سیدنا ابوموسیٰ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص کو قرآن اور ایمان دیا جائے، اس شخص کی مثال ناشپاتی کی طرح ہے، جس کا ذائقہ بھی اچھا ہوتا ہے اور خوشبو بھی اچھی ہوتی ہے، اور جس شخص کو قرآن بھی نہ دیا جائے اور ایمان بھی نہ دیا جائے، اس کی مثال حنظلہ نامی بوٹی کی طرح ہوتی ہے، جس کا ذائقہ بھی کڑوا ہوتا ہے اور اس کی خوشبو بھی نہیں ہوتی۔ اور جس شخص کو ایمان دیا جائے، لیکن (قرآن کا علم) نہ دیا جائے، اس کی مثال کھجور کی طرح ہے، جس کا ذائقہ اچھا ہوتا ہے، لیکن اس کی خوشبو نہیں ہوتی۔ اور جس شخص کو (قرآن کا علم دیا جائے) اور اسے ایمان نہ دیا جائے، اس کی مثال ریحانہ نامی بوٹی کی طرح ہوتی ہے، جس کا ذائقہ کڑوا ہوتا ہے، لیکن خوشبو اچھی ہوتی ہے۔“ [صحیح ابن حبان/كتاب العلم/حدیث: 121]

سیدنا ابوشریح خزاعی رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم ہمارے پاس تشریف لائے، آپ صلی اللہ علیہ وسلم نے ارشاد فرمایا: ”تم لوگ خوشخبری قبول کرو، تم لوگ خوشخبری قبول کرو، کیا تم لوگ اس بات کی گواہی نہیں دیتے کہ اللہ تعالیٰ کے علاوہ اور کوئی معبود نہیں ہے اور بے شک میں اللہ کا رسول ہوں؟“ لوگوں نے عرض کی: جی ہاں! تو نبی اکرم صلی اللہ علیہ وسلم نے ارشاد فرمایا: ”بے شک یہ قرآن ایک رسی کی طرح ہے، جس کا ایک کنارہ اللہ تعالیٰ کے دستِ قدرت میں ہے اور ایک کنارہ تمہارے ہاتھوں میں ہے، تم اسے مضبوطی سے تھام لو، تو اس کے بعد تم کبھی بھی گمراہ نہیں ہو گے اور ہلاکت کا شکار نہیں ہو گے۔“ [صحیح ابن حبان/كتاب العلم/حدیث: 122]

یزید بن حیان، سیدنا زید بن ارقم رضی اللہ عنہ کے بارے میں بیان کرتے ہیں کہ ایک مرتبہ ہم ان کی خدمت میں حاضر ہوئے، تو ہم نے ان سے گزارش کی: آپ نے بھلائی کو دیکھا ہے، آپ نبی اکرم صلی اللہ علیہ وسلم کے ساتھ رہے ہیں اور آپ نے نبی اکرم صلی اللہ علیہ وسلم کی اقتدا میں نمازیں ادا کی ہیں۔ انہوں نے جواب دیا: جی ہاں! نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا: ”میں تمہارے درمیان اللہ کی کتاب کو چھوڑ کر جا رہا ہوں، یہ اللہ کی رسی ہے، جو شخص اس کی پیروی کرے گا، وہ ہدایت پر گامزن رہے گا اور جو شخص اسے چھوڑ دے گا، وہ گمراہی کے راستے پر ہو گا۔“ [صحیح ابن حبان/كتاب العلم/حدیث: 123]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قرآن ایسا سفارشی ہے، جس کی سفارش قبول کی جائے گی اور ایسا جھگڑالو ہے (یعنی وہ اللہ تعالیٰ کی بارگاہ میں اپنے پڑھنے والے کے لیے بحث کرے گا)، جس کی تصدیق کی جائے گی، جو شخص اسے اپنا پیشوا بنائے گا، یہ اسے جنت کی طرف لے جائے گا اور جو شخص اسے پس پشت ڈال دے گا، یہ اسے جہنم کی طرف لے جائے گا۔“ (امام ابن حبان رحمہ اللہ فرماتے ہیں:) جو شخص علم حدیث میں مہارت نہیں رکھتا، اس روایت کے الفاظ نے اسے اس غلط فہمی کا شکار کیا کہ قرآن کو بنایا گیا ہے اور یہ مخلوق ہے، حالانکہ ایسا نہیں ہے۔ ان الفاظ سے مراد یہ ہے، جیسا کہ ہم نے اپنی کتابوں میں یہ بات تحریر کی ہے: عرب اپنے محاورے میں بعض اوقات کسی چیز کے اسم کا اطلاق اس کے سبب پر کرتے ہیں، جس طرح وہ اس سبب کے اسم کا اطلاق اس چیز پر کر دیتے ہیں۔ تو جب قرآن پر عمل کرنا، کرنے والے شخص کو جنت کی طرف لے جائے گا، تو اس چیز یعنی قرآن پر عمل کرنے کے اسم کا اطلاق اس کے سبب یعنی قرآن پر کیا گیا۔ اس سے مراد یہ نہیں ہے کہ قرآن مخلوق ہے۔ [صحیح ابن حبان/كتاب العلم/حدیث: 124]

سالم اپنے والد سیدنا عبداللہ بن عمر رضی اللہ عنہما کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”رشک صرف دو طرح کے آدمیوں پر کیا جا سکتا ہے۔ ایک وہ شخص جسے اللہ تعالیٰ نے قرآن (کا علم) عطا کیا ہو اور وہ دن رات اس کے حوالے سے مصروف رہتا ہو، اور ایک وہ شخص جسے اللہ تعالیٰ نے مال عطا کیا ہو اور وہ شخص دن رات اسے خرچ کرتا ہو۔“ [صحیح ابن حبان/كتاب العلم/حدیث: 125]

سالم بن عبداللہ اپنے والد سیدنا عبداللہ بن عمر رضی اللہ عنہما کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”رشک صرف دو آدمیوں پر کیا جا سکتا ہے۔ ایک وہ شخص جسے اللہ تعالیٰ نے اس کتاب (کا علم) عطا کیا ہو، اور وہ دن رات اس کے ساتھ مصروف رہتا ہو، اور ایک وہ شخص جسے اللہ تعالیٰ نے مال عطا کیا ہو، اور وہ دن رات اسے صدقہ کرتا رہے۔“ [صحیح ابن حبان/كتاب العلم/حدیث: 126]

سیدنا زید بن خالد جہنی رضی اللہ عنہ بیان کرتے ہیں کہ انہوں نے سیدنا عثمان غنی رضی اللہ عنہ سے ایسے شخص کے بارے میں دریافت کیا جو صحبت کرتا ہے لیکن اسے انزال نہیں ہوتا، تو سیدنا عثمان رضی اللہ عنہ نے فرمایا: ”اس پر کوئی چیز یعنی غسل لازم نہیں ہو گا۔“ پھر سیدنا عثمان غنی رضی اللہ عنہ نے فرمایا: ”میں نے یہ بات نبی اکرم صلی اللہ علیہ وسلم کی زبانی سنی ہے۔“ زید بن خالد رضی اللہ عنہ کہتے ہیں: میں نے اس کے بعد سیدنا علی بن ابی طالب رضی اللہ عنہ، سیدنا زبیر بن عوام رضی اللہ عنہ، سیدنا طلحہ بن عبید اللہ رضی اللہ عنہ اور سیدنا ابی بن کعب رضی اللہ عنہ سے دریافت کیا تو ان حضرات نے بھی اس کی مانند جواب دیا۔ ابوسلمہ رحمہ اللہ نامی راوی کہتے ہیں: عروہ بن زبیر رحمہ اللہ نے مجھے یہ بات بتائی کہ انہوں نے سیدنا ابو ایوب انصاری رضی اللہ عنہ سے اس بارے میں دریافت کیا تو انہوں نے بھی نبی اکرم صلی اللہ علیہ وسلم کے حوالے سے اس کی مانند جواب دیا۔ [صحیح ابن حبان/كتاب العلم/حدیث: 127]