابي داود/أبواب تفريع استفتاح الصلاة /حدیث: 1018]

سیدنا عبداللہ بن مسعود رضی اللہ عنہ بیان کرتے ہیں کہ (ایک بار) رسول اللہ صلی اللہ علیہ وسلم نے ہمیں ظہر کی پانچ رکعتیں پڑھا دیں۔ تو آپ صلی اللہ علیہ وسلم سے کہا گیا: ”کیا نماز میں اضافہ کر دیا گیا ہے؟“ آپ صلی اللہ علیہ وسلم نے فرمایا: ”کیا ہوا؟“ کہنے لگے کہ ”آپ نے پانچ رکعتیں پڑھائی ہیں۔“ تب آپ صلی اللہ علیہ وسلم نے دو سجدے کیے جبکہ آپ صلی اللہ علیہ وسلم سلام پھیر چکے تھے۔ [سنن ابي داود/أبواب تفريع استفتاح الصلاة /حدیث: 1019]

سیدنا عبداللہ بن مسعود رضی اللہ عنہ نے بیان کیا کہ رسول اللہ صلی اللہ علیہ وسلم نے نماز پڑھائی، ابراہیم نے کہا: ”معلوم نہیں اس میں کوئی کمی کر دی یا بیشی۔“ جب سلام پھیرا تو آپ صلی اللہ علیہ وسلم سے کہا گیا: ”اے اللہ کے رسول! کیا نماز کے متعلق کوئی نیا حکم آیا ہے؟“ آپ صلی اللہ علیہ وسلم نے فرمایا: ”کیا ہوا؟“ کہنے لگے کہ ”آپ نے ایسے ایسے نماز پڑھائی ہے۔“ تو آپ صلی اللہ علیہ وسلم نے اپنا پاؤں موڑا، قبلہ رخ ہوئے اور انہیں دو سجدے کرائے، پھر سلام پھیرا۔ جب پھرے تو ہماری طرف متوجہ ہوئے اور فرمایا: ”بلاشبہ اگر نماز کے متعلق کوئی نیا حکم آتا تو میں تمہیں بتلا دیتا، لیکن میں بشر ہوں، ویسے ہی بھولتا ہوں جیسے تم بھولتے ہو۔ جب میں بھول جاؤں تو مجھے یاد کرا دیا کرو۔“ اور فرمایا: ”جب کسی کو نماز میں شک ہو جائے تو چاہیے کہ غور کرے کہ ٹھیک کیا ہے اور اسی پر اپنی نماز کو مکمل کرے، پھر سلام پھیرے پھر دو سجدے کرے۔“ [سنن ابي داود/أبواب تفريع استفتاح الصلاة /حدیث: 1020]