عبیداللہ بن عبداللہ بیان کرتے ہیں کہ سیدنا عبداللہ بن عباس رضی اللہ عنہما یہ بیان کیا کرتے تھے کہ ایک مرتبہ ایک شخص نبی اکرم صلی اللہ علیہ وسلم کی خدمت میں حاضر ہوا۔ اس نے عرض کی: یا رسول اللہ! میں نے گزشتہ رات ایک بادل دیکھا ہے، جس سے گھی اور شہد کی بارش ہو رہی تھی اور لوگ اسے اپنے ہاتھوں میں لے رہے تھے۔ کوئی شخص زیادہ لے رہا تھا، اور کوئی کم لے رہا تھا۔ پھر میں نے آسمان سے زمین کی طرف لٹکی ہوئی ایک رسی دیکھی۔ پھر میں نے آپ کو دیکھا کہ آپ نے اسے پکڑا اور اوپر تشریف لے گئے۔ پھر آپ کے بعد ایک شخص نے اسے پکڑا اور وہ بھی اوپر چلا گیا۔ پھر ایک اور شخص نے اسے پکڑا اور وہ بھی اوپر چلا گیا، پھر ایک اور شخص نے اسے پکڑا، تو وہ رسی ٹوٹ گئی۔ پھر اس شخص کے لیے اسے ملا دیا گیا، تو وہ بھی اوپر چلا گیا۔ (راوی کہتے ہیں) سیدنا ابوبکر رضی اللہ عنہ نے عرض کی: یا رسول اللہ! میرے والد آپ پر قربان ہوں۔ اللہ کی قسم! آپ مجھے موقع دیجیے کہ میں اس کی تعبیر بیان کروں۔ نبی اکرم صلی اللہ علیہ وسلم نے ارشاد فرمایا: ”تم تعبیر بیان کرو۔“ تو سیدنا ابوبکر رضی اللہ عنہ نے عرض کی: بادل سے مراد اسلام کا بادل ہے، اور اس سے ٹپکنے والے گھی اور شہد (سے مراد) قرآن ہے، اس کی حلاوت اور نرمی مراد ہے۔ جہاں تک لوگوں کا اسے ہاتھوں میں لینے کا تعلق ہے، تو کچھ لوگ قرآن کا زیادہ علم حاصل کرتے ہیں اور کچھ لوگ اس کا کم علم حاصل کرتے ہیں۔ جہاں تک آسمان سے نیچے لٹکنے والی رسی کا تعلق ہے، تو یہ وہ حق ہے، جس پر آپ گامزن ہیں۔ آپ نے اس کو اختیار کیا، تو اللہ تعالیٰ نے آپ کو سربلندی عطا فرمائی۔ پھر آپ کے بعد ایک شخص نے اسے پکڑ لیا، تو اس نے اس کے ذریعے سربلندی حاصل کی۔ پھر ایک اور شخص نے اسے پکڑ لیا، تو اس نے اس کے ذریعے سربلندی حاصل کی۔ پھر ایک اور شخص نے اسے پکڑ لیا، تو رسی منقطع ہو گئی۔ پھر اس شخص کے لیے اسے ملا دیا گیا، تو اس نے بھی سربلندی حاصل کی۔ یا رسول اللہ! آپ مجھے بتائیے، میرے والد آپ پر قربان ہوں، کیا میں نے ٹھیک تعبیر بیان کی ہے یا غلط بیان کی ہے؟ تو نبی اکرم صلی اللہ علیہ وسلم نے فرمایا: ”تم نے کچھ تعبیر غلط بیان کی ہے، اور کچھ ٹھیک بیان کی ہے۔“ سیدنا ابوبکر رضی اللہ عنہ نے عرض کی: اللہ کی قسم! یا رسول اللہ! مجھے بتائیے کہ میں نے کہاں غلطی کی ہے؟ نبی اکرم صلی اللہ علیہ وسلم نے ارشاد فرمایا: ”تم قسم نہ دو۔“ [صحیح ابن حبان/كتاب العلم/حدیث: 111]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص ہدایت کی طرف دعوت دیتا ہے، تو اس شخص کو ان تمام لوگوں کے اجر جتنا اجر ملے گا جو اس ہدایت کی پیروی کرتے ہیں اور ان لوگوں کے اجر میں کوئی کمی نہیں ہو گی، اور جو شخص گمراہی کی طرف دعوت دیتا ہے، اس شخص کو ان تمام لوگوں جتنا گناہ ہو گا جو اس گمراہی کی پیروی کرتے ہیں اور ان لوگوں کے گناہ میں کوئی کمی نہیں ہو گی۔“ [صحیح ابن حبان/كتاب العلم/حدیث: 112]

سیدنا ابوہریرہ رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم اپنے کچھ اصحاب کے پاس سے گزرے جو ہنس رہے تھے۔ نبی اکرم صلی اللہ علیہ وسلم نے فرمایا: ”جو چیز میں جانتا ہوں اگر تم جان لو، تو تم تھوڑا ہنسا کرو اور زیادہ رویا کرو۔“ سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے اور انہوں نے عرض کی: بے شک اللہ تعالیٰ آپ سے یہ فرما رہا ہے کہ آپ کیوں میرے بندوں کو مایوس کر رہے ہیں؟ راوی بیان کرتے ہیں کہ نبی اکرم صلی اللہ علیہ وسلم ان صحابہ کے پاس واپس تشریف لائے اور آپ صلی اللہ علیہ وسلم نے ارشاد فرمایا: ” «سَدِّدُوا وَقَارِبُوا وَأَبْشِرُوا» ”تم لوگ ٹھیک رہو، میانہ روی اختیار کرو اور خوشخبری حاصل کرو۔“ (امام ابن حبان رحمہ اللہ فرماتے ہیں:) لفظ «سَدِّدُوا» سے مراد یہ ہے کہ تم لوگ تسدید اختیار کرنے والے بن جاؤ اور تسدید سے مراد نبی اکرم صلی اللہ علیہ وسلم کے طریقے کو لازم پکڑنا اور آپ صلی اللہ علیہ وسلم کی سنت کی پیروی کرنا ہے۔ روایت کے الفاظ «قَارِبُوا» سے مراد یہ ہے کہ تم اپنے اوپر ایسی شدت لازم نہ کرو جس کی تم طاقت نہیں رکھتے۔ روایت کے الفاظ «أَبْشِرُوا» سے مراد یہ ہے کہ تم یہ خوشخبری حاصل کرو کہ جب تم میرے طریقے کو لازم پکڑ لو گے اور اعمال میں میانہ روی اختیار کرو گے تو تمہیں جنت ملے گی۔ [صحیح ابن حبان/كتاب العلم/حدیث: 113]

سیدنا زید بن ثابت رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کی موجودگی میں مختلف ٹکڑوں سے قرآن جمع کیا کرتے تھے۔ [صحیح ابن حبان/كتاب العلم/حدیث: 114]

سیدنا عقبہ بن عامر جہنی رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم باہر تشریف لائے اور ہم اس وقت صفہ میں موجود تھے، آپ صلی اللہ علیہ وسلم نے فرمایا: ”تم میں سے کون شخص اس بات کو پسند کرتا ہے کہ وہ بطحان یا عقیق جائے اور روزانہ وہاں سے دو ایسی اونٹنیاں لے آیا کرے جن کی کوہان بلند ہو اور ان کی رنگت چمکدار ہو، اور وہ کسی گناہ اور کسی قطع رحمی کے بغیر انہیں حاصل کر لے۔“ لوگوں نے عرض کی: یا رسول اللہ! ہم میں سے ہر ایک شخص اس بات کو پسند کرے گا، تو نبی اکرم صلی اللہ علیہ وسلم نے ارشاد فرمایا: ”کوئی شخص مسجد جائے اور اللہ کی کتاب کی دو آیات کا علم حاصل کرے، یہ اس کے لیے دو اونٹنیوں سے زیادہ بہتر ہے، اور تین (آیات کا علم حاصل کرنا) تین اونٹنیوں حاصل کرنے سے زیادہ بہتر ہے، اور چار (آیات کا علم حاصل کرنا) ان کی تعداد کے جتنے اونٹوں کو حاصل کرنے سے بہتر ہے۔“ (امام ابن حبان رحمہ اللہ فرماتے ہیں: اس روایت میں ایک کلمہ پوشیدہ (یعنی محذوف) ہے اور وہ یہ ہے: ”اگر وہ اسے صدقہ کر دے۔“ تو نبی اکرم صلی اللہ علیہ وسلم کے اس فرمان سے مراد یہ ہو گی: آدمی کا اللہ کی کتاب کی دو آیات کا علم حاصل کرنا اس کے لیے دو یا تین اونٹنیوں کو صدقہ کرنے سے بہتر ہے۔ اس کی وجہ یہ ہے: اللہ کی کتاب کی دو آیات کا علم حاصل کرنا دو یا تین اونٹنیوں یا ان جتنے اونٹوں کو صدقہ کرنے سے زیادہ فضیلت رکھتا ہے کیونکہ یہ بات ناممکن ہے کہ نبی اکرم صلی اللہ علیہ وسلم کی کتاب کی دو آیات کا علم حاصل کرنے کے اجر کو دنیاوی ساز و سامان کے حصول سے تشبیہ دیں، اس لیے میں نے جو وضاحت کی ہے وہ درست ہو گی جیسا کہ میں نے ذکر کیا ہے۔) [صحیح ابن حبان/كتاب العلم/حدیث: 115]

سیدنا ابوامامہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قرآن کا علم حاصل کرو، کیونکہ یہ قیامت کے دن اپنے پڑھنے والے کے لیے شفاعت کرنے والا بن کر آئے گا اور تم لوگوں پر دو چمکدار چیزوں «الزَّهْرَاوَيْنِ» کو اختیار کرنا لازم ہے: سورہ بقرہ اور سورہ آل عمران، کیونکہ یہ دونوں قیامت کے دن یوں آئیں گی جیسے دو بادل «غَمَامَتَانِ» ہیں، یا جیسے یہ دو سایہ دار چیزیں «غَيَايَتَانِ» ہیں، یا جیسے یہ پرندوں کی دو قطاریں «حِزْقَانِ مِنْ طَيْرٍ صَوَافَّ» ہیں اور یہ اپنے پڑھنے والوں کے بارے میں بحث کریں گی (یعنی ان کی شفاعت کریں گی)۔ تم لوگوں پر سورہ بقرہ پڑھنا لازم ہے، اسے اختیار کرنا برکت ہے، اور اسے ترک کر دینا حسرت ہے، اور باطل لوگ «الْبَطَلَةُ» (یعنی جادوگر) اس کی استطاعت نہیں رکھتے۔“ [صحیح ابن حبان/كتاب العلم/حدیث: 116]

سیدنا حذیفہ رضی اللہ عنہ بیان کرتے ہیں: میں نے عرض کی: یا رسول اللہ! ہم اس وقت جس بھلائی پر گامزن ہیں کیا اس کے بعد کوئی ایسی برائی بھی آئے گی جس سے بچنا چاہیے؟ نبی اکرم صلی اللہ علیہ وسلم نے ارشاد فرمایا: ”اے حذیفہ! تم پر اللہ کی کتاب کو اختیار کرنا لازم ہے، اس کا علم حاصل کرو اور اس میں تمہارے لیے جو بھلائی ہے، اس کی پیروی کرو۔“ [صحیح ابن حبان/كتاب العلم/حدیث: 117]

سیدنا عثمان غنی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم میں زیادہ بہتر شخص وہ ہے جو قرآن کا علم حاصل کرے اور اس کی تعلیم دے۔“ [صحیح ابن حبان/كتاب العلم/حدیث: 118]

سیدنا عقبہ بن عامر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قرآن کا علم حاصل کرو اور اسے سنبھال کے رکھو۔ اس ذات کی قسم! جس کے دستِ قدرت میں میری جان ہے، یہ آدمی کے ذہن سے اس سے زیادہ تیزی سے نکلتا ہے، جتنی تیزی سے کوئی اونٹنی رسی میں سے نکلتی ہے۔“ [صحیح ابن حبان/كتاب العلم/حدیث: 119]

سیدنا سعد بن ابی وقاص رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص قرآن کو خوش الحانی سے نہیں پڑھتا، وہ ہم میں سے نہیں ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”وہ ہم میں سے نہیں ہے۔“ یہ اطلاع دینے کے حوالے سے ہے اور اس سے مراد یہ ہے کہ جو شخص یہ عمل کرتا ہے، وہ ہماری مانند (عمل کرنے والا) نہیں ہے، کیونکہ ہم یہ عمل نہیں کرتے ہیں، اس لیے جو ایسا کرے گا وہ ہماری مانند نہیں ہوگا۔ [صحیح ابن حبان/كتاب العلم/حدیث: 120]