سیدنا جابر بن عبداللہ رضی اللہ عنہما بیان کرتے ہیں: ایک مرتبہ نبی اکرم صلی اللہ علیہ وسلم ”جعرانہ“ میں مال غنیمت تقسیم کر رہے تھے۔ ایک شخص نے آپ کی خدمت میں گزارش کی: آپ عدل سے کام لیجئے، تو نبی اکرم صلی اللہ علیہ وسلم نے ارشاد فرمایا: ”ہائے افسوس! اگر میں عدل سے کام نہیں لوں گا، تو پھر تو میں برے نصیب والا ہو جاؤں گا۔“ [صحیح ابن حبان/كتاب العلم/حدیث: 101]

سیدنا عبداللہ بن عباس رضی اللہ عنہما کے بارے میں یہ بات منقول ہے کہ ایک مرتبہ ان کی اور حر بن قیس فزاری رضی اللہ عنہ کی سیدنا موسیٰ علیہ السلام کے ساتھی کے بارے میں ملاقات ہو گئی (یعنی جن سے ملنے کے لیے سیدنا موسیٰ علیہ السلام گئے تھے)۔ سیدنا ابن عباس رضی اللہ عنہما کا کہنا تھا: وہ سیدنا خضر علیہ السلام تھے۔ سیدنا ابی بن کعب رضی اللہ عنہ دونوں صاحبان کے پاس سے گزرے۔ سیدنا عبداللہ بن عباس رضی اللہ عنہما نے انہیں بلایا اور بولے: اے ابوطفیل! آپ ہمارے پاس تشریف لائیے۔ میری اور میرے اس ساتھی کی سیدنا موسیٰ علیہ السلام کے واقعے والے ان صاحب کے بارے میں بحث ہو گئی ہے، جس کے بارے میں سیدنا موسیٰ علیہ السلام نے یہ دعا مانگی تھی کہ ان سے ملاقات کا راستہ مل جائے، تو کیا آپ نے اس بارے میں نبی اکرم صلی اللہ علیہ وسلم کو کوئی بات ارشاد فرماتے ہوئے سنا ہے؟ نبی اکرم صلی اللہ علیہ وسلم نے فرمایا: ”ایک مرتبہ سیدنا موسیٰ علیہ السلام بنی اسرائیل کے ایک گروہ میں بیٹھے ہوئے تھے۔ اسی دوران ایک شخص ان کے پاس آیا اور ان سے دریافت کیا: کیا آپ کسی ایسے شخص سے واقف ہیں جو آپ سے زیادہ علم رکھتا ہو؟ تو سیدنا موسیٰ علیہ السلام نے جواب دیا: جی نہیں۔ تو اللہ تعالیٰ نے سیدنا موسیٰ علیہ السلام کی طرف وحی کی: ایسا نہیں ہے، بلکہ ہمارا بندہ خضر (تم سے زیادہ علم رکھتا ہے)۔ تو سیدنا موسیٰ علیہ السلام نے ان سے ملاقات کی دعا مانگی۔ اللہ تعالیٰ نے مچھلی کو ان کے لیے نشانی قرار دیا اور ان سے یہ کہا گیا: جب تم مچھلی کو گم کرو گے، تو تم واپسی کی طرف آنا تمہاری اس سے ملاقات ہو جائے گی۔ تو سیدنا موسیٰ علیہ السلام روانہ ہوئے اور جتنا اللہ کو منظور تھا وہ چلتے رہے۔ انہوں نے اپنے ساتھی سے کہا: ہمارا کھانا ہمارے پاس لے کر آؤ، تو اس نے سیدنا موسیٰ علیہ السلام سے کہا: اس وقت جب سیدنا موسیٰ علیہ السلام نے کھانا طلب کیا تھا، کیا آپ نے یہ بات ملاحظہ فرمائی؟ ﴿أَرَأَيْتَ إِذْ أَوَيْنَا إِلَى الصَّخْرَةِ فَإِنِّي نَسِيتُ الْحُوتَ وَمَا أَنْسَانِيهِ إِلَّا الشَّيْطَانُ أَنْ أَذْكُرَهُ﴾ [سورة الكهف: 63] ”جب ہم چٹان کے سائے میں آئے تھے، تو میں مچھلی کو بھول گیا تھا، اور اس کا ذکر کرنا مجھے شیطان نے ہی بھلایا تھا“۔ تو سیدنا موسیٰ علیہ السلام نے اپنے ساتھی سے کہا: ﴿ذَلِكَ مَا كُنَّا نَبْغِ﴾ [سورة الكهف: 64] ”یہ وہ جگہ ہے، جسے ہم تلاش کر رہے تھے“، ﴿فَارْتَدَّا عَلَى آثَارِهِمَا قَصَصًا﴾ [سورة الكهف: 64] ”تو وہ دونوں اپنے قدموں کے نشانات پر چلتے ہوئے واپس آئے“، تو ان دونوں نے سیدنا خضر علیہ السلام کو پا لیا، پھر ان دونوں کا وہ واقعہ ہے، جو اللہ تعالیٰ نے اپنی کتاب میں بیان کیا ہے۔“ [صحیح ابن حبان/كتاب العلم/حدیث: 102]

سیدنا ابوہریرہ رضی اللہ عنہ بیان کرتے ہیں: ایک شخص نبی اکرم صلی اللہ علیہ وسلم کی خدمت میں حاضر ہوا۔ اس نے عرض کی: اے سیدنا محمد صلی اللہ علیہ وسلم ! کیا آپ یہ سمجھتے ہیں، جنت کی چوڑائی آسمانوں اور زمین جتنی ہے، تو پھر جہنم کہاں ہے؟ نبی اکرم صلی اللہ علیہ وسلم نے ارشاد فرمایا: ”تم نے اس رات کے بارے میں غور کیا؟ پہلے یہ تھی، پھر یہ نہیں ہوتی۔ تو یہ کہاں سے آتی ہے؟“ اس نے کہا: اللہ بہتر جانتا ہے، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ جو چاہتا ہے وہ کر لیتا ہے۔“ [صحیح ابن حبان/كتاب العلم/حدیث: 103]

سیدنا ابوہریرہ رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم لوگوں کے ساتھ بات چیت کر رہے تھے کہ ایک دیہاتی آپ صلی اللہ علیہ وسلم کی خدمت میں حاضر ہوا، اس نے دریافت کیا: قیامت کب آئے گی؟ نبی اکرم صلی اللہ علیہ وسلم نے اپنی بات جاری رکھی۔ حاضرین میں سے بعض حضرات نے یہ سمجھا کہ اس دیہاتی نے جو کہا ہے، نبی اکرم صلی اللہ علیہ وسلم نے وہ بات سن لی ہے اور آپ صلی اللہ علیہ وسلم نے اس کے سوال کو پسند نہیں کیا، جبکہ بعض نے یہ سمجھا کہ نبی اکرم صلی اللہ علیہ وسلم نے اس کی بات سنی ہی نہیں ہے۔ جب نبی اکرم صلی اللہ علیہ وسلم نے اپنی بات مکمل کر لی تو آپ صلی اللہ علیہ وسلم نے دریافت فرمایا: ”قیامت کے بارے میں دریافت کرنے والا شخص کہاں ہے؟“ اس نے عرض کی: میں یہاں ہوں۔ نبی اکرم صلی اللہ علیہ وسلم نے فرمایا: ”جب امانت کو ضائع کیا جائے، تو تم قیامت کا انتظار کرو۔“ اس نے دریافت کیا: اس کو ضائع کرنے سے مراد کیا ہے؟ نبی اکرم صلی اللہ علیہ وسلم نے ارشاد فرمایا: ”جب معاملہ (نااہل لوگوں کے) سپرد کر دیا جائے، تو تم قیامت کا انتظار کرو۔“ [صحیح ابن حبان/كتاب العلم/حدیث: 104]

سیدنا انس بن مالک رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور اس نے دریافت کیا: یا رسول اللہ! قیامت کب آئے گی؟ نبی اکرم صلی اللہ علیہ وسلم نماز ادا کرنے کے لیے کھڑے ہو گئے۔ جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے دریافت فرمایا: ”قیامت کے بارے میں سوال کرنے والا شخص کہاں ہے؟“ اس نے عرض کی: یا رسول اللہ! میں (یہاں) ہوں۔ نبی اکرم صلی اللہ علیہ وسلم نے فرمایا: ”تم نے اس کے لیے کیا تیاری کی ہے؟“ اس نے عرض کی: میں نے اس کے لیے کوئی بڑی تیاری تو نہیں کی، نہ تو نماز کے حوالے سے اور نہ ہی روزے کے حوالے سے۔ (راوی کو شک ہے شاید یہ الفاظ ہیں) اس نے عرض کی: میں نے کسی بڑے عمل کے حوالے سے تیاری نہیں کی ہے، البتہ میں اللہ اور اس کے رسول سے محبت رکھتا ہوں، تو نبی اکرم صلی اللہ علیہ وسلم نے ارشاد فرمایا: ”آدمی قیامت کے دن اس شخص کے ساتھ ہو گا جس سے وہ محبت رکھتا ہے۔“ (راوی کو شک ہے شاید یہ الفاظ ہیں) ”تم اس کے ساتھ ہو گے جس سے تم محبت رکھتے ہو۔“ سیدنا انس رضی اللہ عنہ بیان کرتے ہیں: میں نے مسلمانوں کو اسلام قبول کرنے کے بعد اور کسی بات پر اتنا خوش ہوتے ہوئے نہیں دیکھا جتنا وہ اس بات پر خوش ہوئے تھے۔ [صحیح ابن حبان/كتاب العلم/حدیث: 105]

ابن شہاب بیان کرتے ہیں: سیدنا انس بن مالک رضی اللہ عنہ نے مجھے بتایا: ایک دن نبی اکرم صلی اللہ علیہ وسلم سورج ڈھل جانے کے بعد باہر تشریف لائے۔ آپ نے لوگوں کو ظہر کی نماز پڑھائی۔ جب آپ نے سلام پھیرا تو آپ منبر پر کھڑے ہو گئے۔ آپ نے قیامت کا تذکرہ کیا اور اس بات کا تذکرہ کیا کہ اس سے پہلے کچھ بڑے حیرت انگیز (واقعات رونما ہوں گے) آپ نے ارشاد فرمایا: ”جو شخص مجھ سے کسی بھی چیز کے بارے میں کچھ دریافت کرنا چاہتا ہو، وہ مجھ سے اس بارے میں دریافت کرے۔ جب تک میں اس جگہ پر کھڑا ہوا ہوں۔ اللہ کی قسم! تم مجھ سے جس بھی چیز کے بارے میں دریافت کرو گے، میں تم لوگوں کو اس کے بارے میں بتا دوں گا۔“ سیدنا انس بن مالک رضی اللہ عنہ بیان کرتے ہیں: جب لوگوں نے نبی اکرم صلی اللہ علیہ وسلم کی یہ بات سنی تو انہوں نے زیادہ رونا شروع کر دیا اور نبی اکرم صلی اللہ علیہ وسلم نے بکثرت یہ کہنا شروع کیا: ”تم لوگ مجھ سے سوال کرو۔ تم لوگ مجھ سے سوال کرو۔“ تو سیدنا عبداللہ بن حذافہ رضی اللہ عنہما کھڑے ہوئے۔ انہوں نے عرض کی: یا رسول اللہ! میرا باپ کون ہے؟ آپ صلی اللہ علیہ وسلم نے ارشاد فرمایا: ”تمہارا باپ حذافہ ہے۔“ جب نبی اکرم صلی اللہ علیہ وسلم مسلسل یہ بات ارشاد فرماتے رہے کہ ”تم لوگ مجھ سے کچھ پوچھو۔“ تو سیدنا عمر بن خطاب رضی اللہ عنہ گھٹنوں کے بل کھڑے ہوئے۔ انہوں نے عرض کی: یا رسول اللہ! ہم اللہ تعالیٰ کے پروردگار ہونے، اسلام کے دین ہونے اور محمد صلی اللہ علیہ وسلم کے رسول ہونے سے راضی ہیں۔ (یعنی ان پر ایمان رکھتے ہیں) راوی کہتے ہیں: جب سیدنا عمر رضی اللہ عنہ نے یہ کہا تو نبی اکرم صلی اللہ علیہ وسلم خاموش ہو گئے، پھر نبی اکرم صلی اللہ علیہ وسلم نے یہ بات ارشاد فرمائی: ”اس ذات کی قسم! جس کے دست قدرت میں میری جان ہے۔ ابھی میرے سامنے اس دیوار پر جنت اور جہنم کو پیش کیا گیا، تو میں نے آج کی طرح بھلائی اور برائی کو (ایک ساتھ) کبھی نہیں دیکھا۔“ [صحیح ابن حبان/كتاب العلم/حدیث: 106]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم مسجد میں ایک شخص کی قرأت سن کر یہ فرماتے تھے: «يَرْحَمُهُ اللَّهُ» ”اللہ تعالیٰ اس پر رحم کرے، اس نے مجھے وہ آیت یاد کروا دی ہے، جو مجھے بھلا دی گئی تھی۔“ [صحیح ابن حبان/كتاب العلم/حدیث: 107]

سیدنا ابوہریرہ رضی اللہ عنہ بیان کرتے ہیں کہ سیدنا عمر بن خطاب رضی اللہ عنہ نے عرض کی: یا رسول اللہ! ہم جو عمل کرتے ہیں، کیا وہ پیدا ہوتا ہے؟ یا یہ کسی ایسی صورت میں ہے، جو پہلے سے طے ہو چکی ہے؟ تو نبی اکرم صلی اللہ علیہ وسلم نے فرمایا: ”یہ ایسی صورت میں ہے، جو پہلے سے طے ہو چکی ہے۔“ سیدنا عمر رضی اللہ عنہ نے عرض کی: پھر عمل کرنے کی وجہ کیا ہے؟ نبی اکرم صلی اللہ علیہ وسلم نے ارشاد فرمایا: ”اے عمر! (اس نتیجے تک) صرف عمل کے ذریعے ہی پہنچا جا سکتا ہے۔“ انہوں نے عرض کی: یا رسول اللہ! پھر تو ہم اہتمام کے ساتھ عمل کریں گے۔ [صحیح ابن حبان/كتاب العلم/حدیث: 108]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے ہاں تشریف لایا کرتے تھے۔ میرا ایک چھوٹا بھائی تھا جس کی کنیت ابوعمیر تھی۔ ایک دن نبی اکرم صلی اللہ علیہ وسلم ہمارے ہاں تشریف لائے تو آپ نے دریافت کیا: ”اے ابوعمیر! تمہاری چڑیا کا کیا حال ہے؟“ [صحیح ابن حبان/كتاب العلم/حدیث: 109]

عامر بن سعد بن ابی وقاص اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”مسلمانوں میں سب سے بڑا جرم اس شخص کا ہے جو کسی ایسی چیز کے بارے میں دریافت کرے جسے حرام قرار نہ دیا گیا ہو، اور پھر اس شخص کے دریافت کرنے کی وجہ سے اسے مسلمانوں کے لیے حرام قرار دے دیا جائے۔“ [صحیح ابن حبان/كتاب العلم/حدیث: 110]